തിരുവനന്തപുരം: പോലീസിന്റെ സൗകര്യത്തിനോ പതിവ് ശീലത്തിന്റെ ഭാഗമായോ പ്രതികളുടെ കൈകളിൽ വിലങ്ങിടുന്നത് നിയമവിരുദ്ധമാണെന്ന കർശന മുന്നറിയിപ്പുമായി സംസ്ഥാന പോലീസ് മേധാവി ഡി.ജി.പി റവാഡ ചന്ദ്രശേഖർ രംഗത്ത്. ആരെയും ശിക്ഷിക്കാനോ, ഭയപ്പെടുത്താനോ, പൊതുസമൂഹത്തിൽ അവഹേളിച്ച് അപമാനിക്കാനോ വേണ്ടി കൈവിലങ്ങ് ഉപയോഗിക്കരുതെന്ന് പോലീസ് ഉദ്യോഗസ്ഥർക്ക് അദ്ദേഹം വ്യക്തമായ നിർദേശം നൽകി.
അറസ്റ്റ് ചെയ്യുന്ന ഘട്ടത്തിലും പ്രതികളെ കോടതിയിൽ ഹാജരാക്കാൻ കൊണ്ടുപോകുമ്പോഴും കൈവിലങ്ങ് അണിയിച്ച് പൊതുസ്ഥലങ്ങളിൽ പരേഡ് ചെയ്യിക്കുന്നതും മാധ്യമങ്ങൾക്ക് മുന്നിൽ പ്രദർശിപ്പിക്കുന്നതും പൂർണ്ണമായി വിലക്കി. ഭരണഘടന ഉറപ്പുനൽകുന്ന വ്യക്തിസ്വാതന്ത്ര്യവും വ്യക്തിത്വത്തിന്റെ അന്തസ്സും കാത്തുസൂക്ഷിച്ചുകൊണ്ട് വേണം പോലീസിന്റെ ഏതൊരു നടപടിയുമെന്നും, ഇല്ലാത്തപക്ഷം അത് അധികാരദുർവിനിയോഗമായി കണക്കാക്കി ബന്ധപ്പെട്ട ഉദ്യോഗസ്ഥർക്കെതിരെ ദയാദാക്ഷിണ്യമില്ലാതെ നടപടിയെടുക്കുമെന്നും ഡി.ജി.പി പുറപ്പെടുവിച്ച സർക്കുലറിൽ ഓർമ്മിപ്പിക്കുന്നു.
ഭാരതീയ നാഗരിക് സുരക്ഷാ സംഹിത (BNSS) - സെക്ഷൻ 43(3)
പുതിയ ക്രിമിനൽ നിയമമായ ഭാരതീയ നാഗരിക് സുരക്ഷാ സംഹിത (BNSS), 2023-ലെ സെക്ഷൻ 43(3) പ്രകാരം പ്രതികളെ കൈവിലങ്ങണിയിക്കുന്നതിൽ വ്യക്തമായ നിയമനിർമ്മാണം നിലവിലുണ്ട്. ഈ വകുപ്പ് അനുസരിച്ച് ഏതൊരാളെയും അറസ്റ്റ് ചെയ്യുമ്പോൾ തന്നിഷ്ടപ്രകാരം വിലങ്ങിടാൻ പോലീസിന് അവകാശമില്ല. കുറ്റകൃത്യത്തിന്റെ സ്വഭാവവും ഗൗരവവും കണക്കിലെടുത്ത് കൃത്യമായ 13 വിഭാഗങ്ങളിൽപ്പെടുന്ന പ്രതികളെ മാത്രമേ വിലങ്ങണിയിക്കാൻ നിയമം അനുവദിക്കുന്നുള്ളൂ:
- സ്ഥിരം കുറ്റവാളികൾ
- കസ്റ്റഡിയിൽ നിന്നോ ജയിലിൽ നിന്നോ ചാടിപ്പോയവർ അല്ലെങ്കിൽ തടവുചാടാൻ സാധ്യതയുള്ളവർ
- സംഘടിത കുറ്റകൃത്യങ്ങളിൽ ഏർപ്പെട്ടവർ
- തീവ്രവാദ പ്രവർത്തനങ്ങളിൽ പങ്കാളികളായവർ
- ഭരണകൂടത്തിനെതിരെയോ രാജ്യസുരക്ഷയ്‌ക്കെതിരെയോ കുറ്റകൃത്യങ്ങൾ ചെയ്തവർ
- മയക്കുമരുന്ന് / ലഹരിമരുന്ന് (NDPS) കേസുകളിലെ പ്രതികൾ
- അനധികൃത ആയുധക്കേസുകളിൽ ഉൾപ്പെട്ടവർ
- കൊലപാതകക്കേസ് പ്രതികൾ
- ബലാത്സംഗം ഉൾപ്പെടെയുള്ള ഗുരുതര ലൈംഗിക കുറ്റകൃത്യങ്ങൾ ചെയ്തവർ
- ആസിഡാക്രമണം നടത്തിയവർ
- കള്ളനോട്ട് നിർമ്മാണവും വിതരണവുമായി ബന്ധപ്പെട്ട കേസ് പ്രതികൾ
- മനുഷ്യക്കടത്ത് നടത്തുന്നവർ
- പോക്സോ കേസുകളിലെ പ്രതികൾ
മറ്റു പ്രതികളുടെ കാര്യത്തിലെ വ്യവസ്ഥകൾ
മുകളിൽ പറഞ്ഞ 13 വിഭാഗങ്ങളിൽപ്പെടാത്ത പ്രതികളെ സാധാരണ നിലയിൽ കൈവിലങ്ങണിയിക്കാൻ പാടില്ല. എന്നാൽ പ്രതി അക്രമാസക്തമായ പെരുമാറ്റം കാട്ടുകയോ, കസ്റ്റഡിയിൽ നിന്ന് രക്ഷപ്പെടാൻ ശ്രമിക്കുകയോ, പോലീസിന്റേയോ ജനങ്ങളുടെയോ ജീവന് സുരക്ഷാഭീഷണി ഉയർത്തുകയോ ചെയ്യുന്ന അടിയന്തര സാഹചര്യങ്ങളിൽ മാത്രമേ ഇതിന് ഇളവുള്ളൂ.
അത്തരം സാഹചര്യങ്ങളിൽ പോലും കൈവിലങ്ങണിയിക്കാനുള്ള കാരണം വ്യക്തമായി ജനറൽ ഡയറിയിലും (GD) കസ്റ്റഡി രജിസ്റ്ററിലും ഉദ്യോഗസ്ഥർ രേഖപ്പെടുത്തേണ്ടതുണ്ട്. പ്രതിയെ കോടതിയിൽ ഹാജരാക്കുമ്പോൾ എന്തുകൊണ്ട് വിലങ്ങിടേണ്ടി വന്നു എന്ന് രേഖാമൂലം മജിസ്ട്രേറ്റിനെ ബോധ്യപ്പെടുത്തുകയും വേണം.
പ്രായമായവർക്കും രോഗികൾക്കും പ്രത്യേക പരിഗണന
സുരക്ഷാഭീഷണി ഇല്ലാത്ത സാഹചര്യങ്ങളിൽ വയോധികർ, ഗുരുതര രോഗികൾ, ഭിന്നശേഷിക്കാർ എന്നിവരെ യാതൊരു കാരണവശാലും കൈവിലങ്ങണിയിക്കരുത്. ദീർഘനേരത്തേക്ക് വിലങ്ങണിയിച്ചു നിർത്താനോ, ശരീരത്തിന് വേദനാജനകവും പരിക്കുണ്ടാക്കുന്നതുമായ രീതിയിൽ മൃഗീയമായി വിലങ്ങ് ഉപയോഗിക്കാനോ പാടില്ല.
അറസ്റ്റ് വേളയിലും കോടതിനടപടികളിലും പോലീസ് സേനയ്ക്കുള്ളിൽ നിലനിൽക്കുന്ന ആശയക്കുഴപ്പങ്ങൾ പരിഹരിക്കാനും മനുഷ്യവാകാശ സംരക്ഷണം ഉറപ്പുവരുത്താനുമാണ് സർക്കുലർ ഇറക്കിയതെന്ന് പോലീസ് ആസ്ഥാനത്തുനിന്നും അറിയിച്ചു. ജില്ലാ പോലീസ് മേധാവിമാർ ഈ നിർദേശങ്ങൾ എല്ലാ പോലീസ് സ്റ്റേഷനുകളിലും ഉദ്യോഗസ്ഥരുടെ ശ്രദ്ധയിൽപ്പെടുത്തണമെന്നും നിർദേശങ്ങൾ പാലിക്കപ്പെടുന്നുണ്ടെന്ന് ഉറപ്പുവരുത്തണമെന്നും ഡി.ജി.പി നിർദേശിച്ചിട്ടുണ്ട്.
