മുംബൈ: യുവനടിയെ ലൈംഗികമായി പീഡിപ്പിച്ചെന്ന പരാതിയിൽ മുതിർന്ന സംവിധായകൻ ഷക്കീൽ നൂറാനിയെ പൊലീസ് അറസ്റ്റ് ചെയ്തു. 33കാരിയായ നടി നൽകിയ പരാതിയിലാണ് 73കാരനായ സംവിധായകനെതിരെ നടപടി. പുതിയ സിനിമയുടെ ചർച്ചയ്ക്കായി മുംബൈ മൽവാനിയിലെ വീട്ടിലേക്ക് വിളിച്ചുവരുത്തിയ ശേഷമാണ് പീഡിപ്പിച്ചതെന്നാണ് നടിയുടെ ആരോപണം. മയക്കുമരുന്ന് നൽകിയ ശേഷം ലൈംഗികമായി പീഡിപ്പിക്കുകയും പിന്നീട് ഭീഷണിപ്പെടുത്തുകയും ചെയ്തതായും പരാതിയിൽ പറയുന്നു.
സംഭവത്തിൽ കേസെടുത്ത പൊലീസ് ഷക്കീൽ നൂറാനിയെ അറസ്റ്റ് ചെയ്യുകയായിരുന്നു. കോടതിയിൽ ഹാജരാക്കിയ പ്രതിയെ ആഗസ്റ്റ് 12 വരെ പൊലീസ് കസ്റ്റഡിയിൽ വിട്ടു. പരാതിയിൽ ഉന്നയിച്ച ആരോപണങ്ങളിൽ പൊലീസ് അന്വേഷണം തുടരുകയാണ്.
1999ൽ പുറത്തിറങ്ങിയ ‘ബഡേ ദിൽവാലെ’, 2000ലെ ‘ജോരു കാ ഗുലാം’ തുടങ്ങിയ ചിത്രങ്ങളുടെ രചന, നിർമാണം, സംവിധാനം എന്നിവ നിർവഹിച്ചിട്ടുള്ള സംവിധായകനാണ് ഷക്കീൽ നൂറാനി.
