ന്യൂയോർക്ക്: ദോഹ ബാങ്കും പ്രമുഖ ആഗോള നിക്ഷേപ സ്ഥാപനമായ കെ.കെ.ആറും (KKR) തമ്മിൽ തന്ത്രപരമായ പങ്കാളിത്തത്തിനായി ധാരണാപത്രത്തിൽ (MoU) ഒപ്പുവെച്ചു. ഖത്തറിലെ യോഗ്യരായ നിക്ഷേപകർക്ക് കെ.കെ.ആറിന്റെ പ്രൈവറ്റ് മാർക്കറ്റ് തന്ത്രങ്ങളിലേക്കും നിക്ഷേപ അവസരങ്ങളിലേക്കും വഴിതുറക്കുന്നതിനാണ് ഈ കരാർ.
ന്യൂയോർക്കിൽ നടന്ന ഖത്തർ ഇക്കണോമിക് ഫോറം യു.എൻ.ജി.എ സ്പെഷ്യൽ എഡിഷൻ ചടങ്ങിൽ ദോഹ ബാങ്ക് ഗ്രൂപ്പ് സി.ഇ.ഒ ഷെയ്ഖ് അബ്ദുൽറഹ്മാൻ ബിൻ ഫഹദ് ബിൻ ഫൈസൽ അൽ താനിയും കെ.കെ.ആർ മിഡിൽ ഈസ്റ്റ് പാർട്ണറും ചെയർമാനുമായ ഡേവിഡ് പെട്രേയസും (David Petraeus) ചേർന്നാണ് കരാറിൽ ഒപ്പുവെച്ചത്.
പ്രൈവറ്റ് ഇക്വിറ്റി, ഇൻഫ്രാസ്ട്രക്ചർ, ക്രെഡിറ്റ്, റിയൽ എസ്റ്റേറ്റ് മേഖലകളിൽ കെ.കെ.ആറിനുള്ള ആഗോള പരിചയസമ്പത്ത് ഖത്തറിലെ ഉപഭോക്താക്കൾക്ക് ലഭ്യമാക്കാൻ ഈ പങ്കാളിത്തത്തിലൂടെ സാധിക്കുമെന്ന് ഷെയ്ഖ് അബ്ദുൽറഹ്മാൻ ബിൻ ഫഹദ് പറഞ്ഞു. ഖത്തർ നാഷണൽ വിഷൻ 2030-ന്റെ ലക്ഷ്യങ്ങൾക്ക് അനുസൃതമായി രാജ്യത്തിന്റെ സാമ്പത്തിക വളർച്ചയ്ക്ക് ഇത് തുണയാകുമെന്നും അദ്ദേഹം കൂട്ടിച്ചേർത്തു.
ഖത്തറിലെ ശക്തമായ സാമ്പത്തിക അടിത്തറയും വളർച്ചയും പ്രശംസനീയമാണെന്നും ദോഹ ബാങ്കുമായുള്ള ഈ സഹകരണം മേഖലയിലെ കെ.കെ.ആറിന്റെ സാന്നിധ്യം കൂടുതൽ ശക്തമാക്കുമെന്നും ഡേവിഡ് പെട്രേയസ് വ്യക്തമാക്കി.
