ദോഹ: ആഗോളതലത്തിൽ മിതമായ നിരക്കിൽ ഫാഷൻ വസ്ത്രങ്ങൾ ലഭ്യമാക്കുന്ന പ്രമുഖ റീട്ടെയിൽ ബ്രാൻഡായ പ്രൈമാർക്ക് (Primark) ഖത്തറിലേക്ക് എത്തുന്നു. അൽഷായ ഗ്രൂപ്പുമായി സഹകരിച്ച് ദോഹ ഫെസ്റ്റിവൽ സിറ്റിയിലാണ് രാജ്യത്തെ ആദ്യത്തെ ഷോറൂം ഈ വർഷം അവസാനത്തോടെ തുറക്കുന്നത്.ദോഹ ഫെസ്റ്റിവൽ സിറ്റിയിലെ മൂന്ന് നിലകളിലായാണ് പ്രൈമാർക്കിന്റെ ഖത്തറിലെ ആദ്യത്തെയും വലുതുമായ സ്റ്റോർ സജ്ജീകരിക്കുന്നത്.
പുരുഷന്മാർക്കും സ്ത്രീകൾക്കും കുട്ടികൾക്കുമുള്ള ട്രെൻഡി ഫാഷൻ വസ്ത്രങ്ങൾ, ഹോം അക്സസറികൾ എന്നിവ കുറഞ്ഞ നിരക്കിൽ ഇവിടെ ലഭ്യമാകും.അയർലൻഡിൽ ആരംഭിച്ച് യൂറോപ്പിലും അമേരിക്കയിലും നൂറുകണക്കിന് ശാഖകളുള്ള പ്രൈമാർക്ക്, അൽഷായ ഗ്രൂപ്പുമായുള്ള പങ്കാളിത്തത്തിലൂടെ മിഡിൽ ഈസ്റ്റിലെ സാന്നിധ്യം ശക്തമാക്കുന്നതിന്റെ ഭാഗമായാണ് ഖത്തറിലെത്തുന്നത്.പ്രൈമാർക്കിന്റെ വരവ് ഖത്തറിലെ റീട്ടെയിൽ മേഖലയ്ക്ക് വലിയ ഉണർവ് നൽകുമെന്നും ദോഹ ഫെസ്റ്റിവൽ സിറ്റിയുടെ ജനപ്രീതി വർദ്ധിപ്പിക്കുമെന്നും മാൾ ലീസിംഗ് അസോസിയേറ്റ് ഡയറക്ടർ മുഹമ്മദ് അൽ ഷർഖാവി പറഞ്ഞു.
