ദോഹ: ഖത്തറിലെ പ്രമുഖ പ്രകൃതി സംരക്ഷണ കേന്ദ്രമായ അൽ റീം റിസർവിലെ വിവിധ താഴ്വരകളിൽ (Valleys/Meadows) പരിസ്ഥിതി കാലാവസ്ഥാ വ്യതിയാന മന്ത്രി ഡോ. അബ്ദുള്ള ബിൻ അബ്ദുൽ അസീസ് ബിൻ തുർക്കി അൽ സുബൈഇ സന്ദർശനം നടത്തി. മഴക്കാലത്തിന് ശേഷമുള്ള സസ്യജാലങ്ങളുടെ വളർച്ചയും പ്രകൃതിദത്തമായ ആവാസവ്യവസ്ഥയും നേരിട്ട് വിലയിരുത്തുന്നതിനായിരുന്നു സന്ദർശനം.അൽ റീം റിസർവിലെ വാദി അൽ നുമാൻ, അൽ ഹാം, അൽ ഹൈം, ഉം അൽ മാ എന്നീ താഴ്വരകളിലും അഷിരിജ് സംരക്ഷിത മേഖലയിലുമാണ് മന്ത്രി പരിശോധന നടത്തിയത്.
അവധി ദിവസങ്ങളിൽ ഇത്തരം സംരക്ഷിത മേഖലകളിൽ സന്ദർശകരുടെ തിരക്ക് വർദ്ധിക്കുന്ന സാഹചര്യത്തിൽ, പരിസ്ഥിതി നിയമലംഘനങ്ങൾ തടയാൻ പട്രോളിംഗ് ശക്തമാക്കാൻ മന്ത്രി ഉദ്യോഗസ്ഥർക്ക് നിർദ്ദേശം നൽകി.മണ്ണ് സംരക്ഷണം, കാട്ടുചെടികളുടെ വളർച്ച, ജൈവവൈവിധ്യം എന്നിവ നിലനിർത്തുന്നതിനായുള്ള പുനരധിവാസ പ്രവർത്തനങ്ങൾ അദ്ദേഹം വിലയിരുത്തി. പ്രകൃതിക്ക് ദോഷകരമാകുന്ന പ്രവർത്തനങ്ങൾക്കെതിരെ വിട്ടുവീഴ്ചയില്ലാത്ത നടപടിയുണ്ടാകുമെന്ന് അദ്ദേഹം വ്യക്തമാക്കി.
പ്രകൃതിദത്തമായ ഈ ഇടങ്ങൾ സുസ്ഥിരമായി നിലനിർത്തുന്നതിന് പൊതുജനങ്ങളിൽ അവബോധം വളർത്തേണ്ടതിന്റെ പ്രാധാന്യവും ഉദ്യോഗസ്ഥരുമായി മന്ത്രി നടത്തിയ യോഗത്തിൽ ചർച്ചയായി.
