നിങ്ങളുടെ വീട്ടുവാതിൽക്കൽ
സൈബർ ഇടങ്ങൾ സുരക്ഷിതമെന്ന് കരുതിയിരിക്കുന്ന ഓരോ വ്യക്തിയുടെയും സ്വൈരജീവിതത്തിലേക്ക് കടന്നുകയറുന്ന ഏറ്റവും ഭീകരമായ ചതിക്കുഴിയാണ് 'ഡിജിറ്റൽ അറസ്റ്റ്'.കഴിഞ്ഞ കുറേ വർഷങ്ങളായി കണ്ടുകൊണ്ടിരിക്കുന്നത്, സാങ്കേതികവിദ്യയുടെ മറവിൽ മനുഷ്യന്റെ ഭയത്തെ ചൂഷണം ചെയ്ത് കോടികൾ കവരുന്ന ക്രൂരമായ കാഴ്ചകളാണ്. ഭാരതീയ നിയമവ്യവസ്ഥയിൽ എവിടെയും ഇല്ലാത്ത ഒന്നാണ് ഡിജിറ്റൽ അറസ്റ്റ് എന്നതെങ്കിലും, നിയമപാലകരുടെ വേഷമണിഞ്ഞെത്തുന്ന തട്ടിപ്പുകാർക്ക് മുന്നിൽ ഉയർന്ന വിദ്യാസമ്പന്നർ പോലും പകച്ചുപോകുന്നു എന്നതാണ് യാഥാർത്ഥ്യം.
സാധാരണയായി ഒരു അജ്ഞാത നമ്പറിൽ നിന്നുള്ള ഫോൺ കോളിലൂടെയോ വാട്ട്സാപ്പ് സന്ദേശത്തിലൂടെയോ ആണ് ഈ കെണിയൊരുങ്ങുന്നത്. മയക്കുമരുന്ന് കടത്ത്, കള്ളപ്പണം വെളുപ്പിക്കൽ അല്ലെങ്കിൽ സൈബർ കുറ്റകൃത്യങ്ങളിൽ നിങ്ങളുടെ പേര് ഉൾപ്പെട്ടിട്ടുണ്ടെന്ന വ്യാജ ആരോപണത്തോടെയാണ് സംഭാഷണം തുടങ്ങുക. നിങ്ങളെ പരിഭ്രാന്തിയുടെ മുനയിൽ നിർത്തിക്കൊണ്ട് ഉടൻ തന്നെ അവർ വീഡിയോ കോളിലേക്ക് മാറും. പോലീസ് യൂണിഫോമും വ്യാജ ബാഡ്ജും ധരിച്ച തട്ടിപ്പുകാർ, യഥാർത്ഥമെന്നു തോന്നിപ്പിക്കുന്ന എഫ്.ഐ.ആർ, അറസ്റ്റ് വാറന്റ്, കോടതി ഉത്തരവുകൾ എന്നിവ ക്യാമറയ്ക്ക് മുന്നിൽ പ്രദർശിപ്പിച്ച് ഇരയുടെ ആത്മവിശ്വാസം പൂർണ്ണമായും തകർക്കുന്നു. 24 മണിക്കൂറും ക്യാമറയ്ക്ക് മുന്നിൽ ഇരിക്കണമെന്നും ആരോടും സംസാരിക്കരുതെന്നും കൽപ്പിക്കപ്പെടുന്നതോടെ ഇര സ്വന്തം വീട്ടിൽ തന്നെ തടവിലാക്കപ്പെടുകയാണ് ചെയ്യുന്നത്.
ഈ തട്ടിപ്പിന്റെ വ്യാപ്തി ഞെട്ടിക്കുന്നതാണ്. ഗുരുഗ്രാമിലെ ഒരു ന്യൂറോളജിസ്റ്റ് ഒരു വാരത്തോളം നിരീക്ഷണത്തിൽ കഴിയുകയും 5.85 കോടി രൂപ നഷ്ടപ്പെടുത്തുകയും ചെയ്തതും, ഡൽഹിയിലെ ദമ്പതികളിൽ നിന്ന് 14 കോടി രൂപ തട്ടിയെടുത്തതും കേവലം ഒറ്റപ്പെട്ട സംഭവങ്ങളല്ല. കർണാടകയിൽ പണം നഷ്ടപ്പെട്ട മാനസിക വിഷമത്തിൽ ജീവനൊടുക്കിയ ദമ്പതികളുടെ വാർത്ത ഈ തട്ടിപ്പ് എത്രത്തോളം വൈകാരിക ആഘാതം സൃഷ്ടിക്കുന്നു എന്നതിന്റെ തെളിവാണ്. 2022 മുതൽ 2025 വരെയുള്ള കണക്കുകൾ പരിശോധിച്ചാൽ 2,580 കോടി രൂപയാണ് ഇത്തരത്തിൽ ഭാരതത്തിൽ നിന്ന് മാത്രം നഷ്ടമായിരിക്കുന്നത്. മ്യാൻമാർ, ലാവോസ്, കംബോഡിയ തുടങ്ങിയ രാജ്യങ്ങളിൽ ഇരുന്ന് പ്രവർത്തിക്കുന്ന ക്രിമിനൽ ശൃംഖലകൾക്ക് ഇന്ത്യൻ യുവാക്കളും ബിരുദധാരികളും സഹായം നൽകുന്നു എന്നത് അന്വേഷണങ്ങളിൽ നിന്ന് വ്യക്തമായ വസ്തുതയാണ്.
ഫൊറൻസിക് പരിശോധനകളിൽ ഈ തട്ടിപ്പുകാർ ഉപയോഗിക്കുന്ന അത്യാധുനിക മാർഗ്ഗങ്ങൾ പലപ്പോഴും വെല്ലുവിളിയാകാറുണ്ട്. മ്യൂൾ അക്കൗണ്ടുകൾ, സ്പൂഫ് ചെയ്ത ഫോൺ നമ്പറുകൾ, ക്രിപ്റ്റോ മിക്സറുകൾ, വിപിഎൻ എന്നിവ ഉപയോഗിച്ച് പണത്തിന്റെ സഞ്ചാരപഥം മറയ്ക്കാൻ അവർക്ക് സാധിക്കുന്നു. എന്നാൽ സാങ്കേതികവിദ്യ എത്ര പുരോഗമിച്ചാലും അവബോധമാണ് ഏറ്റവും വലിയ പ്രതിരോധം. യാതൊരു കാരണവശാലും പോലീസ് നിങ്ങളെ ഫോണിലൂടെയോ വീഡിയോ കോളിലൂടെയോ അറസ്റ്റ് ചെയ്യില്ല എന്ന പ്രാഥമിക അറിവ് എല്ലാവരിലും എത്തേണ്ടതുണ്ട്. അജ്ഞാതരിൽ നിന്നുള്ള ഇത്തരം കോളുകൾ ശ്രദ്ധയിൽപ്പെട്ടാൽ ഒട്ടും വൈകാതെ 1930 എന്ന സൈബർ ക്രൈം ഹെൽപ്പ് ലൈൻ നമ്പറിലോ cybercrime.gov.in എന്ന പോർട്ടലിലോ പരാതി നൽകണം. ബാങ്ക് അക്കൗണ്ടുകൾ ഉടൻ ഫ്രീസ് ചെയ്യുകയും സ്ക്രീൻഷോട്ടുകൾ ഉൾപ്പെടെയുള്ള ഡിജിറ്റൽ തെളിവുകൾ സംരക്ഷിക്കുകയും ചെയ്യുന്നത് അന്വേഷണത്തിന് സഹായകരമാകും.
ബാങ്കുകളും ടെലികോം കമ്പനികളും ഇത്തരം ഇടപാടുകളിൽ ജാഗ്രത പുലർത്തണമെന്നും എഐ സാങ്കേതികവിദ്യ ഉപയോഗിച്ച് സംശയാസ്പദമായ നീക്കങ്ങൾ കണ്ടെത്തണമെന്നുമുള്ള സുപ്രീം കോടതിയുടെയും ചീഫ് ജസ്റ്റിസിന്റെയും നിരീക്ഷണങ്ങൾ നിർണ്ണായകമാണ്. ഇത് കേവലം പണം തട്ടിയെടുക്കലല്ല, മറിച്ച് മനുഷ്യന്റെ സ്വകാര്യതയിലേക്കും മാനസികാവസ്ഥയിലേക്കുമുള്ള കടന്നുകയറ്റമാണ്. ഭയത്തിന് കീഴ്പ്പെടാതെ, നിയമത്തെയും സാങ്കേതികവിദ്യയെയും കുറിച്ച് ബോധവാന്മാരായിരിക്കുക എന്നത് മാത്രമാണ് ഈ ഡിജിറ്റൽ വേട്ടക്കാരെ ചെറുക്കാനുള്ള ഏക വഴി.
