തിരുവനന്തപുരം: 2014-ന് മുൻപ് വിരമിച്ച് കോടതി ഉത്തരവുകളുടെ അടിസ്ഥാനത്തിൽ ഉയർന്ന പെൻഷൻ നേടിയവർക്കെതിരെ പ്രൊവിഡന്റ് ഫണ്ട് ഓർഗനൈസേഷൻ (ഇപിഎഫ്ഒ) നടപടികൾ ആരംഭിച്ചു. ഉയർന്ന പെൻഷൻ അനുവദിച്ച തീരുമാനം ഇപിഎഫ്ഒ റദ്ദാക്കി. ഇതിനകം കൈപ്പറ്റിയ അധിക തുക തിരിച്ചടയ്ക്കണമെന്ന് ആവശ്യപ്പെട്ട് പെൻഷൻകാർക്ക് നോട്ടീസും അയച്ചുതുടങ്ങിയിരിക്കുകയാണ്.

വിരമിക്കുന്നതിന് മുമ്പ് നിർബന്ധമായിരുന്ന ജോയിന്റ് ഓപ്ഷൻ സമർപ്പിച്ചിട്ടില്ലെന്ന കാരണമാണ് ഇപിഎഫ്ഒ ചൂണ്ടിക്കാണിക്കുന്നത്. ഇതിന്റെ അടിസ്ഥാനത്തിൽ വർഷങ്ങളായി ലഭിച്ച അധിക പെൻഷൻ തുക ഒറ്റത്തവണയായി തിരിച്ചടയ്ക്കണമെന്നാണ് നിർദേശം. പ്രായാധിക്യവും സാമ്പത്തിക പ്രതിസന്ധികളും നേരിടുന്ന നിരവധി പെൻഷൻകാർക്ക് ഇത് വലിയ ആശങ്കയുണ്ടാക്കിയിരിക്കുകയാണ്.

തിരുവനന്തപുരം സ്വദേശിയായ ഒരു മുതിർന്ന മാധ്യമപ്രവർത്തകനോട് 2.90 ലക്ഷം രൂപ തിരിച്ചടയ്ക്കാൻ ആവശ്യപ്പെട്ട് നോട്ടീസ് ലഭിച്ചിട്ടുണ്ട്. 2011-ൽ വിരമിച്ച ഇദ്ദേഹം കോടതി ഇടപെടലിലൂടെയാണ് യഥാർഥ ശമ്പളത്തിന്റെ അടിസ്ഥാനത്തിൽ ഉയർന്ന പെൻഷൻ നേടിയെടുത്തത്. ഇപ്പോൾ 15 വർഷമായി ലഭിച്ച അധിക പെൻഷന്റെ തുക തിരിച്ചുനൽകാനാണ് നിർദേശം. 2022 നവംബറിൽ സുപ്രീംകോടതി പുറപ്പെടുവിച്ച വിധിയിലെ വ്യവസ്ഥകൾ പ്രകാരം, 2014-ന് മുൻപ് വിരമിച്ചവർക്ക് ഉയർന്ന പെൻഷൻ ലഭിക്കില്ലെന്ന വ്യാഖ്യാനമാണ് ഇപിഎഫ്ഒ സ്വീകരിച്ചിരിക്കുന്നത്. ഇതിന്റെ അടിസ്ഥാനത്തിലാണ് പുതിയ നോട്ടീസുകൾ അയക്കുന്നത്.

അതേസമയം, സുപ്രീംകോടതിയുടെയും വിവിധ ഹൈക്കോടതികളുടെയും മുൻവിധികളുടെ ആത്മാവിന് വിരുദ്ധമാണ് ഈ നടപടിയെന്ന് പെൻഷൻകാർ ആരോപിക്കുന്നു. ജോയിന്റ് ഓപ്ഷൻ സമർപ്പിക്കുന്നതിൽ ഉണ്ടായ വീഴ്ച തൊഴിലുടമയുടെ ഭാഗത്തുനിന്നായിരുന്നുവെന്നും അതിന്റെ പേരിൽ തൊഴിലാളികളുടെ പെൻഷൻ അവകാശം നിഷേധിക്കുന്നത് അനീതിയാണെന്നും അവർ ചൂണ്ടിക്കാട്ടുന്നു. തൊഴിൽജീവിതം അവസാനിച്ച ശേഷമുള്ള സാമ്പത്തിക സുരക്ഷ തന്നെ ഈ നടപടിയിലൂടെ അപകടത്തിലാകുന്നുവെന്നാണ് അവരുടെ ആശങ്ക.