ദോഹ :ബലിപെരുന്നാൾ (ഈദ് അൽ അദ്ഹ) പ്രമാണിച്ച് ഖത്തറിലുടനീളമുള്ള 733 പള്ളികളിലും ഈദ് ഗാഹുകളിലുമായി പ്രത്യേക പെരുന്നാൾ നമസ്കാരം നടക്കും. ദുൽ ഹിജ്ജ 10-ന് (ബുധനാഴ്ച) രാവിലെ 5:00 മണിക്ക് ആയിരിക്കും പെരുന്നാൾ നമസ്കാരം ആരംഭിക്കുകയെന്ന് മന്ത്രാലയം അറിയിച്ചു.
ഇസ്‌ലാം മതവിശ്വാസികളുടെ ഏറ്റവും പ്രധാനപ്പെട്ട ആഘോഷങ്ങളിലൊന്നായ ബലിപെരുന്നാളിനെ വരവേൽക്കാൻ രാജ്യം പൂർണ്ണസജ്ജമായിക്കഴിഞ്ഞു. പുണ്യദിനത്തിൽ രാജ്യത്തിന്റെ വിവിധ ഭാഗങ്ങളിൽ നിന്നുള്ള പതിനായിരക്കണക്കിന് വിശ്വാസികൾ ഒത്തുചേർന്ന് പ്രത്യേക പ്രാർത്ഥനകളിൽ പങ്കാളികളാകും.പെരുന്നാൾ നമസ്കാരത്തിന് എത്തുന്നവർ പ്രാർത്ഥനാ സ്ഥലങ്ങളിലേക്ക് നേരത്തെ തന്നെ എത്തിച്ചേരാൻ ശ്രദ്ധിക്കുക. തിരക്ക് ഒഴിവാക്കാനും സുഗമമായ ക്രമീകരണങ്ങൾ ഉറപ്പാക്കാനും അധികൃതർ ആവശ്യമായ സുരക്ഷാ-ഗതാഗത ക്രമീകരണങ്ങൾ ഒരുക്കിയിട്ടുണ്ട്.
രാജ്യത്തെ പ്രധാന പള്ളികളിലും വിപുലമായ സൗകര്യങ്ങളുള്ള പൊതു മൈതാനങ്ങളിലുമാണ് (ഈദ് ഗാഹുകൾ) വിശ്വാസികൾക്കായി നമസ്കാര സൗകര്യം ഒരുക്കിയിരിക്കുന്നത്. സ്ത്രീകളുടെ പ്രാർത്ഥനയ്ക്കായി പ്രത്യേക സ്ഥലങ്ങളും ചില പള്ളികളിൽ സജ്ജീകരിച്ചിട്ടുണ്ട്.
