ന്യൂഡൽഹി: നീറ്റ് പരീക്ഷാ ക്രമക്കേടുകളും ചോദ്യപേപ്പർ ചോർച്ചയും ചൂണ്ടിക്കാട്ടി ജന്തർ മന്തറിൽ കോക്രോച്ച് ജനതാ പാർട്ടി ( നേതൃത്വത്തിൽ നടന്നുവരുന്ന വിദ്യാർഥി പ്രക്ഷോഭം നിർണായക വഴിത്തിരിവിൽ. പ്രതിഷേധം ശക്തമായ സാഹചര്യത്തിൽ കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ രാജിവെച്ചു. സിജെപി പ്രതിനിധികളുമായി കേന്ദ്രസർക്കാർ ഇന്ന് ഉച്ചയ്ക്ക് ചർച്ച നടത്തുമെന്നായിരുന്നു നേരത്തെ അറിയിച്ചിരുന്നത്. എന്നാൽ ചർച്ച ആരംഭിക്കുന്നതിന് മുമ്പ് തന്നെ ധർമേന്ദ്ര പ്രധാൻ രാജിക്കത്ത് സമർപ്പിച്ചതോടെയാണ് രാഷ്ട്രീയ സംഭവവികാസങ്ങൾക്ക് വേഗം കൂടിയത്.

വിദ്യാർഥി സമരം അവസാനിപ്പിക്കുന്നതിനായി കേന്ദ്രസർക്കാരും സിജെപി നേതാക്കളും കഴിഞ്ഞ ദിവസം നടത്തിയ ചർച്ചയിൽ വിവിധ ആവശ്യങ്ങൾ പരിഗണിച്ചിരുന്നെങ്കിലും വിദ്യാഭ്യാസമന്ത്രിയുടെ രാജിക്കാര്യത്തിൽ അന്തിമ തീരുമാനമുണ്ടായിരുന്നില്ല. ധർമേന്ദ്ര പ്രധാൻ സ്ഥാനമൊഴിയണമെന്ന ആവശ്യത്തിൽ പ്രതിഷേധക്കാരും പ്രതിപക്ഷവും ഉറച്ചുനിന്നതോടെ സർക്കാർ കടുത്ത സമ്മർദത്തിലായി.

പ്രക്ഷോഭത്തിനിടെ ജീവനൊടുക്കിയ വിദ്യാർഥികളുടെ കുടുംബങ്ങൾക്ക് ഒരു കോടി രൂപ നഷ്ടപരിഹാരം നൽകുക, സമരത്തിൽ പങ്കെടുത്തവർക്കെതിരെ നിയമനടപടികൾ സ്വീകരിക്കരുത് തുടങ്ങിയ ആവശ്യങ്ങൾ പരിഗണിക്കാമെന്ന് കേന്ദ്രം നേരത്തെ വ്യക്തമാക്കിയിരുന്നു. എന്നാൽ മന്ത്രിയുടെ രാജിയുമായി ബന്ധപ്പെട്ട തീരുമാനം ഇന്ന് പ്രഖ്യാപിക്കാമെന്നായിരുന്നു സർക്കാർ അറിയിച്ചത്. ഇതിന് പിന്നാലെ വിവിധ സംസ്ഥാനങ്ങളിലേക്കും സമരം വ്യാപിച്ചതോടെ പ്രതിഷേധം കൂടുതൽ ശക്തമായി.

സമരം ദേശീയതലത്തിൽ വ്യാപിക്കുന്ന സാഹചര്യത്തിൽ കേന്ദ്രം കഴിഞ്ഞ ദിവസങ്ങളിൽ തന്നെ പരീക്ഷാ സംവിധാനത്തിൽ വ്യാപക മാറ്റങ്ങൾ പ്രഖ്യാപിച്ചിരുന്നു. പരീക്ഷാ ക്രമക്കേടുകൾക്കെതിരെ കർശന ശിക്ഷ ഉറപ്പാക്കുന്ന ബില്ലിന് കേന്ദ്രമന്ത്രിസഭ അംഗീകാരം നൽകിയതോടൊപ്പം, ദേശീയ പരീക്ഷകൾ നടത്തുന്ന നാഷണൽ ടെസ്റ്റിങ് ഏജൻസിയിൽ (എൻ.ടി.എ.) പുനഃസംഘടന ആരംഭിക്കുകയും 47 ഉദ്യോഗസ്ഥരെ സർവീസിൽ നിന്ന് പുറത്താക്കുകയും ചെയ്തിരുന്നു.

ധർമേന്ദ്ര പ്രധാന്റെ രാജിയോടെ സിജെപി ഉയർത്തിയ പ്രധാന ആവശ്യങ്ങളിലൊന്ന് അംഗീകരിക്കപ്പെട്ടിരിക്കുകയാണ്. പ്രക്ഷോഭത്തിന്റെ തുടർനടപടികളെക്കുറിച്ചുള്ള തീരുമാനം സിജെപി നേതൃത്വം ഉടൻ പ്രഖ്യാപിക്കുമെന്നാണ് സൂചന.