കൊച്ചി: ശബരിമലയിലെ ‘ആടിയശിഷ്ടം നെയ്യ്’ വിൽപ്പനയിലെ ക്രമക്കേടുകൾ തടയാൻ തിരുവിതാംകൂർ ദേവസ്വം ബോർഡ് ആവിഷ്‌കരിച്ച നടപടികളെ കേരള ഹൈക്കോടതി അഭിനന്ദിച്ചു. സംഭരണ ടാങ്കുകളിലെ നെയ്യിന്റെ അളവ് ശാസ്ത്രീയമായി നിർണയിക്കുക, പാക്കിങ് യന്ത്രങ്ങളിലേക്ക് ഒഴുകുന്ന നെയ്യിന്റെ അളവ് രേഖപ്പെടുത്താൻ ഡിജിറ്റൽ ഫ്ലോ മീറ്ററുകൾ സ്ഥാപിക്കുക, സ്റ്റോക്ക് കണക്കുകൾ കമ്പ്യൂട്ടർവത്കരിക്കുക, ഓരോ ഇടപാടും പ്രത്യേകം രേഖപ്പെടുത്തി നിരീക്ഷിക്കുക എന്നിവയാണ് പ്രധാന നടപടികൾ.
നടപടികൾ ഫലപ്രദമായി നടപ്പാക്കിയാൽ കണക്കുകളിൽ കൃത്രിമം കാണിക്കാനുള്ള സാധ്യത ഗണ്യമായി കുറയുമെന്നും നെയ്യ് വിൽപ്പനയിൽ നിന്നുള്ള വരുമാനം കൃത്യമായി കണക്കിൽ ഉൾപ്പെടുത്തി സംരക്ഷിക്കാനാകുമെന്നും ജസ്റ്റിസ് രാജ വിജയരാഘവൻ വി., ജസ്റ്റിസ് കെ.വി. ജയകുമാർ എന്നിവരടങ്ങിയ ഡിവിഷൻ ബെഞ്ച് നിരീക്ഷിച്ചു. ലഭിച്ച നെയ്യിന്റെ അളവ്, സംഭരിച്ച അളവ്, വിതരണം ചെയ്ത അളവ് എന്നിവ വിൽപ്പന വരുമാനവുമായി ഒത്തുനോക്കാൻ പുതിയ സംവിധാനം സഹായിക്കുമെന്ന് കോടതി ചൂണ്ടിക്കാട്ടി. ശാസ്ത്രീയ അളവെടുപ്പിനുള്ള നടപടികൾ ആരംഭിച്ചതായി ബോർഡ് കോടതിയെ അറിയിച്ചു.
ടിക്കറ്റ് നൽകലും നെയ്യ് വിതരണവും വെവ്വേറെ ജീവനക്കാരെ ഏൽപ്പിക്കാനും ബോർഡ് തീരുമാനിച്ചു. കൗണ്ടറിലെ ജീവനക്കാരുടെ ജോലി സമയം കൃത്യമായി നിശ്ചയിക്കും. ഷിഫ്റ്റ് മാറുന്ന സമയവും ജീവനക്കാർ തമ്മിൽ സ്റ്റോക്ക് കൈമാറുന്നതും രജിസ്റ്ററിൽ രേഖപ്പെടുത്തും. ഓൺലൈൻ ബുക്കിങ്ങും വിതരണവും കൈകാര്യം ചെയ്യുന്ന ജീവനക്കാർക്ക് പ്രത്യേകം ലോഗിൻ നൽകുന്നതിലൂടെ ഓരോ ഇടപാടും ആരാണ് കൈകാര്യം ചെയ്തതെന്ന് തിരിച്ചറിയാനാകും.
വരവ്–ചെലവ് കണക്കുകളും സ്റ്റോക്ക് രജിസ്റ്ററുകളും നിശ്ചിത രീതിയിൽ സൂക്ഷിക്കാനും സ്റ്റോക്ക് ഇടയ്ക്കിടെ നേരിട്ട് പരിശോധിക്കാനും ബോർഡ് തീരുമാനിച്ചിട്ടുണ്ട്. നെയ്യ് നഷ്ടപ്പെട്ടാലോ പാഴായാലോ കേടായാലോ അതിന്റെ അളവ് കണക്കാക്കി രേഖപ്പെടുത്തും. തയ്യാറാക്കൽ മുതൽ സംഭരണം, കണക്കെടുപ്പ്, വിതരണം വരെയുള്ള നടപടികൾ കമ്പ്യൂട്ടർവത്കരിക്കാനും ബോർഡ് പദ്ധതിയിടുന്നു.
നെയ്യ് വിൽപ്പന വരുമാനത്തിൽ ക്രമക്കേട് ചൂണ്ടിക്കാട്ടി ശബരിമല സ്‌പെഷൽ കമ്മിഷണർ സമർപ്പിച്ച റിപ്പോർട്ടിന്റെ അടിസ്ഥാനത്തിൽ ഹൈക്കോടതി സ്വമേധയാ എടുത്ത കേസും കഴിഞ്ഞ മണ്ഡല–മകരവിളക്ക് സീസണിലെ വിൽപ്പന പരിശോധിച്ച സംസ്ഥാന ഓഡിറ്റ് വകുപ്പിന്റെ ഇടക്കാല റിപ്പോർട്ടിനെ തുടർന്നുള്ള ഹർജിയും പരിഗണിക്കവെയാണ് ബെഞ്ചിന്റെ നിരീക്ഷണം.
