തിരുവനന്തപുരം: സിഎംആർഎൽ-എക്സാലോജിക് മാസപ്പടി കേസിൽ എൻഫോഴ്സ്മെന്റ് ഡയറക്ടറേറ്റിന്റെ അന്വേഷണം കൂടുതൽ ശക്തമാകുന്നു. കേസിൽ വീണയുടെ മൊബൈൽ ഫോൺ പരിശോധന നിർണായകമാകുമെന്നാണ് സൂചന. കഴിഞ്ഞ ദിവസത്തെ റെയ്ഡിനിടെ വീണയുടെ സ്വകാര്യ ഫോൺ ഇഡി പിടിച്ചെടുത്തിരുന്നു. കൂടാതെ, വീണയുടെ പേരിലുള്ള മൂന്ന് ബാങ്ക് അക്കൗണ്ടുകളും മരവിപ്പിച്ചു.
പരിശോധനയിൽ ലഭിച്ച ഡിജിറ്റൽ തെളിവുകൾ കോടതിയിൽ സമർപ്പിക്കാനാണ് ഇഡിയുടെ തീരുമാനം. മുഖ്യമന്ത്രി പിണറായി വിജയന്റെ വസതിയിൽ നടത്തിയ പരിശോധനയ്ക്കിടെ ചില രേഖകളും കണ്ടെത്തിയതായി ഇഡി അറിയിച്ചു. റെയ്ഡിനിടെ ഉണ്ടായ സംഘർഷം ആസൂത്രിതമാണെന്ന സംശയവും ഇഡി ഉയർത്തുന്നുണ്ട്. സംഭവവുമായി ബന്ധപ്പെട്ട വിശദാംശങ്ങൾ ഡയറക്ടറേറ്റിന് കൈമാറിയതായും വ്യക്തമാക്കി.
മാസപ്പടി കേസിൽ തുടർനടപടികൾ വേഗത്തിലാക്കാനാണ് ഇഡിയുടെ നീക്കം. സിഎംആർഎൽ ഉദ്യോഗസ്ഥരെ ഉടൻ ചോദ്യം ചെയ്യാൻ വിളിപ്പിക്കുമെന്നാണ് വിവരം. ഉദ്യോഗസ്ഥരിൽ നിന്ന് ലഭിക്കുന്ന വിവരങ്ങളുടെ അടിസ്ഥാനത്തിലായിരിക്കും വീണ ടി.ക്കെതിരായ നടപടികൾ കൂടുതൽ കടുപ്പിക്കുമോ എന്നതിൽ അന്തിമ തീരുമാനം എടുക്കുക.
കേസുമായി ബന്ധപ്പെട്ട് ആകെ 18.36 കോടി രൂപയുടെ 242 ബാങ്ക് അക്കൗണ്ടുകൾ ഇഡി മരവിപ്പിച്ചിട്ടുണ്ട്. ഇതിൽ മൂന്ന് അക്കൗണ്ടുകൾ വീണയുടേതാണെന്നും റിപ്പോർട്ടുണ്ട്.
