ദോഹ: വർദ്ധിച്ചുവരുന്ന സുരക്ഷാ-രാഷ്ട്രീയ വെല്ലുവിളികളുടെ പശ്ചാത്തലത്തിൽ, മേഖലയിലെയും അന്താരാഷ്ട്രതലത്തിലെയും പുതിയ സംഭവവികാസങ്ങൾ ചർച്ച ചെയ്യുന്നതിനായി ഖത്തർ അമീർ ശൈഖ് തമീം ബിൻ ഹമദ് അൽ താനി അമേരിക്കൻ പ്രസിഡന്റ് ഡൊണാൾഡ് ട്രംപുമായും മറ്റ് പ്രാദേശിക നേതാക്കളുമായും സംയുക്ത ടെലിഫോൺ ചർച്ച നടത്തി.
ബഹ്‌റൈൻ രാജാവ് ഹമദ് ബിൻ ഈസ അൽ ഖലീഫ, ജോർദാൻ രാജാവ് അബ്ദുള്ള രണ്ടാമൻ ഇബ്ൻ അൽ ഹുസൈൻ, യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാൻ, സൗദി കിരീടാവകാശിയും പ്രധാനമന്ത്രിയുമായ പ്രിൻസ് മുഹമ്മദ് ബിൻ സൽമാൻ ബിൻ അബ്ദുൽ അസീസ് അൽ സൗദ്, ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് അൽ സിസി, തുർക്കി പ്രസിഡന്റ് റജബ് ത്വയ്യിബ് എർദോഗൻ, പാകിസ്താൻ ആർമി ചീഫ് ജനറൽ സയ്യിദ് ആസിം മുനീർ എന്നിവരാണ് സംയുക്ത ചർച്ചയിൽ പങ്കെടുത്തത്.
മേഖലയിലെ നിലവിലെ സംഭവവികാസങ്ങൾ വിലയിരുത്തിയ നേതാക്കൾ, സുരക്ഷയ്ക്കും സ്ഥിരതയ്ക്കും ഭീഷണിയായേക്കാവുന്ന കൂടുതൽ സംഘർഷങ്ങൾ ഒഴിവാക്കാനും സ്ഥിതിഗതികൾ നിയന്ത്രണവിധേയമാക്കാനുമുള്ള ശ്രമങ്ങളെക്കുറിച്ച് ആശയവിനിമയം നടത്തി.
പ്രാദേശികവും അന്തർദ്ദേശീയവുമായ സമാധാനവും സുരക്ഷയും നിലനിർത്തുന്നതിനായി ബന്ധപ്പെട്ട കക്ഷികൾക്കിടയിൽ ചർച്ചകൾ ഏകോപിപ്പിച്ചതിന് അമേരിക്കൻ പ്രസിഡന്റ് ഡൊണാൾഡ് ട്രംപിനോട് നേതാക്കൾ നന്ദി രേഖപ്പെടുത്തി. മേഖലയിലെ സ്ഥിരത ഉറപ്പാക്കുന്നതിൽ പാകിസ്താൻ നടത്തുന്ന നയതന്ത്ര ശ്രമങ്ങളെയും യോഗം പ്രശംസിച്ചു.
നിലവിലെ സംഭവവികാസങ്ങളെ നേരിടുന്നതിനും പ്രാദേശിക-ആഗോള സ്ഥിരത ശക്തിപ്പെടുത്തുന്നതിനും ബന്ധപ്പെട്ട രാജ്യങ്ങൾ തമ്മിലുള്ള കൂടിയാലോചനകളും ഏകോപനവും ശക്തമാക്കേണ്ടതിന്റെ പ്രാധാന്യം ഖത്തർ അമീർ ശൈഖ് തമീം ബിൻ ഹമദ് അൽ താനി ചർച്ചയിൽ ഊന്നിപ്പറഞ്ഞു. പ്രതിസന്ധികൾ പരിഹരിക്കുന്നതിനും സംഘർഷങ്ങളുടെ ആഘാതം ഒഴിവാക്കുന്നതിനും ഏറ്റവും ഫലപ്രദമായ മാർഗം നയതന്ത്ര ചർച്ചകൾ മാത്രമാണെന്നും അമീർ വ്യക്തമാക്കി.
