ദോഹ: ദോഹ ഡിസൈൻ ഡിസ്ട്രിക്റ്റ് സംഘടിപ്പിച്ച 'ഓപ്പൺ കോൾ ഫോർ പബ്ലിക് ആർട്ട്' (Open Call for Public Art) മത്സരത്തിലെ നാല് വിജയികളായ പ്രോജക്ടുകൾ പ്രഖ്യാപിച്ചു. ലോകമെമ്പാടുമുള്ള 53 രാജ്യങ്ങളിൽ നിന്നായി ലഭിച്ച 220-ലധികം എൻട്രികളിൽ നിന്നാണ് വിദഗ്ദ്ധ ജൂറിയുടെ വിലയിരുത്തലിനും പൊതുജനങ്ങളുടെ വോട്ടിംഗിനും ശേഷം വിജയികളെ തിരഞ്ഞെടുത്തത്.
​മഷൈറെബ് ദോഹയിലെ (Msheireb Downtown Doha) പൊതു ഇടങ്ങളെ കൂടുതൽ ആകർഷകമാക്കുന്നതിനും കലയെ ദൈനംദിന ജീവിതത്തിന്റെ ഭാഗമാക്കുന്നതിനുമാണ് ഈ മുൻകൈയിലൂടെ ലക്ഷ്യമിടുന്നത്.ഗ്രാവിറ്റി ഡ്രോപ്‌സ് ഓൺ എ ഫ്ലോട്ടിംഗ് സർഫസ് (Gravity Drops on a Floating Surface): ബഹ്‌റൈൻ ആസ്ഥാനമായ 'മരാജ്' ആർക്കിടെക്ചർ സ്റ്റുഡിയോ ഒരുക്കിയ ഈ ഇന്ററാക്ടീവ് ശിൽപ മാതൃക, കാഴ്ചക്കാർക്ക് വെറുമൊരു കാഴ്ചവസ്തുവല്ല; മറിച്ച് തൊട്ടറിഞ്ഞും കളിച്ചും സമയം ചെലവഴിക്കാവുന്ന സജീവമായ ഒരു അനുഭവ ഇടമാണ്.
​ഡെസേർട്ട് മൂവ്‌മെന്റ് (Desert Movement): ഖത്തറിലെ പ്രാദേശിക ഇന്ത്യൻ ആർക്കിടെക്റ്റായ ദാന അനസ് രൂപകൽപ്പന ചെയ്ത ഈ അലങ്കാര ശിൽപം, മരുഭൂമിയിലെ മണൽക്കുന്നുകളുടെ ദ്രുതഗതിയിലുള്ള സ്വാഭാവിക ഒഴുക്കിൽ നിന്നും മനോഹരമായ വക്രരേഖകളിൽ നിന്നും പ്രചോദനമുൾക്കൊണ്ടാണ് നിർമ്മിച്ചിരിക്കുന്നത്.
​വിസ്‌പേഴ്‌സ് ഓഫ് ലീവ്‌സ് (Whispers of Leaves): ഫ്രഞ്ച് കലാകാരൻ ഗില്ലൂം റോസിയറും ഖത്തറി കലാകാരി മറിയം ഫറജ് അൽ-സുവൈദിയും കൈകോർത്തപ്പോൾ പിറന്നത് വേറിട്ടൊരു ശബ്ദ ഇന്ററാക്ടീവ് അനുഭവമാണ്. ധൃതിപിടിച്ച നഗരജീവിതത്തിനിടയിൽ അല്പം സാവധാനത്തിലാകാനും ചുറ്റുപാടുകളുമായി ആഴത്തിൽ സംവദിക്കാനും പ്രകൃതിയുടെ നിശബ്ദ സംഗീതം ആസ്വദിക്കാനും ഈ ശിൽപം വഴിയൊരുക്കുന്നു.
​സ്റ്റുഡിയോ ബു ഡിസൈൻ (Studio Bou Design): ലെബനൻ-ഖത്തർ സർഗ്ഗാത്മക കൂട്ടായ്മയിൽ ഉയർന്നുവന്ന ഈ കൂറ്റൻ കലാസൃഷ്ടി, ഖത്തറിന്റെ ആതിഥ്യമര്യാദയുടെ പ്രതീകമായ പരമ്പരാഗത 'മജ്‌ലിസി'നെ പുനരാവിഷ്കരിക്കുകയാണ്. തൂക്കിയിട്ട മുപ്പതിനായിരത്തോളം അറബിക് കോഫി കപ്പുകൾ കോർത്തിണക്കി ഒരുക്കിയ പന്തൽ മാതൃകയിലുള്ള ഈ ഇൻസ്റ്റലേഷൻ പരമ്പരാഗത അറബ് പൈതൃകത്തിന്റെ വ്യാപ്തി വെളിപ്പെടുത്തുന്ന ഒന്നാണ്.
​തിരഞ്ഞെടുക്കപ്പെട്ട പ്രോജക്റ്റുകൾ ഉടൻ തന്നെ നിർമ്മാണ ഘട്ടത്തിലേക്ക് കടക്കുമെന്നും മഷൈറെബിലെ വിവിധ ഭാഗങ്ങളിലായി ഇവ സ്ഥാപിക്കുമെന്നും ദോഹ ഡിസൈൻ ഡിസ്ട്രിക്റ്റ് ഡയറക്ടർ ദാന കാസിക് അറിയിച്ചു.