ന്യൂഡൽഹി:​ഇന്ത്യയിൽ ശക്തമായ നിയമപരിഷ്കാരങ്ങളും ക്ഷേമപദ്ധതികളും നിലവിലുണ്ടെങ്കിലും സ്ത്രീകൾക്കെതിരായ അതിക്രമങ്ങളും സ്ത്രീധന പീഡനങ്ങളും ഇപ്പോഴും തുടരുന്നത് അതീവ ഗൗരവകരമാണെന്ന് സുപ്രീം കോടതി. വിദ്യാഭ്യാസം, സാമ്പത്തിക വളർച്ച, തൊഴിൽ പങ്കാളിത്തം എന്നിവയിൽ രാജ്യം മുന്നേറുമ്പോഴും സ്ത്രീധന പീഡനങ്ങളും ആഭ്യന്തര കലഹങ്ങളും കുറയാത്തത് സമൂഹത്തിൽ ആഴത്തിൽ പതിഞ്ഞുകിടക്കുന്ന പുരുഷാധിപത്യ മനോഭാവത്തിന്റെ തെളിവാണെന്ന് കോടതി നിരീക്ഷിച്ചു.
​ഭാര്യയെ തീക്കൊളുത്തിക്കൊന്ന കേസിൽ ശിക്ഷിക്കപ്പെട്ട പ്രതിയുടെ അപ്പീൽ തള്ളിക്കൊണ്ടാണ് ജസ്റ്റിസ് സഞ്ജയ് കരോൾ, ജസ്റ്റിസ് നോങ്‌മെയ്‌കാപം കോടീശ്വർ സിംഗ് എന്നിവരടങ്ങിയ ബെഞ്ച് ഈ സുപ്രധാന നിരീക്ഷണങ്ങൾ നടത്തിയത്.
​കോടതിയുടെ പ്രധാന നിരീക്ഷണങ്ങൾ:
​വൈരുദ്ധ്യങ്ങൾ നിറഞ്ഞ സാഹചര്യം: സ്ത്രീധനം നിരോധിച്ചിട്ട് പതിറ്റാണ്ടുകളായി. സ്ത്രീകൾക്കായി ഒട്ടനവധി നിയമപരിരക്ഷകളുമുണ്ട്. എന്നിട്ടും ഇത്തരം മർദ്ദനമുറകൾക്ക് ലഭിക്കുന്ന സാമൂഹിക സ്വീകാര്യത ഇപ്പോഴും ഇല്ലാതായിട്ടില്ല എന്നത് ഒരു 'വേദനിപ്പിക്കുന്ന വൈരുദ്ധ്യമാണ്'.
​നിയന്ത്രണം ഇപ്പോഴും പുരുഷന്: ഗ്രാമീണ-നഗര പ്രദേശങ്ങളിലെ കുടുംബങ്ങളിൽ ഇന്നും പുരുഷൻമാർ അമിതമായ നിയന്ത്രണം കൈവശം വെക്കുന്നു. സ്ത്രീകളുടെ ശരീരം, അവരുടെ തിരഞ്ഞെടുപ്പുകൾ, ജീവിതം എന്നിവയ്ക്കുമേൽ ഈ നിയന്ത്രണം എന്തിനാണ് തുടരുന്നതെന്ന് കോടതി ചോദിച്ചു.
​നിയമം കൊണ്ട് മാത്രം മാറ്റമുണ്ടാകില്ല: നിയമപരിഷ്കാരങ്ങൾ കൊണ്ട് മാത്രം സ്ത്രീകൾക്കെതിരായ അതിക്രമങ്ങൾ അവസാനിപ്പിക്കാൻ കഴിയില്ല. പീഡനങ്ങൾക്ക് കാരണമാകുന്ന പുരുഷാധിപത്യ മനോഭാവത്തെ നേരിടണമെങ്കിൽ സമൂഹത്തിന്റെ മനോഭാവത്തിലാണ് മാറ്റം വരേണ്ടതെന്ന് കോടതി വ്യക്തമാക്കി.
​മരണമൊഴിയുടെ അടിസ്ഥാനത്തിൽ പ്രതിയുടെ കൊലക്കുറ്റം ശരിവെച്ചുകൊണ്ടാണ്, സാമൂഹിക മനോഭാവത്തിൽ മാറ്റം വരേണ്ടതിന്റെ അനിവാര്യതയെക്കുറിച്ച് സുപ്രീം കോടതി ശക്തമായ സന്ദേശം നൽകിയത്.