2025-ലെ ഇന്ത്യൻ സൊസൈറ്റി ഓഫ് അനലിറ്റിക്കൽ സയന്റിസ്റ്റുകളുടെ (ISAS) വനിതാ ശാസ്ത്രജ്ഞ അവാർഡ് ഡോ. അനു ഗോപിനാഥിന് ലഭിച്ചു. 2026 ജനുവരി 22-ന് കർണാടകയിലെ ബെലഗാവിയിൽ നടന്ന ഇന്റർനാഷണൽ അനലിറ്റിക്കൽ സയൻസ് കോൺഗ്രസിലാണ് അവാർഡ് സമ്മാനിച്ചത്.
കേരള ഫിഷറീസ് സമുദ്ര പഠന സർവകലാശാലയിലെ (കുഫോസ്) അക്വാട്ടിക് എൻവയോൺമെന്റ് മാനേജ്മെന്റ് വിഭാഗം മേധാവിയാണ് ഡോ. അനു ഗോപിനാഥ്. കോമൺവെൽത്ത് ഫെലോയും മൂന്ന് ഇന്ത്യൻ ആർട്ടിക് പര്യവേഷണങ്ങളിൽ പങ്കെടുത്തിട്ടുള്ള പ്രമുഖ ശാസ്ത്രജ്ഞയുമാണ്.
നാഷണൽ സെന്റർ ഫോർ പോളാർ ആൻഡ് ഓഷ്യൻ റിസർച്ച് (എൻസിപിഒആർ), ഇൻകോയിസ്, സ്പേസ് ആപ്ലിക്കേഷൻസ് സെന്റർ (ഐഎസ്ആർഒ), നാഷണൽ റിമോട്ട് സെൻസിംഗ് സെന്റർ (ഐഎസ്ആർഒ) തുടങ്ങിയ ദേശീയ സ്ഥാപനങ്ങളുടെ സഹകരണത്തിൽ സാമ്പത്തിക സഹായത്തോടെയുള്ള ഗവേഷണ പ്രവർത്തനങ്ങൾ നടത്തി വരുന്നു. ഇന്ത്യൻ സൊസൈറ്റി ഓഫ് അനലിറ്റിക്കൽ സയന്റിസ്റ്റുകളുടെ ഓണററി ഫെലോ കൂടിയാണ് ഡോ. അനു ഗോപിനാഥ്.
കെമിക്കൽ സമുദ്രശാസ്ത്ര മേഖലയിൽ സാമ്പത്തിക സഹായത്തോടെയുള്ള ഗവേഷണ പദ്ധതികളിൽ നൽകിയ ശ്രദ്ധേയമായ സംഭാവനകൾക്കുള്ള അംഗീകാരമായാണ് അവാർഡ് നൽകിയത്. ഇന്ത്യൻ ആർട്ടിക് നയത്തെ അടിസ്ഥാനമാക്കി യുജിസി അംഗീകരിച്ച ഒരു മാസിവ് ഓപ്പൺ ഓൺലൈൻ കോഴ്സ് (MOOC) വികസിപ്പിച്ചെടുത്തിട്ടുണ്ട്. ഇതുകൂടാതെ, കേരള സംസ്ഥാനത്തുടനീളമുള്ള വിവിധ സർവകലാശാലകൾക്കായി പരിസ്ഥിതി ശാസ്ത്രം, അനാലിറ്റിക്കൽ കെമിസ്ട്രി എന്നീ വിഷയങ്ങളിലായി 14 പുസ്തകങ്ങൾ രചിച്ചിട്ടുണ്ട്.
ഈ നേട്ടം കുഫോസിനും കേരളത്തിലെ ശാസ്ത്രസമൂഹത്തിനും അഭിമാനകരമാണെന്ന് സർവകലാശാല അധികൃതർ അറിയിച്ചു.
