പശ്ചിമേഷ്യയിൽ വീണ്ടും യുദ്ധഭീതി. ഇസ്രയേലും ഇറാനും തമ്മിലുള്ള നേരിട്ടുള്ള സൈനിക ഏറ്റുമുട്ടൽ വലിയ യുദ്ധത്തിലേക്ക് നീങ്ങുന്നു എന്നാണ് റിപ്പോർട്ട്. ഇറാനെ ലക്ഷ്യമിട്ട് ഇസ്രയേൽ നടത്തിയ വലിയ ആക്രമണത്തിന് പിന്നാലെ ഗൾഫ് മേഖലയിൽ ഉൾപ്പെടെ ഇറാൻ പ്രത്യാക്രമണം നടത്തുകയാണ്. ഇതോടെ സ്ഥിതിഗതികൾ അതീവ ഗുരുതരമായി മാറുകയാണ്.

ഇറാനിൽ സ്ഫോടനങ്ങൾ; ഗൾഫിലേക്കും വ്യാപിച്ച സംഘർഷം

ഇസ്രയേൽ ആക്രമണത്തിൽ ടെഹ്റാൻ, കോം, കർമാൻഷാ, കരജ്, ടബ്രിസ് തുടങ്ങിയ നഗരങ്ങളിൽ സ്ഫോടനങ്ങൾ റിപ്പോർട്ട് ചെയ്തു. പരമോന്നത നേതാവ് അയത്തുല്ല ഖമനയിയുടെ ഓഫിസ് സമുച്ചയത്തിന് സമീപം ആദ്യഘട്ട ആക്രമണം നടന്നതായാണ് വിവരം.

ഇറാന്റെ ആണവ പദ്ധതി, ബാലിസ്റ്റിക് മിസൈൽ വികസനം എന്നിവയെ ചൊല്ലിയുള്ള നീണ്ടുനിൽക്കുന്ന തർക്കങ്ങളാണ് പുതിയ ആക്രമണത്തിന് പിന്നിലെന്ന് വിലയിരുത്തൽ. ഇത് ഒറ്റപ്പെട്ട സൈനിക നീക്കമല്ലെന്നും, ഇറാൻ ശക്തമായി തിരിച്ചടിച്ചതോടെ സംഘർഷം ഗൾഫ് മേഖലയിലേക്കും വ്യാപിച്ചതായും റിപ്പോർട്ടുകൾ സൂചിപ്പിക്കുന്നു.

മുൻകരുതൽ ആക്രമണം

ഫെബ്രുവരി 28ന് പകൽ ഇറാനെതിരെ മുൻകരുതൽ ആക്രമണം നടത്തിയതായി ഇസ്രയേൽ പ്രതിരോധ മന്ത്രി വ്യക്തമാക്കി. ഇറാന്റെ മിസൈൽ ശേഷിയും സൈനിക അടിസ്ഥാന സൗകര്യങ്ങളും ആണവ കേന്ദ്രങ്ങളുമാണ് ലക്ഷ്യമെന്നതാണ് ഇസ്രയേലിന്റെ അവകാശവാദം.

യുഎസ് പിന്തുണ സ്ഥിരീകരിച്ചു

ആക്രമണത്തിന് യുഎസ് പിന്തുണ നൽകിയതായി പ്രസിഡന്റ് ഡോണൾഡ് ട്രംപ് സ്ഥിരീകരിച്ചു. ഇത് സംയുക്ത സുരക്ഷാ നീക്കത്തിന്റെ ഭാഗമാണെന്ന റിപ്പോർട്ടുകളും പുറത്തുവന്നിട്ടുണ്ട്. ഇതോടെ പ്രാദേശിക സംഘർഷം വലിയ അന്താരാഷ്ട്ര പ്രതിസന്ധിയിലേക്ക് നീങ്ങുമോ എന്ന ആശങ്ക ശക്തമാകുകയാണ്.

യുഎസ് താവളങ്ങൾ ലക്ഷ്യമിട്ട് ഇറാൻ

ഗൾഫ് മേഖലയിലെ യുഎസ് സൈനിക താവളങ്ങൾ ലക്ഷ്യമാക്കി മിസൈൽ ആക്രമണം നടത്തിയതായി ഇറാൻ അവകാശപ്പെട്ടു. ഖത്തറിലെ അൽ ഉദെയ്ദ് വ്യോമതാവളം പോലുള്ള പ്രധാന കേന്ദ്രങ്ങൾ ഭീഷണിയിലാണെന്ന മുന്നറിയിപ്പുകളും ഉയർന്നു.

ഇസ്രയേലിൽ അടിയന്തരാവസ്ഥ; വ്യോമപാതകൾ അടച്ചു

സംഭവങ്ങൾക്ക് പിന്നാലെ ഇസ്രയേൽ ദേശീയ അടിയന്തരാവസ്ഥ പ്രഖ്യാപിച്ചു. ഇറാനും ഇസ്രയേലും വ്യോമപാതകൾ അടച്ചതോടെ ഖത്തർ, കുവൈത്ത്, യുഎഇ എന്നീ രാജ്യങ്ങളും വ്യോമപാതകൾ അടച്ചു. ഇന്ത്യ ഉൾപ്പെടെ നിരവധി രാജ്യങ്ങൾ മേഖലയിലേക്കുള്ള വിമാന സർവീസുകൾ നിർത്തിവെച്ചു.

വിമാന സർവീസുകൾ റദ്ദാക്കിയ എയർലൈൻസുകൾ

താഴെപ്പറയുന്ന എയർലൈൻസുകൾ സർവീസുകൾ റദ്ദാക്കിയിട്ടുണ്ട്:

• എയർ ഇന്ത്യ
• ഇൻഡിഗോ
• ഖത്തർ എയർവെയ്സ്
• ബ്രിട്ടീഷ് എയർവെയ്സ്
• എയർ ഫ്രാൻസ്
• ഐബീരിയ എക്സ്പ്രസ്
• ജപ്പാൻ എയർലൈൻസ്
• LOT എയർലൈൻസ്
• ലുഫ്താൻസ
• നോർവീജിയൻ എയർ
• ടർക്കിഷ് എയർലൈൻസ്
• വിർജിൻ അറ്റ്ലാന്റിക്
• എയർ അൽജരി
• സ്കാൻഡിനേവിയൻ എയർലൈൻസ്
• വിസ് എയർ

വലിയ യുദ്ധത്തിലേക്കോ?

ഇസ്രയേൽ–യുഎസ്–ഇറാൻ സംഘർഷം ഗൾഫ് രാജ്യങ്ങളെ കൂടി ഉൾപ്പെടുത്തി ഒരു വിശാല യുദ്ധമായി മാറാനുള്ള സാധ്യതയാണ് ഇപ്പോൾ അന്താരാഷ്ട്ര സമൂഹം ആശങ്കയോടെ വിലയിരുത്തുന്നത്.