ദോഹ: ഖത്തർ അമീർ ശൈഖ് തമീം ബിൻ ഹമദ് അൽഥാനിയും സൗദി അറേബ്യൻ കിരീടാവകാശിയും പ്രധാനമന്ത്രിയുമായ പ്രിൻസ് മുഹമ്മദ് ബിൻ സൽമാൻ ബിൻ അബ്ദുൽ അസീസ് അൽ സൗദും തമ്മിൽ ടെലിഫോൺ സംഭാഷണം നടത്തി. ഇരു രാജ്യങ്ങളും തമ്മിലുള്ള ശക്തമായ സാഹോദര്യ ബന്ധത്തെക്കുറിച്ചും, ഇരു ജനതകളുടെയും പരസ്പര താൽപ്പര്യങ്ങൾക്കും അഭിലാഷങ്ങൾക്കും അനുസൃതമായി ബന്ധം കൂടുതൽ മെച്ചപ്പെടുത്തുന്നതിനും വികസിപ്പിക്കുന്നതിനുമുള്ള വഴികളെക്കുറിച്ചും ഇരുനേതാക്കളും ചർച്ച ചെയ്തു.
മേഖലാ-അന്തർദേശീയ തലങ്ങളിലെ ഏറ്റവും പുതിയ സംഭവവികാസങ്ങൾ, പ്രത്യേകിച്ച് മിഡിൽ ഈസ്റ്റിൽ സുരക്ഷയും സ്ഥിരതയും ശക്തിപ്പെടുത്തുന്നതിനുള്ള ശ്രമങ്ങൾ എന്നിവയും ഇരുപക്ഷവും വിലയിരുത്തി. പൊതുവായ താൽപ്പര്യമുള്ള വിവിധ വിഷയങ്ങളിൽ ഇരു നേതാക്കളും പരസ്പരം കാഴ്ചപ്പാടുകൾ പങ്കുവെച്ചു.
മേഖലാതലത്തിലും അന്തർദേശീയതലത്തിലുമുള്ള സമാധാനവും സുരക്ഷയും മുൻനിർത്തി വിവിധ വിഷയങ്ങളിൽ ഇരുരാജ്യങ്ങളും തമ്മിലുള്ള നിരന്തരമായ ഏകോപനവും കൂടിയാലോചനകളും തുടരേണ്ടതിന്റെ പ്രാധാന്യം അമീറും സൗദി കിരീടാവകാശിയും അടിവരയിട്ട് വ്യക്തമാക്കി.
