ജറുസലേം: ഇസ്രായേലിൽ സർക്കാർ രൂപീകരണത്തിനുള്ള ചർച്ചകൾ പുതിയ വഴിത്തിരിവിലേക്ക്. നിലവിലെ പ്രധാനമന്ത്രി ബെഞ്ചമിൻ നെതന്യാഹുവിനെയും അദ്ദേഹത്തിന്റെ സഖ്യകക്ഷികളെയും ഉൾപ്പെടുത്തി ഐക്യസർക്കാർ രൂപീകരിക്കാനുള്ള സന്നദ്ധത അറിയിച്ച് പ്രതിപക്ഷ നേതാവ് ഗാഡി ഐസൻകോട്ട്. അറബ് പാർട്ടികളുടെ പിന്തുണയില്ലാതെ പാർലമെന്റിൽ ഭൂരിപക്ഷം ഉറപ്പാക്കുകയാണ് നീക്കത്തിന്റെ പ്രധാന ലക്ഷ്യം.

നെതന്യാഹുവിന്റെ ലിക്വിഡ് പാർട്ടിക്കും തീവ്രവലതുപക്ഷ നേതാവ് ബെസലേൽ സ്മോട്രിച്ചിന്റെ റിലീജിയസ് സീയോണിസ്റ്റ് പാർട്ടിക്കും തന്റെ നേതൃത്വത്തിലുള്ള സർക്കാരിൽ പങ്കാളികളാകാമെന്നാണ് ഐസൻകോട്ടിന്റെ നിലപാട്. ജറുസലേമിലെ പ്രസിഡന്റിന്റെ വസതിയിൽ നടന്ന ഔദ്യോഗിക ചടങ്ങിലാണ് അദ്ദേഹം ഇക്കാര്യം വ്യക്തമാക്കിയത്.

രാജ്യത്തിന്റെ ഐക്യമാണ് ലക്ഷ്യമെങ്കിൽ തന്റെ നേതൃത്വത്തിലുള്ള സർക്കാരിനെ പിന്തുണയ്ക്കാൻ ഇരുപാർട്ടികളും തയ്യാറാകണമെന്ന് ഐസൻകോട്ട് പറഞ്ഞു. ഇസ്രായേലിലെ എല്ലാ വിഭാഗങ്ങളുടെയും താൽപര്യങ്ങൾ സംരക്ഷിക്കുന്ന ഭരണമായിരിക്കും രൂപീകരിക്കുകയെന്നും അദ്ദേഹം വ്യക്തമാക്കി.

അതിനിടെ, അമേരിക്കയിലെ രാഷ്ട്രീയ മാറ്റങ്ങൾ ഇസ്രായേലിന് പുതിയ വെല്ലുവിളികൾ ഉയർത്തുന്നുണ്ടെന്ന് പ്രസിഡന്റ് ഐസക് ഹെർസോഗ് ചൂണ്ടിക്കാട്ടി. ഇസ്രായേലിന് ലഭിക്കുന്ന സൈനിക സഹായത്തിന്റെ കാര്യത്തിൽ ഡെമോക്രാറ്റിക് പാർട്ടിയുടെ നിലപാട് ആശങ്കയുണ്ടാക്കുന്നതാണെന്നും അദ്ദേഹം സൂചിപ്പിച്ചു. ഈ സാഹചര്യത്തിൽ രാജ്യത്ത് ശക്തവും സ്ഥിരതയുള്ളതുമായ സർക്കാർ അനിവാര്യമാണെന്നും ഹെർസോഗ് പറഞ്ഞു.

തിരഞ്ഞെടുപ്പിൽ ആർക്കും വ്യക്തമായ ഭൂരിപക്ഷം ലഭിക്കാത്തതാണ് ഇസ്രായേലിലെ രാഷ്ട്രീയ പ്രതിസന്ധിക്ക് കാരണം. ഒക്ടോബർ 27ന് നടന്ന തിരഞ്ഞെടുപ്പിൽ ഐസൻകോട്ടിന്റെ നാല് പാർട്ടികളുടെ സഖ്യത്തിന് 48 സീറ്റും നെതന്യാഹുവിന്റെ വലതുപക്ഷ മുന്നണിക്ക് 53 സീറ്റുമാണ് ലഭിച്ചത്. 120 അംഗ പാർലമെന്റിൽ അധികാരം പിടിക്കാൻ 61 സീറ്റുകൾ ആവശ്യമാണ്.

അറബ് പാർട്ടികൾ 19 സീറ്റുകൾ നേടി നിർണായക ശക്തിയായി മാറിയെങ്കിലും അവരുടെ പിന്തുണ സ്വീകരിച്ച് സർക്കാർ രൂപീകരിക്കാൻ ഐസൻകോട്ട് താൽപര്യപ്പെടുന്നില്ല. പകരം അൾട്രാ ഓർത്തഡോക്സ് പാർട്ടികളായ ഷാസ്, യുണൈറ്റഡ് തോറ ജൂഡായിസം എന്നിവയുടെ പിന്തുണ ഉറപ്പാക്കാനാണ് ശ്രമം. ഈ പാർട്ടികൾ ഒപ്പം നിന്നാൽ ഭൂരിപക്ഷം നേടാമെന്നാണ് കണക്കുകൂട്ടൽ.

2015 മുതൽ 2019 വരെ ഇസ്രായേൽ സൈനിക മേധാവിയായിരുന്ന ഐസൻകോട്ട്, ഗാസ യുദ്ധത്തിന്റെ ആദ്യഘട്ടത്തിൽ നെതന്യാഹുവിന്റെ യുദ്ധമന്ത്രിസഭയിലും പ്രവർത്തിച്ചിരുന്നു. ഇപ്പോൾ മുൻ രാഷ്ട്രീയ എതിരാളിയെപ്പോലും ഭരണസഖ്യത്തിൽ ഉൾപ്പെടുത്താനുള്ള അദ്ദേഹത്തിന്റെ നീക്കം ഇസ്രായേൽ രാഷ്ട്രീയത്തിൽ പുതിയ ചർച്ചകൾക്ക് വഴിയൊരുക്കിയിരിക്കുകയാണ്.