ദോഹ:നിർദ്ധനരായ കുട്ടികളുടെ പുനരധിവാസവും ക്ഷേമ പദ്ധതികളും ലക്ഷ്യമിട്ട് സോഷ്യൽ ആൻഡ് സ്പോർട് കോൺട്രിബ്യൂഷൻ ഫണ്ടും (DAAM) അനാഥ സംരക്ഷണ കേന്ദ്രമായ 'ഡ്രീമ'യും (Dreama) തന്ത്രപ്രധാന ധനസഹായ കരാറിൽ ഒപ്പുവെച്ചു. കുട്ടികളുടെ വളർച്ചയ്ക്കും അവരെ
ശാക്തീകരിക്കുന്നതിനുമായി മൂന്ന് പ്രധാന പദ്ധതികൾക്കാണ് ദാം സാമ്പത്തിക പിന്തുണ നൽകുന്നത്.
സമൂഹത്തിലെ നിർദ്ധനരായ കുട്ടികളുടെ മാനസികവും വിദ്യാഭ്യാസപരവും ജീവനപരവുമായ ആവശ്യങ്ങൾ പൂർത്തീകരിക്കാൻ ഈ സഹകരണം ഏറെ സഹായകരമാകുമെന്ന് ഡ്രീമ എക്സിക്യൂട്ടീവ് ഡയറക്ടർ ശൈഖ നജ്ല ബിൻത് അഹമ്മദ് അൽതാനി പറഞ്ഞു. രാജ്യത്തെ എല്ലാ മേഖലകളെയും സംയോജിപ്പിച്ച് അനാഥ കുട്ടികൾക്ക് മികച്ച ഭാവി ഉറപ്പാക്കുകയാണ് ഇതിലൂടെ ലക്ഷ്യമിടുന്നതെന്ന് ദാം ഷെയർഡ് സർവീസസ് ഡയറക്ടർ യൂസഫ് മുഹമ്മദ് അൽ നുഐമിയും വ്യക്തമാക്കി.
ഖത്തർ നാഷണൽ വിഷൻ 2030-ന്റെ ഭാഗമായി, ഖത്തർ സ്റ്റോക്ക് എക്സ്ചേഞ്ചിൽ രജിസ്റ്റർ ചെയ്തിട്ടുള്ള കമ്പനികളുടെ പങ്കാളിത്തത്തോടെയാണ് ദാം ഇത്തരം സാമൂഹിക വികസന പദ്ധതികൾ നടപ്പിലാക്കുന്നത്. 2010 മുതൽ രാജ്യത്തെ സാംസ്കാരിക, കായിക, ജീവകാരുണ്യ മേഖലകളിൽ ദാം സജീവമായി പ്രവർത്തിച്ചുവരുന്നു.
