ന്യൂഡൽഹി: നീതിപൂർവമായ വിചാരണയുടെ അടിസ്ഥാന തത്വങ്ങൾക്ക് സോഷ്യൽ മീഡിയയിലെ വിചാരണകളും വ്യാജ മാധ്യമപ്രവർത്തനവും വലിയ ഭീഷണിയെന്ന് സുപ്രീം കോടതി. ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചിന്റേതാണ് വിമർശനം. മൊബൈൽ ഫോൺ കൈവശമുള്ള ഓരോരുത്തരും സ്വയം മാധ്യമങ്ങളായി മാറുന്ന പ്രവണതയേയും കോടതി വിമർശിച്ചു. ഇത് കുറ്റാരോപിതരുടെ അവകാശങ്ങളെ ഗുരുതരമായി ബാധിക്കുന്നുവെന്ന് പരമോന്നത കോടതി ചൂണ്ടിക്കാട്ടി.
അപകടസ്ഥലങ്ങളിൽ പോലും പരിക്കേറ്റവരെ സഹായിക്കുന്നതിനുപകരം ദൃശ്യങ്ങൾ പകർത്തി സോഷ്യൽ മീഡിയയിൽ പ്രചരിപ്പിക്കുന്ന പ്രവണത വർധിച്ചുവരുന്നതായി കോടതി നിരീക്ഷിച്ചു. ഇത് ഒരുതരം “ഡിജിറ്റൽ അറസ്റ്റിന്” സമാനമായ സാഹചര്യമാണ് സൃഷ്ടിക്കുന്നതെന്നും കോടതി അഭിപ്രായപ്പെട്ടു. അറസ്റ്റിലായവരുടെ ചിത്രങ്ങളും വിവരങ്ങളും പോലീസ് സ്വന്തം സോഷ്യൽ മീഡിയ അക്കൗണ്ടുകളിൽ പങ്കുവെക്കുന്നത് സമൂഹത്തിൽ മുൻവിധി വളർത്തുന്നുവെന്ന് കോടതി വ്യക്തമാക്കി. പിന്നീട് തെളിവുകളുടെ അഭാവത്തിൽ പ്രതികൾ വെറുതെ വിടപ്പെടുമ്പോൾ, അതിന്റെ പ്രതികൂലത ജുഡീഷ്യറിയിലേക്ക് തിരിയുന്ന സാഹചര്യം ഉണ്ടാകുന്നതായും കോടതി ചൂണ്ടിക്കാട്ടി.
മാധ്യമപ്രവർത്തകരെന്ന പേരിൽ വാഹനങ്ങളിൽ ബോർഡുകൾ സ്ഥാപിച്ച് ദുരുദ്ദേശ്യത്തോടെ പ്രവർത്തിക്കുന്ന വ്യാജ മാധ്യമപ്രവർത്തകരുടെ വർധനവിലും കോടതി ആശങ്ക പ്രകടിപ്പിച്ചു. പരമ്പരാഗത മാധ്യമങ്ങൾ ഏതാണ്ട് നിയന്ത്രണം പാലിക്കുന്നുണ്ടെങ്കിലും, സോഷ്യൽ മീഡിയയിൽ ഇത്തരം നിയന്ത്രണം ഇല്ലെന്നതാണ് പ്രശ്നമെന്ന് ജസ്റ്റിസ് ജോയ്മാല്യ ബാഗ്ചി വ്യക്തമാക്കി.
സോഷ്യൽ മീഡിയ പ്ലാറ്റ്ഫോമുകൾ വഴി ബ്ലാക്ക്മെയിലിംഗ് നടത്തുന്ന ടാബ്ലോയിഡുകളുടെ പ്രവർത്തനവും വർധിച്ചുവരുന്നതായി സോളിസിറ്റർ ജനറൽ തുഷാർ മേത്ത കോടതിയെ അറിയിച്ചു. ഇതിനിടെ, പോലീസിന്റെ മാധ്യമ ഇടപെടലുകൾക്കും ഔദ്യോഗിക വിവരാവകാശ പ്രസ്താവനകൾക്കും ഏകീകരിച്ച മാനദണ്ഡങ്ങൾ തയ്യാറാക്കാൻ എല്ലാ സംസ്ഥാനങ്ങൾക്കും സുപ്രീം കോടതി മൂന്ന് മാസത്തെ സമയം അനുവദിച്ചു. അന്വേഷണത്തിലെ സുതാര്യതയും പ്രതികളുടെ നീതിപൂർവമായ വിചാരണാവകാശവും ഒരുപോലെ സംരക്ഷിക്കപ്പെടണമെന്ന് കോടതി നിർദേശിച്ചു.
പോലീസ് എസ്.ഒ.പി നടപ്പിലാക്കിയ ശേഷം വിഷയത്തിൽ കൂടുതൽ വിശദമായ വാദം കേൾക്കുന്നതിനായി നിലവിലെ ഹർജി പിൻവലിച്ച് പുതിയത് സമർപ്പിക്കാനും കോടതി നിർദേശിച്ചു.
