ന്യൂജഴ്‌സി: തുടക്കം മുതൽ തന്നെ അത്യന്തം ആവേശം നിറഞ്ഞ നിമിഷങ്ങൾ സമ്മാനിച്ചാണ് അർജന്റീനയും സ്പെയിനും ഫൈനലിൽ ഏറ്റുമുട്ടുന്നത്. കളിയുടെ ആദ്യ മിനിറ്റുകളിൽ സ്പെയിന്റെ ആധിപത്യമാണ് കാണാൻ കഴിയുന്നത്. രണ്ടാം മിനിറ്റിൽ നിക്കോ ഗോൺസാലസിനെ പെഡ്രോ പോറോ വീഴ്ത്തിയതോടെ ആദ്യ ഫൗൾ പിറന്നു.
മത്സരത്തിലെ ആദ്യ ഗോൾശ്രമവും സ്പെയിന്റെ വകയായിരുന്നു. അഞ്ചാം മിനിറ്റിൽ ലമീൻ യമാൽ പന്തുമായി അർജന്റീന ബോക്സിലേക്ക് കയറി ശക്തമായ ഷോട്ടുതിർത്തെങ്കിലും ഗോൾകീപ്പർ എമിലിയാനോ മാർട്ടിനസ് മികച്ച രീതിയിൽ പന്ത് കൈവശപ്പെടുത്തി. യമാലിന്റെ മുന്നേറ്റം സ്പാനിഷ് ആക്രമണത്തിന്റെ സൂചനയായി.
ആദ്യ പത്ത് മിനിറ്റിൽ പന്തടക്കത്തിലും കളിയുടെ നിയന്ത്രണത്തിലും സ്പെയിൻ വ്യക്തമായ ആധിപത്യം സ്ഥാപിച്ചു. അർജന്റീനയ്ക്ക് കാര്യമായ മുന്നേറ്റങ്ങൾ സൃഷ്ടിക്കാൻ അവസരം നൽകാതെയാണ് സ്പാനിഷ് സംഘം കളി മുന്നോട്ടുകൊണ്ടുപോയത്.
14-ാം മിനിറ്റിൽ ദാനി ഓൽമോയെ അലക്സിസ് മാക് അലിസ്റ്റർ ഫൗൾ ചെയ്തു. ചെറിയ ചികിത്സയ്ക്ക് ശേഷം ഓൽമോ വീണ്ടും കളത്തിലേക്ക് മടങ്ങിയെത്തി. തുടക്കത്തിലെ ഈ മിനിറ്റുകൾ ഇരുടീമുകളുടെയും പോരാട്ടവീര്യം വ്യക്തമാക്കുന്നതായിരുന്നു.
