ദോഹ, ഖത്തർ – 2025 സെപ്റ്റംബർ 23

ഖത്തറിലെ ദോഹ ഇൻസ്റ്റിറ്റ്യൂട്ട് ഫോർ ഗ്രാജുവേറ്റ് സ്റ്റഡീസും ദാറുൽ ഹുദാ ഇസ്‍ലാമിക് യൂണിവേഴ്സിറ്റിയും അക്കാദമിക, ഗവേഷണ സഹകരണം ശക്തിപ്പെടുത്തുന്നതിനായി ഒരു ധാരണാപത്രം (MoU) ഒപ്പുവച്ചു. ഇൻഡോ അറബ് സാംസ്കാരിക, ബൗദ്ധിക ബന്ധങ്ങൾ ശക്തിപ്പെടുത്തുന്നതിനും സംയുക്ത വിദ്യാഭ്യാസ, ഗവേഷണ സംരംഭങ്ങൾ മുന്നോട്ടുകൊണ്ടുപോകുന്നതിനും ഈ കരാർ ലക്ഷ്യമിടുന്നു.

സെപ്റ്റംബർ 23 ന് ദോഹയില്‍ നടന്ന ചടങ്ങില്‍  ധാരണാപത്രം ദോഹ ഇൻസ്റ്റിറ്റ്യൂട്ട് ഫോർ ഗ്രാജുവേറ്റ് സ്റ്റഡീസ് പ്രസിഡന്റ് ഡോ. ഡോ.അബ്ദുൽ വഹാബ് അൽ അഫന്തിയും ദാറുൽ ഹുദാ ഇസ്ലാമിക് യൂണിവേഴ്സിറ്റി വൈസ് ചാൻസലർ ഡോ. ബഹാഉദ്ദീൻ മുഹമ്മദ് നദ്‌വിയും ഇരു സ്ഥാപനങ്ങളിൽ നിന്നുള്ള പ്രതിനിധികളുടെ സാന്നിധ്യത്തിൽ ഒപ്പുവച്ചു. അധ്യാപക-വിദ്യാർത്ഥി വിനിമയം, മാനവികശാസ്ത്രം, സാമൂഹിക ശാസ്ത്രം, ഭാഷാശാസ്ത്രം തുടങ്ങിയ മേഖലകളിൽ ഗവേഷണ സഹകരണം എന്നിവ ഈ കരാർ ഉൾക്കൊള്ളുന്നു.

ഇസ്ലാമിക സര്‍വകലാശാലകളുടെ അന്തര്‍ദേശീയ കൂട്ടായ്മകളായ ഫെഡറേഷന്‍ ഓഫ് ദി യൂനിവേഴ്സിറ്റീസ് ഓഫ് ദി ഇസ്ലാമിക് വേള്‍ഡ്, ലീഗ് ഓഫ് ഇസ്ലാമിക് യൂനിവേഴ്സിറ്റീസ് എന്നിവയില്‍ നേരത്തെ തന്നെ ദാറുല്‍ ഹുദാക്ക് അംഗത്വമുണ്ട്. ഇന്റര്‍നാഷനല്‍ ഇസ്ലാമിക് യൂനിവേഴ്സിറ്റി മലേഷ്യ, അല്‍ അസ്‍ഹര്‍ ഈജിപ്ത്, സൈത്തൂന ടുണീഷ്യ, സുല്‍ത്താന്‍ ശരീഫ് അലി ഇസ്‌ലാമിക് യൂനിവേഴ്‌സിറ്റി ബ്രൂണെ, റേട്ടര്‍ഡാം ഇസ്‌ലാമിക് സര്‍വകലാശാല നെതര്‍ലാന്‍ഡ്‌സ്, അൽ ഖറാവിയ്യിൻ യൂണിവേഴ്സിറ്റി മൊറോക്കോ തുടങ്ങിയ നിരവധി രാജ്യാന്തര സര്‍വകലാശാലകളുമായി ദാറുല്‍ഹുദാക്ക് നിലവില്‍ സഹകരണമുണ്ട്.

2015-ൽ ഖത്തറിൽ സ്ഥാപിതമായ ദോഹ ഇൻസ്റ്റിറ്റ്യൂട്ട് ഫോർ ഗ്രാജുവേറ്റ് സ്റ്റഡീസ്, സാമൂഹിക ശാസ്ത്രം, മാനവികത, സാമ്പത്തിക ശാസ്ത്രം, ഭരണം, പൊതുനയം എന്നിവയിൽ എംഎ, പിഎച്ച്ഡി പ്രോഗ്രാമുകൾ വാഗ്ദാനം ചെയ്യുന്ന ഒരു സ്വതന്ത്ര ഉന്നത വിദ്യാഭ്യാസ സ്ഥാപനമാണ്.

ഈ കരാർ ദക്ഷിണേഷ്യയും അറബ് ഗൾഫും തമ്മിലുള്ള അക്കാദമിക ബന്ധങ്ങൾ ശക്തിപ്പെടുത്തുന്നതിനുള്ള ഒരു സുപ്രധാന ചുവടുവയ്പാണ്. ഇരു സ്ഥാപനങ്ങളിലെയും വിദ്യാർത്ഥികൾക്കും അക്കാദമിക് വിദഗ്ധർക്കും പുതിയ അവസരങ്ങൾ തുറക്കാന്‍ ഇത് സഹായകമാകും. നിലവിൽ, ദാറുൽ ഹുദാ ഇസ്‍ലാമിക് യൂണിവേഴ്സിറ്റിയിൽ നിന്നുള്ള അഞ്ച് വിദ്യാർത്ഥികൾ ദോഹ ഇൻസ്റ്റിറ്റ്യൂട്ടിൽ വിവിധ പ്രോഗ്രാമുകളിൽ പഠിക്കുന്നുണ്ട്.