ദോഹ: ഖത്തറിലെ സ്വകാര്യ മേഖലയിൽ ജോലി ചെയ്യുന്ന ജീവനക്കാർക്കുള്ള ചെറിയ പെരുന്നാൾ (ഈദുൽ ഫിത്തർ) അവധി തൊഴിൽ മന്ത്രാലയം പ്രഖ്യാപിച്ചു. സ്വകാര്യ മേഖലയിലെ ജീവനക്കാർക്ക് മൂന്ന് ദിവസത്തെ ശമ്പളത്തോടു കൂടിയ (Paid Holiday) അവധിയാണ് പ്രഖ്യാപിച്ചത്.ജോലിപരമായ അനിവാര്യത കാരണം പെരുന്നാൾ അവധി ദിനങ്ങളിൽ ജീവനക്കാർ ജോലി ചെയ്യേണ്ടി വരികയാണെങ്കിൽ, അവർക്ക് അധിക ജോലി സമയത്തിനുള്ള (Overtime) ആനുകൂല്യങ്ങൾ നൽകണമെന്ന് മന്ത്രാലയം വ്യക്തമാക്കി.
ലേബർ ലോയിലെ ആർട്ടിക്കിൾ 74 അനുസരിച്ചുള്ള ഓവർടൈം അലവൻസുകൾക്കും മറ്റ് ആനുകൂല്യങ്ങൾക്കും ഇവർ അർഹരായിരിക്കും.സർക്കാർ മേഖലയിൽ ഒരാഴ്ചത്തെ അവധി പ്രഖ്യാപിച്ചതിന് പിന്നാലെയാണ് സ്വകാര്യ മേഖലയ്ക്കുള്ള നിർദ്ദേശങ്ങൾ മന്ത്രാലയം പുറപ്പെടുവിച്ചത്. എല്ലാ കമ്പനികളും ഈ നിർദ്ദേശങ്ങൾ പാലിക്കുന്നുണ്ടെന്ന് ഉറപ്പുവരുത്തണമെന്നും മന്ത്രാലയം ഓർമ്മിപ്പിച്ചു.
