ദോഹ: രാജ്യത്തിന്റെ പ്രകൃതിവിഭവങ്ങൾ സംരക്ഷിക്കുന്നതിനും പരിസ്ഥിതി സുസ്ഥിരത ഉറപ്പാക്കുന്നതിനും യുവതലമുറയിൽ പാരിസ്ഥിതിക അവബോധം വളർത്തേണ്ടത് അനിവാര്യമാണെന്ന് ഖത്തർ പരിസ്ഥിതി കാലാവസ്ഥാ വ്യതിയാന മന്ത്രി ഡോ. അബ്ദുള്ള ബിൻ അബ്ദുൽ അസീസ് ബിൻ തുർക്കി അൽ സുബൈഇ പ്രസ്താവിച്ചു. യുവജനങ്ങളിൽ നിക്ഷേപിക്കുന്ന പരിസ്ഥിതി ജ്ഞാനം ഭാവിയിൽ രാജ്യത്തിന് കരുത്താകുമെന്നും അദ്ദേഹം കൂട്ടിച്ചേർത്തു.
മന്ത്രാലയം സംഘടിപ്പിച്ച മൂന്നാമത് 'സമ്മർ എൻവയോൺമെന്റൽ ക്ലബ്' (2026) സമാപന ചടങ്ങിൽ വിദ്യാർത്ഥികളെയും പങ്കാളികളായ വിവിധ സ്ഥാപനങ്ങളെയും ആദരിച്ചുകൊണ്ട് സംസാരിക്കുകയായിരുന്നു അദ്ദേഹം. "പരിസ്ഥിതിയുടെ കാവലാളുകൾ" (Guardians of the Environment) എന്ന പ്രമേയത്തിൽ രണ്ട് ആഴ്ച നീണ്ടുനിന്ന പരിപാടിയിൽ 11 മുതൽ 17 വയസ്സ് വരെയുള്ള 26 വിദ്യാർത്ഥികളാണ് പങ്കെടുത്തത്.കുട്ടികളിൽ പ്രായോഗിക അറിവ് വളർത്തുന്നതിനായി വിപുലമായ വർക്ക്‌ഷോപ്പുകളും ഫീൽഡ് വിസിറ്റുകളുമാണ് രണ്ടാഴ്ചത്തെ ക്യാമ്പിൽ ഉൾപ്പെടുത്തിയിരുന്നത്.
വർക്ക്‌ഷോപ്പുകളിലും ഫീൽഡ് വിസിറ്റുകളിലും വിദ്യാർത്ഥികൾ പ്രകടിപ്പിച്ച ആവേശവും പങ്കാളിത്തവും യുവതലമുറയിൽ വളർന്നുവരുന്ന പാരിസ്ഥിതിക ബോധത്തിന്റെ തെളിവാണെന്ന് മന്ത്രി ചൂണ്ടിക്കാട്ടി. ഇത്തരം പരിശീലന പരിപാടികളിലൂടെ യുവാക്കളെ കൂടുതൽ സജീവമാക്കാനും, പരിസ്ഥിതി വെല്ലുവിളികൾക്കെതിരെ പുതിയ ആശയങ്ങളുമായി മുന്നോട്ട് വരാൻ അവരെ പ്രോത്സാഹിപ്പിക്കാനും മന്ത്രാലയം പ്രതിജ്ഞാബദ്ധമാണെന്ന് പരിസ്ഥിതി കാലാവസ്ഥാ വ്യതിയാന മന്ത്രി ഡോ. അബ്ദുള്ള ബിൻ അബ്ദുൽ അസീസ്വ്യക്തമാക്കി
