ദോഹ: District 116 ടോസ്റ്റ്മാസ്റ്റേഴ്സിന്റെ നേതൃത്വത്തിൽ ദോഹയിലെ ലയോള ഇന്റർനാഷണൽ സ്കൂളിൽ സംഘടിപ്പിച്ച “ഡൈനാമിക് ലീഡർഷിപ്പ് സെമിനാറും ഇഫ്താർ മീറ്റും” മികച്ച നേതൃത്വ വളർച്ചക്കും വ്യക്തിഗത ശാക്തീകരണത്തിനും റമദാനിലെ ഐക്യത്വത്തിനും ഒരു വേദിയായിമാറി.
ഡിസ്ട്രിക്റ്റ് ഡയറക്ടർ സബീന എം.കെ, ഡിടിഎം ഔപചാരികമായി സെമിനാറിന്റെ ഉദ്ഘാടനം നിർവഹിച്ചു. നേതൃത്വം വളർത്താനുള്ള ടോസ്റ്റ്മാസ്റ്റേഴ്സ് ദൗത്യം വിശദീകരിക്കുകയും സെഷനുകൾക്ക് നേതൃത്വം നൽകുന്ന വിദഗ്ധർ സദസിന് പരിചയപ്പെടുത്തുകയും ചെയ്‌തത് പ്രോഗ്രാം ക്വാളിറ്റി ഡയറക്ടർ (PQD) അലർമൽ മംഗായി, ഡിടിഎം ആയിരുന്നു.
സെമിനാറിന്റെ ഭാഗമായ വിവിധ സെഷനുകളിൽ പങ്കെടുത്തവർക്കായി പ്രമുഖ ടോസ്റ്റ്മാസ്റ്റേഴ്സ് വിവിധ വിഷയങ്ങളിൽ ആഴമുള്ള വീക്ഷണങ്ങൾ പങ്കുവെച്ചു. “നിങ്ങളിലെ നേതാവിനെ കണ്ടെത്തുക” എന്ന വിഷയത്തിൽ സബീന എം.കെ, ഡിടിഎം, പങ്കെടുത്തവരെ സ്വയം വിശകലനം ചെയ്യാനും സ്വന്തം നേതൃശൈലി തിരിച്ചറിയാനും പ്രേരിപ്പിച്ചു. “ഒരു പദവിയില്ലാതെ നയിക്കുക” എന്ന വിഷയത്തിൽ മൻസൂർ മൊയ്തീൻ, ഡിടിഎം, ഔദ്യോഗിക പദവി ഇല്ലാതെയും ഫലപ്രദമായി നയിക്കാൻ കഴിയുമെന്ന് ശക്തമായ സന്ദേശം നൽകി. “സ്വയം ശാക്തീകരിക്കുക” എന്ന വിഷയത്തിൽ രാജേഷ് വി.സി, ഡിടിഎം, മെന്റർഷിപ്പ് സ്വീകരിക്കാനും ശാക്തീകരണത്തിനുള്ള അവസരങ്ങൾ പ്രയോജനപ്പെടുത്താനുമുള്ള ആഹ്വാനമുയർത്തി. “ടോസ്റ്റ്മാസ്റ്റർമാർക്കപ്പുറം നേതൃത്വം” എന്ന വിഷയത്തിൽ ഡിടിഎം രാഘവൻ മേനോൻ, ജോലിസ്ഥലത്തിലെ ഡെലിഗേഷൻ, നവീകരണം എന്നിവയുടെ പ്രാധാന്യം വിശദീകരിച്ചു. “വിജയകരമായ നേതൃത്വം” എന്ന വിഷയത്തിൽ തയാലൻ കെ, ഡിടിഎം, ടീമുകൾക്ക് ഉന്നത പ്രകടനം നൽകാൻ കഴിയുന്ന തന്ത്രപരമായ സമീപനങ്ങൾ പങ്കുവെച്ചു.
ഡിസ്ട്രിക്റ്റ് ലോജിസ്റ്റിക്സ് മാനേജർ മഷ്ഹൂദ് വി.സി, ഡിടിഎം സ്വാഗതവും ക്ലബ് ഗ്രോത്ത് ഡയറക്ടർ ഷെർവിൻ ഒളിമ്പോ, ഡിടിഎം നന്ദിയും പറഞ്ഞു. അബ്ദുൽ ഹാലിയും ഷബീർ ഹമീദും പരിപാടിയുടെ സമയസംയോജനം കാര്യക്ഷമമായി നിയന്ത്രിച്ചു.
സെമിനാറിനോട് അനുബന്ധിച്ച്, ടോസ്റ്റ്മാസ്റ്റർമാർ ഓപ്പൺ ഗ്രൗണ്ടിൽ നടന്ന മനോഹരമായ ഇഫ്താർ മീറ്റിലും വിഭവസമൃദ്ധമായ ബുഫേ വിരുന്നിലും പങ്കുചേർന്നു.