ദോഹ: ഖത്തറിലെ പരിസ്ഥിതി-സുസ്ഥിരതാ സംരംഭങ്ങളിൽ നൽകിവരുന്ന സജീവ പങ്കാളിത്തത്തിന് ഇൻസ്റ്റിറ്റ്യൂഷൻ ഓഫ് എൻജിനീയേഴ്‌സ് ഇന്ത്യ (IEI) ഖത്തർ ചാപ്റ്ററിന് ഖത്തർ ഫൗണ്ടേഷന്റെ എർത്ത്‌ന (Earthna) സെന്ററിന്റെ അംഗീകാരം. എർത്ത്‌ന സെന്റർ ഫോർ എ സസ്റ്റൈനബിൾ ഫ്യൂച്ചറിന്റെ കമ്മ്യൂണിറ്റി പങ്കാളിയായാണ് ഐ.ഇ.ഐ (IEI) തിരഞ്ഞെടുക്കപ്പെട്ടത്.
​ഖത്തർ പരിസ്ഥിതി കാലാവസ്ഥാ വ്യതിയാന മന്ത്രാലയത്തിന്റെ സഹകരണത്തോടെ സംഘടിപ്പിച്ച 'ഖത്തർ സസ്റ്റൈനബിലിറ്റി വീക്ക് 2025'-ൽ ഐ.ഇ.ഐ നൽകിയ വിലമതിക്കാനാകാത്ത സംഭാവനകളെ പരിഗണിച്ചാണ് ഈ ആദരം. സുസ്ഥിരത, പ്രൊഫഷണൽ എക്‌സലൻസ്, പരിസ്ഥിതി സംരക്ഷണം എന്നീ മേഖലകളിൽ ഐ.ഇ.ഐ ഖത്തർ ചാപ്റ്റർ പുലർത്തുന്ന പ്രതിബദ്ധതയ്ക്കുള്ള സാക്ഷ്യപത്രം കൂടിയാണിത്.
​ഏപ്രിൽ 26-ന് ഖത്തർ ഫൗണ്ടേഷൻ ഓഫീസിൽ നടന്ന ചടങ്ങിൽ ഫെഡറേഷൻ ഓഫ് ഗ്ലോബൽ എൻജിനീയേഴ്‌സ് (FGE) പ്രസിഡന്റ് എൻജിനീയർ അഹമ്മദ് ജാസിം അൽ ജോളോയിൽ നിന്ന് ഐ.ഇ.ഐ ഖത്തർ ചാപ്റ്റർ ചെയർമാൻ എൻജിനീയർ അബ്ദുൽ സത്താർ സർട്ടിഫിക്കറ്റ് ഏറ്റുവാങ്ങി. ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിലുമായി (IBPC) സഹകരിച്ച് എൻജിനീയറിംഗ് പ്രൊഫഷണലുകളെയും ബിസിനസ് സമൂഹത്തെയും കോർത്തിണക്കി നിരവധി ശ്രദ്ധേയമായ പരിപാടികൾ ഐ.ഇ.ഐ സംഘടിപ്പിച്ചിരുന്നു.
​ചടങ്ങിൽ ഐ.ഇ.ഐ എക്സിക്യൂട്ടീവ് കമ്മിറ്റി അംഗങ്ങളായ എൻജിനീയർ പോൾ ജേക്കബ്, എൻജിനീയർ അരവിന്ദ് കെ. ശർമ്മ, എൻജിനീയർ അസീം, പാനലിസ്റ്റ് എൻജിനീയർ ബസീത് അഹമ്മദ് എന്നിവർ പങ്കെടുത്തു.
​ഖത്തർ ഫൗണ്ടേഷന് കീഴിൽ പ്രവർത്തിക്കുന്ന എർത്ത്‌ന, പരിസ്ഥിതി-സാമൂഹിക-സാമ്പത്തിക സുസ്ഥിരതയ്ക്കായി നയരൂപീകരണവും ഗവേഷണവും നടത്തുന്ന പ്രമുഖ സ്ഥാപനമാണ്. ഐ.ഇ.ഐ ഖത്തർ ചാപ്റ്ററിന്റെ പ്രവർത്തന ചരിത്രത്തിലെ സുപ്രധാന നാഴികക്കല്ലാണ് ഈ അംഗീകാരമെന്ന് ഭാരവാഹികൾ അറിയിച്ചു.