പ്രശസ്ത പരിസ്ഥിതി ശാസ്ത്രജ്ഞനും പരിസ്ഥിതി സംരക്ഷണ രംഗത്തെ വഴികാട്ടിയുമായ മാധവ് ഗാഡ്ഗിൽ (82) അന്തരിച്ചു. വാർദ്ധക്യസഹജമായ അസുഖങ്ങളെ തുടർന്ന് പുനെയിൽ ചികിത്സയിൽ കഴിയവെയാണ് അന്ത്യം സംഭവിച്ചത്. ബുധനാഴ്ച രാത്രിയിലായിരുന്നു മരണം. അദ്ദേഹത്തിന്റെ മകൻ സിദ്ധാർത്ഥ ഗാഡ്ഗിൽ ആണ് മരണവിവരം സ്ഥിരീകരിച്ചത്. 

പശ്ചിമഘട്ടത്തിലെ പരിസ്ഥിതി അവസ്ഥയെ ശാസ്ത്രീയമായി പഠിക്കാൻ കേന്ദ്ര സർക്കാർ നിയോഗിച്ച വിദഗ്ധ സമിതിയുടെ അധ്യക്ഷനായിരുന്നു അദ്ദേഹം. ഈ സമിതി പിന്നീട് ‘ഗാഡ്ഗിൽ കമ്മിറ്റി’ എന്ന പേരിലാണ് അറിയപ്പെട്ടത്. 2011-ൽ സമർപ്പിച്ച ഗാഡ്ഗിൽ കമ്മിറ്റി റിപ്പോർട്ട് പശ്ചിമഘട്ട സംരക്ഷണത്തിൽ നിർണായക വഴിത്തിരിവായിരുന്നു. പരിസ്ഥിതി അതിസൂക്ഷ്മ മേഖലകളായി തിരിച്ചറിഞ്ഞ പ്രദേശങ്ങളിൽ പാറഖനനം, അണക്കെട്ട് നിർമാണം, അനിയന്ത്രിത വികസനം എന്നിവ നിയന്ത്രിക്കണമെന്ന് റിപ്പോർട്ട് ശുപാർശ ചെയ്തിരുന്നു. ജൈവവൈവിധ്യ സംരക്ഷണത്തിനും പരിസ്ഥിതി സമതുലിതാവസ്ഥ നിലനിർത്തുന്നതിനും ലക്ഷ്യമിട്ട ഈ ശുപാർശകൾ രാജ്യവ്യാപകമായ ചർച്ചകൾക്ക് വഴിവെച്ചു.

റിപ്പോർട്ട് പുറത്തിറങ്ങിയ ആദ്യഘട്ടത്തിൽ കേരളത്തിൽ ഉൾപ്പെടെ വ്യാപകമായ എതിർപ്പുകൾ നേരിട്ടെങ്കിലും, 2018-ലെ മഹാപ്രളയവും തുടർച്ചയായി ഉണ്ടായ പ്രകൃതിക്ഷോഭങ്ങളും പശ്ചാത്തലമായപ്പോൾ ഗാഡ്ഗിലിന്റെ മുന്നറിയിപ്പുകൾക്ക് കൂടുതൽ പ്രാധാന്യം ലഭിച്ചു. ഇതോടെ റിപ്പോർട്ടിന്റെ പ്രസക്തിയും ശാസ്ത്രീയ മൂല്യവും പൊതുസമൂഹം കൂടുതൽ തിരിച്ചറിഞ്ഞു.

പരിസ്ഥിതി ശാസ്ത്ര മേഖലയിൽ നൽകിയ അതുല്യ സംഭാവനകൾക്ക് ഗാഡ്ഗിലിന് 1981-ൽ പത്മശ്രീയും 2006-ൽ പത്മഭൂഷണും രാജ്യം നൽകി ആദരിച്ചു. പരിസ്ഥിതി സംരക്ഷണം വികസനത്തോട് വിരോധമല്ലെന്നും, ഉത്തരവാദിത്തമുള്ള വികസനമാണ് ഭാവിക്ക് വഴിയെന്നും നിരന്തരം ഓർമിപ്പിച്ച ശാസ്ത്രജ്ഞനായിരുന്നു മാധവ് ഗാഡ്ഗിൽ.