ദോഹ: ലോക ക്രിക്കറ്റിന്റെ ഗവേണിംഗ് ബോഡിയായ ഇന്റർനാഷണൽ ക്രിക്കറ്റ് കൗൺസിലിന്റെ (ഐസിസി) നിർണായക ബോർഡ്-കമ്മിറ്റി യോഗങ്ങൾക്ക് ഖത്തർ വേദിയാകുന്നു. മാർച്ച് 25 മുതൽ 27 വരെയാണ് ദോഹയിൽ യോഗങ്ങൾ നടക്കുക. ക്രിക്കറ്റ് ലോകത്തെ ഭാവി കാര്യങ്ങളും ഭരണപരമായ തീരുമാനങ്ങളും ചർച്ച ചെയ്യാനായി ഐസിസി ഡയറക്ടർമാർ, ചീഫ് എക്സിക്യൂട്ടീവുമാർ, മുതിർന്ന ഉദ്യോഗസ്ഥർ തുടങ്ങിയവർ ദോഹയിലെത്തും.
മധ്യപൂർവേഷ്യൻ രാജ്യങ്ങളിൽ ക്രിക്കറ്റിനുള്ള വളരുന്ന പ്രാധാന്യം കണക്കിലെടുത്താണ് ഐസിസി ഈ നീക്കം നടത്തുന്നത്. കഴിഞ്ഞ കുറച്ച് വർഷങ്ങളായി ഖത്തറിൽ ക്രിക്കറ്റ് വലിയ മുന്നേറ്റമാണ് നടത്തുന്നത്.2020-ന് ശേഷം ഖത്തറിൽ ക്രിക്കറ്റ് കളിക്കുന്നവരുടെ എണ്ണത്തിൽ 447 ശതമാനം വർധനവുണ്ടായതായി ഐസിസി വ്യക്തമാക്കി.
ഖത്തർ ഒളിമ്പിക് കമ്മിറ്റിയുടെ സ്കൂൾ ഒളിമ്പിക് പ്രോഗ്രാമിൽ ക്രിക്കറ്റിനെ ഉൾപ്പെടുത്തിയത് ഈ വളർച്ചയ്ക്ക് അടിത്തറയായി.ഐസിസിയുടെ ക്രിക്കറ്റ് പ്രോത്സാഹന പദ്ധതിയിലൂടെ 287 സ്കൂൾ ടീമുകൾ ടൂർണമെന്റുകളിൽ പങ്കെടുത്തു. ഇതിൽ 90 ശതമാനം കുട്ടികളും ആദ്യമായാണ് ക്രിക്കറ്റ് ബാറ്റും പന്തും കയ്യിലെടുക്കുന്നത്.
