തൃശ്ശൂർ: പ്രശസ്ത ആണവ ശാസ്ത്രജ്ഞനും എഴുത്തുകാരനും കമ്യൂണിസ്റ്റ് ചിന്തകനുമായ ഡോ. എം.പി. പരമേശ്വരൻ (92) അന്തരിച്ചു. തൃശ്ശൂരിലെ വസതിയിലായിരുന്നു അന്ത്യം. ശാസ്ത്രജ്ഞൻ, ശാസ്ത്രപ്രചാരകൻ, എഴുത്തുകാരൻ, സൈദ്ധാന്തികൻ, സാക്ഷരതാ പ്രവർത്തകൻ തുടങ്ങി വിവിധ മേഖലകളിൽ വ്യക്തിമുദ്ര പതിപ്പിച്ച വ്യക്തിയായിരുന്നു അദ്ദേഹം. കേരള ശാസ്ത്രസാഹിത്യ പരിഷത്തിന്റെ സ്ഥാപകരിൽ പ്രമുഖനായിരുന്ന എം.പി. പരമേശ്വരൻ, ശാസ്ത്രബോധം സാധാരണ ജനങ്ങളിലേക്ക് എത്തിക്കുന്നതിൽ നിർണായക പങ്കുവഹിച്ചു. മലയാളത്തിലും ഇംഗ്ലീഷിലുമായി നൂറോളം പുസ്തകങ്ങൾ അദ്ദേഹം രചിച്ചിട്ടുണ്ട്. ശാസ്ത്ര-വൈജ്ഞാനിക-സാഹിത്യ മേഖലകളിലെ സംഭാവനകൾക്ക് നിരവധി പുരസ്കാരങ്ങളും ലഭിച്ചു.

ബാർക്കിലെ ശാസ്ത്രജ്ഞനിൽ നിന്ന് ജനകീയ ശാസ്ത്രപ്രവർത്തകനിലേക്ക്

1935 ജനുവരി 18ന് തൃശ്ശൂർ ജില്ലയിലെ കിരാലൂരിലായിരുന്നു എം.പി. പരമേശ്വരന്റെ ജനനം. മടങ്ങർളി പരമേശ്വരൻ നമ്പൂതിരിയുടെയും മാടമ്പ് സാവിത്രി അന്തർജ്ജനത്തിന്റെയും മകനായിരുന്നു.

തൃശ്ശൂർ നമ്പൂതിരി വിദ്യാലയത്തിൽ പ്രാഥമിക വിദ്യാഭ്യാസം പൂർത്തിയാക്കിയ അദ്ദേഹം സി.എം.എസ് ഹൈസ്കൂൾ, സെന്റ് തോമസ് കോളജ് എന്നിവിടങ്ങളിൽ പഠനം നടത്തി. തിരുവനന്തപുരം എൻജിനീയറിങ് കോളജിൽനിന്ന് ഇലക്ട്രിക്കൽ എൻജിനീയറിങ്ങിൽ ബിരുദം നേടി. തുടർന്ന് മോസ്കോ പവർ ഇൻസ്റ്റിറ്റ്യൂട്ടിൽനിന്ന് ന്യൂക്ലിയർ എൻജിനീയറിങ്ങിൽ പി.എച്ച്.ഡി കരസ്ഥമാക്കി.

1957 മുതൽ 1975 വരെ ബാർക്കിൽ ശാസ്ത്രജ്ഞനായി പ്രവർത്തിച്ചു. എന്നാൽ ശാസ്ത്രബോധം ജനങ്ങളിലേക്ക് കൂടുതൽ വ്യാപിപ്പിക്കണമെന്ന ലക്ഷ്യത്തോടെ 1975ൽ ജോലി രാജിവെച്ച് കേരള ശാസ്ത്രസാഹിത്യ പരിഷത്തിന്റെ പ്രവർത്തനങ്ങളിൽ സജീവമായി.

പരമേശ്വരന്റെ നേതൃത്വത്തിൽ ശാസ്ത്രസാഹിത്യ പരിഷത്ത് കേരളത്തിലെ ശ്രദ്ധേയമായ ജനകീയ പ്രസ്ഥാനമായി വളർന്നു. പിന്നീട് രാജ്യത്തുടനീളം സംഘടനയുടെ പ്രവർത്തനങ്ങൾക്ക് സ്വാധീനം ലഭിക്കുന്നതിലും അദ്ദേഹത്തിന്റെ ഇടപെടലുകൾ നിർണായകമായി.

ഇടതുപക്ഷത്ത് വലിയ ചർച്ചയായ ‘നാലാംലോക സിദ്ധാന്തം’

എം.പി. പരമേശ്വരന്റെ രാഷ്ട്രീയ-സൈദ്ധാന്തിക ജീവിതത്തിലെ ഏറ്റവും വലിയ ചർച്ചകൾക്ക് വഴിവെച്ചത് ‘നാലാംലോക സിദ്ധാന്ത’മായിരുന്നു. ‘നാലാം ലോകം: സ്വപ്നവും യാഥാർത്ഥ്യവും’ എന്ന പുസ്തകത്തിലൂടെയാണ് അദ്ദേഹം ഈ ആശയം അവതരിപ്പിച്ചത്.

അധികാര വികേന്ദ്രീകരണം, പരിസ്ഥിതി സംരക്ഷണം, ജനകീയ പങ്കാളിത്തം എന്നിവയ്ക്ക് പ്രാധാന്യം നൽകുന്ന ഒരു സോഷ്യലിസ്റ്റ് സമൂഹമാണ് ‘നാലാംലോകം’ എന്ന ആശയത്തിലൂടെ പരമേശ്വരൻ മുന്നോട്ടുവെച്ചത്. മഹാത്മാഗാന്ധിയുടെ ഗ്രാമസ്വരാജ് ആശയങ്ങളെയും മാർക്സിസ്റ്റ് സാമ്പത്തിക ചിന്തകളെയും കൂട്ടിച്ചേർത്തായിരുന്നു അദ്ദേഹത്തിന്റെ സൈദ്ധാന്തിക സമീപനം.

ആഗോള കോർപറേറ്റ് വിപണിക്കും നിലവിലെ മുതലാളിത്ത വികസന മാതൃകയ്ക്കും ബദലായി മറ്റൊരു സാമൂഹിക വികസന മാതൃക സാധ്യമാണെന്ന ആശയമായിരുന്നു ഇതിന്റെ അടിസ്ഥാനം.

എന്നാൽ പരമേശ്വരന്റെ ഈ നിലപാട് പരമ്പരാഗത മാർക്സിസ്റ്റ്-ലെനിനിസ്റ്റ് ആശയങ്ങളിൽനിന്നുള്ള വ്യതിചലനമാണെന്ന് സി.പി.എം വിലയിരുത്തി. ‘നാലാംലോക സിദ്ധാന്തം’ പാർട്ടിക്കുള്ളിലും കേരളത്തിലെ ഇടതുപക്ഷ രാഷ്ട്രീയത്തിലും വലിയ സൈദ്ധാന്തിക ചർച്ചകൾക്ക് വഴിവെച്ചു.

ഒടുവിൽ, മാർക്സിസ്റ്റ് വിരുദ്ധ നിലപാട് സ്വീകരിച്ചെന്ന ആരോപണത്തെ തുടർന്ന് 2004ൽ എം.പി. പരമേശ്വരനെ സി.പി.എം പുറത്താക്കി. ഇതോടെ പാർട്ടിയുമായുള്ള അദ്ദേഹത്തിന്റെ 33 വർഷത്തെ ബന്ധത്തിനും അവസാനമായി.

ശാസ്ത്രത്തെ ജനകീയമാക്കുന്നതിലും സാമൂഹിക മാറ്റത്തെക്കുറിച്ചുള്ള പുതിയ ചിന്തകൾ മുന്നോട്ടുവെക്കുന്നതിലും ശ്രദ്ധേയമായ ഇടപെടലുകൾ നടത്തിയ വ്യക്തിയായിരുന്നു എം.പി. പരമേശ്വരൻ.