മുംബൈ: അജയ് ദേവ്ഗൺ വീണ്ടും വിജയ് സാൽഗോങ്കറായി എത്തിയ ‘ദൃശ്യം 3: ദി കൺക്ലൂഷൻ’ തിയറ്ററുകളിൽ മികച്ച പ്രതികരണം നേടി മുന്നേറുന്നതിനിടെ ചിത്രത്തിന്റെ പിന്നാമ്പുറ വിശേഷങ്ങൾ വെളിപ്പെടുത്തി തിരക്കഥാകൃത്ത് അമിൽ കിയാൻ ഖാൻ. ‘ദൃശ്യം 3’യുടെ തിരക്കഥ അന്തിമമാക്കാൻ നൂറിലേറെ ഡ്രാഫ്റ്റുകൾ തയ്യാറാക്കിയെന്നും ചിത്രത്തിന്റെ നിർണായക ക്ലൈമാക്സ് പല അഭിനേതാക്കളിൽനിന്നും അണിയറപ്രവർത്തകരിൽനിന്നും പോലും രഹസ്യമാക്കി വച്ചിരുന്നുവെന്നും അമിൽ പറഞ്ഞു.

ആദ്യ രണ്ട് ഭാഗങ്ങളുടെ വൻ വിജയത്തിന് ശേഷം എത്തിയ മൂന്നാം ഭാഗവും ബോക്സ് ഓഫിസിൽ ശക്തമായ മുന്നേറ്റമാണ് നടത്തുന്നത്. റിലീസ് ചെയ്ത് മൂന്ന് ദിവസത്തിനുള്ളിൽ ചിത്രം ആഗോളതലത്തിൽ 270 കോടിയിലേറെ രൂപ നേടിയെന്നാണ് റിപ്പോർട്ടുകൾ.

ചിത്രത്തിന്റെ കഥയും ക്ലൈമാക്സിലെ ട്വിസ്റ്റുകളും സംബന്ധിച്ച് ആരാധകർക്കിടയിൽ ചർച്ചകൾ ശക്തമാകുന്നതിനിടെയാണ് തിരക്കഥാകൃത്ത് സിനിമയുടെ രചനാ പ്രക്രിയയെക്കുറിച്ച് തുറന്നുപറഞ്ഞത്.

‘ദൃശ്യം’ പോലൊരു ജനപ്രിയ ഫ്രാഞ്ചൈസിയുടെ മൂന്നാം ഭാഗം എഴുതുന്നത് വലിയ ഉത്തരവാദിത്തമായിരുന്നുവെന്നാണ് അമിൽ പറയുന്നത്. തിരക്കഥ പൂർത്തിയാക്കുന്നതിന് മുമ്പ് നിരവധി പതിപ്പുകളാണ് അദ്ദേഹം തയ്യാറാക്കിയത്.

“എന്റെ ഫോൾഡറിനുള്ളിൽ വീണ്ടും ഫോൾഡറുകളുണ്ട്. തീയതികളും നമ്പറുകളും ചേർത്തുള്ള ഡ്രാഫ്റ്റുകൾ. പിന്നെയും തീയതികളും നമ്പറുകളും. ‘FINAL’, ‘FINAL 2’, ‘FINAL FINAL’ എന്നിങ്ങനെയുള്ള ഫയലുകൾ. ‘FINAL PLEASE GOD’ എന്ന പേരിലും ഒരു ഫയൽ ഉണ്ടായിരിക്കാം. കൃത്യമായി എത്ര ഡ്രാഫ്റ്റുകളുണ്ടെന്ന് എനിക്ക് ഓർമയില്ല. എന്നാൽ നൂറിലേറെയുണ്ടെന്ന് ഉറപ്പാണ്,” അമിൽ പറഞ്ഞു.

വിജയിയെ അറിയുന്ന പ്രേക്ഷകർ; അതായിരുന്നു വലിയ വെല്ലുവിളി

മൂന്നാം ഭാഗത്തിന്റെ തിരക്കഥ ഒരുക്കുമ്പോൾ നേരിട്ട ഏറ്റവും വലിയ വെല്ലുവിളി പ്രേക്ഷകരെ വീണ്ടും അമ്പരപ്പിക്കുക എന്നതായിരുന്നു. ആദ്യ സിനിമയിൽ വിജയ് സാൽഗോങ്കറുടെ സ്വഭാവവും ചിന്താരീതിയും പ്രേക്ഷകർക്ക് അത്ര പരിചിതമായിരുന്നില്ല. എന്നാൽ മൂന്നാം ഭാഗത്തിലെത്തുമ്പോൾ കഥ മാറി.

“ഇപ്പോൾ പ്രേക്ഷകർക്ക് വിജയിയെ അറിയാം. അയാൾ എങ്ങനെയാണ് ചിന്തിക്കുന്നതെന്നും അയാളുടെ കൈയിൽ എന്തൊക്കെ തന്ത്രങ്ങളുണ്ടെന്നും അവർക്കറിയാം. അതുകൊണ്ട് വിജയ് എന്ത് ചെയ്താലും പ്രേക്ഷകർ അതിനെ സംശയത്തോടെയാണ് കാണുന്നത്,” അമിൽ പറഞ്ഞു.

ഇത്തരം സാഹചര്യത്തിൽ പഴയ ‘ദൃശ്യം’ ഫോർമുല ആവർത്തിക്കാതെ അതേ സമയം ഫ്രാഞ്ചൈസിയുടെ സ്വഭാവം നഷ്ടപ്പെടുത്താതെയായിരുന്നു പുതിയ കഥ ഒരുക്കേണ്ടിയിരുന്നത്.

ക്ലൈമാക്സ് പോലും എല്ലാവർക്കും അറിയില്ലായിരുന്നു

സിനിമയിലെ നിർണായക ട്വിസ്റ്റുകൾ പുറത്താകാതിരിക്കാൻ അണിയറയിൽ കർശനമായ മുൻകരുതലുകളാണ് സ്വീകരിച്ചതെന്നും അമിൽ വെളിപ്പെടുത്തി. ചിത്രത്തിന്റെ ക്ലൈമാക്സ് വലിയൊരു വിഭാഗം അഭിനേതാക്കളോടും ക്രൂ അംഗങ്ങളോടും പോലും പങ്കുവച്ചിരുന്നില്ല.

“അഭിഷേക് സിനിമയുടെ നിർമാണം വിജയ് സാൽഗോങ്കറിനെപ്പോലെയാണ് കൈകാര്യം ചെയ്തത്. ക്ലൈമാക്സ് വലിയൊരു വിഭാഗം ക്രൂവിന് നൽകിയിരുന്നില്ല. ആർക്കെന്ത് വിവരം ആവശ്യമായിരുന്നോ, അത്ര മാത്രം അവരിലേക്ക് എത്തിച്ചു,” അമിൽ പറഞ്ഞു.

ചില അണിയറപ്രവർത്തകർക്ക് ഒരു രംഗം എങ്ങനെ ചിത്രീകരിക്കണമെന്ന വിവരം മാത്രമാണ് നൽകിയിരുന്നത്. ആ രംഗം കഥയിൽ എന്തിനാണ് എന്നുപോലും അവർക്ക് അറിയില്ലായിരുന്നുവെന്നും അദ്ദേഹം വ്യക്തമാക്കി.

ക്ലൈമാക്സ് പറയാൻ പണം വരെ വാഗ്ദാനം ചെയ്തു

സിനിമയുടെ അവസാനം എന്താണ് സംഭവിക്കുന്നതെന്ന് അറിയാൻ അഭിനേതാക്കളും ക്രൂ അംഗങ്ങളും മാത്രമല്ല, സുഹൃത്തുക്കളും ബന്ധുക്കളും വരെ തന്നെ സമീപിച്ചിരുന്നുവെന്നും അമിൽ പറഞ്ഞു.

“നിരവധി അഭിനേതാക്കളും ക്രൂ അംഗങ്ങളും എന്റെ സുഹൃത്തുക്കളും ബന്ധുക്കളും വരെ ക്ലൈമാക്സ് പറഞ്ഞുതരാൻ എന്നെ പണം നൽകി സ്വാധീനിക്കാൻ ശ്രമിച്ചു. പക്ഷേ ഗെയ്തോണ്ടെയെപ്പോലെ ഞാൻ സത്യസന്ധനും നിർമാതാക്കളോട് വിശ്വസ്തനുമായി തുടർന്നു,” എന്നായിരുന്നു അദ്ദേഹത്തിന്റെ തമാശ കലർന്ന പ്രതികരണം.

‘ദൃശ്യം’ ഡിഎൻഎ നിലനിർത്തി പുതിയ അനുഭവം

മൂന്നാം ഭാഗം എഴുതുമ്പോൾ ഏറ്റവും വലിയ വെല്ലുവിളി ‘ദൃശ്യം’ ഫ്രാഞ്ചൈസിയുടെ അടിസ്ഥാന സ്വഭാവം നിലനിർത്തിക്കൊണ്ട് പ്രേക്ഷകർ ഇതുവരെ കണ്ടിട്ടില്ലാത്ത അനുഭവം നൽകുകയായിരുന്നുവെന്നും അമിൽ പറഞ്ഞു.

“വലിയൊരു മല കയറുന്നതുപോലെയായിരുന്നു അത്. വർഷങ്ങളായി പ്രേക്ഷകർ സ്നേഹിച്ച ഒരു ഫ്രാഞ്ചൈസിയാണിത്. അവർക്കൊപ്പം ജീവിച്ച ഒരു കുടുംബം. വലിയ രീതിയിൽ സ്വീകരിക്കപ്പെട്ട രണ്ട് സിനിമകളുടെ പാരമ്പര്യവും നിങ്ങളുടെ ചുമലിലുണ്ട്. അതിനുമപ്പുറം മൂന്നാം തവണയും പ്രേക്ഷകരെ എങ്ങനെ അമ്പരപ്പിക്കുമെന്നതായിരുന്നു പ്രധാന ചോദ്യം,” അദ്ദേഹം വ്യക്തമാക്കി.

പുതിയ കഥയ്ക്കൊപ്പം ‘ദൃശ്യം’ സിനിമകളുടെ സ്വതസിദ്ധമായ ഹാസ്യം, കുടുംബബന്ധങ്ങൾ, വികാരം, ഡ്രാമ, ത്രില്ലർ ഘടകങ്ങൾ എന്നിവയും കൃത്യമായി നിലനിർത്തേണ്ടി വന്നുവെന്നും അമിൽ പറഞ്ഞു.

“പുതിയൊരു കഥ എഴുതുന്നതിനൊപ്പം ‘ദൃശ്യം’ എന്ന സിനിമയുടെ ഡിഎൻഎ നിലനിർത്തണം. ഹാസ്യം, കുടുംബം, വികാരം, ഡ്രാമ, ത്രിൽ എന്നിവയെല്ലാം വേണം. എന്നാൽ ഒന്നും മറ്റൊന്നിനെ മറികടക്കാനും പാടില്ല. അത് വളരെ നേർത്ത കയറിലൂടെ നടക്കുന്നതുപോലെയായിരുന്നു. ഭാഗ്യത്തിന്, ഞങ്ങളിൽ ആരും താഴേക്ക് നോക്കിയില്ല,” അമിൽ പറഞ്ഞു.

നൂറിലേറെ ഡ്രാഫ്റ്റുകളും കർശനമായ രഹസ്യസ്വഭാവവും ഒടുവിൽ എത്തിച്ചത് പ്രേക്ഷകരെ വീണ്ടും ഞെട്ടിക്കാനുള്ള ശ്രമത്തിലേക്കാണ്. വിജയ് സാൽഗോങ്കറുടെ കഥയ്ക്ക് മൂന്നാം അധ്യായം എഴുതുമ്പോൾ നേരിട്ട ഈ വെല്ലുവിളികളാണ് ‘ദൃശ്യം 3’യുടെ കഥയും ക്ലൈമാക്സും രൂപപ്പെടുത്തുന്നതിൽ നിർണായകമായതെന്നാണ് തിരക്കഥാകൃത്തിന്റെ വെളിപ്പെടുത്തലുകൾ സൂചിപ്പിക്കുന്നത്.