തിരുവനന്തപുരം:​ദൂരദേശങ്ങളിൽ മുഴങ്ങുന്ന പീരങ്കിനാദങ്ങൾ കേരളത്തിലെ സാധാരണക്കാരന്റെ അടുക്കളയിൽ വരെ അശാന്തിയുടെ കരിനിഴൽ വീഴ്ത്തിയിരിക്കുകയാണ്പശ്ചിമേഷ്യയിലെ യുദ്ധകാർമേഘങ്ങൾ നാളെ ഒഴിഞ്ഞുപോയാലും, അത് അവശേഷിപ്പിക്കുന്ന മുറിവുകൾ അത്രവേഗം ഉണങ്ങില്ലെന്നതാണ് യാഥാർത്ഥ്യം. ലോകം ഇന്നുവരെ കണ്ടിട്ടില്ലാത്ത വിധം ഭീകരമായ ഒരു ഇന്ധന പ്രതിസന്ധിയിലേക്കാണ് നാം നടന്നടുക്കുന്നത്. 1970-കളിലെ എണ്ണക്ഷാമത്തെയും 2022-ലെ വാതക പ്രതിസന്ധിയെയും വെല്ലുന്ന ഒന്നായിരിക്കും വരാനിരിക്കുന്നതെന്ന് അന്താരാഷ്ട്ര ഊർജ്ജ ഏജൻസി നൽകുന്ന മുന്നറിയിപ്പ് വ്യക്തമാക്കുന്നു.

​വാശിയേറിയ യുദ്ധത്തിന്റെ ഭാഗമായി പേർഷ്യൻ ഗൾഫിലെ ഓയിൽ ഹബ്ബുകളും ഗ്യാസ് പൈപ്പ് ലൈനുകളും ഇതിനോടകം തന്നെ തകർക്കപ്പെട്ടു കഴിഞ്ഞു. ഈ നാശനഷ്ടങ്ങൾ പരിഹരിച്ച് വിതരണ ശൃംഖല പഴയപടിയാക്കാൻ കാലമേറെ വേണ്ടിവരും. നമ്മുടെ രാജ്യം അതിന്റെ പെട്രോളിയം ആവശ്യങ്ങളുടെ 60 ശതമാനവും ആശ്രയിക്കുന്നത് ഈ രാജ്യങ്ങളെയാണ്. ഹോർമൂസ് കടലിടുക്കിലൂടെ ജീവൻ പണയം വെച്ചാണ് ഇന്ത്യൻ കപ്പലുകൾ ഇന്ധനവുമായി എത്തുന്നത്. എങ്കിലും എത്രനാൾ ഇങ്ങനെ പിടിച്ചുനിൽക്കാനാകും എന്ന ചോദ്യം ഓരോ ഇന്ത്യക്കാരനെയും അലട്ടുന്നു.
​കേരളത്തിലെ വീടുകളിൽ ഈ ആശങ്ക പ്രതിഫലിച്ചു തുടങ്ങിക്കഴിഞ്ഞു. ഗ്യാസ് സിലിണ്ടറുകളുടെ ബുക്കിംഗിൽ നിയന്ത്രണം വന്നതോടെ ജനങ്ങൾ പഴയകാലത്തെ ഓർമ്മിപ്പിക്കും വിധം ബദൽ മാർഗങ്ങൾ തേടുകയാണ്. വിറകടുപ്പുകൾക്കും കളിമൺ അടുപ്പുകൾക്കും വീണ്ടും പ്രിയമേറി. പറമ്പുകളിൽ നിന്ന് ചകിരിയും ചിരട്ടയും പെറുക്കിക്കൂട്ടി വരുംകാലത്തെ നേരിടാൻ മലയാളികൾ തയ്യാറെടുക്കുന്നു. നഗരവാസികളാകട്ടെ ഇൻഡക്ഷൻ കുക്കറുകളെയും ഇലക്ട്രിക് അടുപ്പുകളെയും അഭയം പ്രാപിക്കുന്നു. എന്നാൽ വേനൽ കടുക്കുന്നതോടെ വൈദ്യുതി ഉപഭോഗം ഉയരുന്നതും ബില്ല് വർദ്ധിക്കുന്നതും മറ്റൊരു ഭീഷണിയായി നിൽക്കുന്നു
.
​ഇന്ധനവില വർദ്ധനവ് കേവലം വണ്ടിയോടിക്കുന്നവരെ മാത്രമല്ല ബാധിക്കുന്നത്. ഡീസൽ വില ഉയർന്നാൽ അത് ചരക്കുകൂലിയെ ബാധിക്കുകയും വിപണിയിൽ പച്ചക്കറി മുതൽ മരുന്ന് വരെ എല്ലാ സാധനങ്ങൾക്കും വില കുതിച്ചുയരുകയും ചെയ്യും. ഇപ്പോൾത്തന്നെ വിലക്കയറ്റം കൊണ്ട് പൊറുതിമുട്ടുന്ന ജനത്തിന് മേൽ ഇത് ഇരട്ടപ്രഹരമാകും. ഹോട്ടൽ മേഖലയും കേറ്ററിംഗ് രംഗവും വാണിജ്യ സിലിണ്ടറുകളുടെ ക്ഷാമം മൂലം പ്രതിസന്ധിയിലാണ്.

​വഴക്കാളി രാജ്യങ്ങളുടെ വലിയ ലക്ഷ്യങ്ങൾക്കിടയിൽ ഞെരിഞ്ഞമരുന്നത് സാധാരണക്കാരന്റെ സ്വപ്നങ്ങളാണ്. പ്രളയത്തെയും മഹാമാരിയെയും അതിജീവിച്ച കേരളത്തിന്റെ ഇച്ഛാശക്തി ഇവിടെയും തുണയാകുമെന്ന് നമുക്ക് പ്രത്യാശിക്കാം. എങ്കിലും യുദ്ധം കഴിഞ്ഞാലും അതിന്റെ അലയൊലികൾ ഏറെക്കാലം നമ്മെ വേട്ടയാടും. അതുകൊണ്ട് തന്നെ ധൂർത്ത് ഒഴിവാക്കി, കരുതലോടെ 'മുണ്ടു മുറുക്കിയുടുത്ത്' മുന്നോട്ട് പോവുകയല്ലാതെ മറ്റൊരു പോംവഴി നമ്മുടെ മുന്നിലില്ല.