ദോഹ: വികസന പ്രക്രിയകളിൽ സ്വകാര്യ മേഖലയുടെ ഫണ്ടിങ് പങ്കാളിത്തം ഉറപ്പുവരുത്തുന്നത് സംബന്ധിച്ച് ലോക നിക്ഷേപ ഫോറത്തിൽ (World Investment Forum) അന്താരാഷ്ട്ര സഹകരണ സഹമന്ത്രി ഡോ. മറിയം ബിന്ത് അലി ബിൻ നാസർ അൽ മിസ്നദിന്റെ അധ്യക്ഷതയിൽ പാനൽ ചർച്ച സംഘടിപ്പിച്ചു. ദോഹയിൽ നടക്കുന്ന വേൾഡ് ഇൻവെസ്റ്റ്‌മെന്റ് ഫോറത്തിന്റെ ഭാഗമായാണ് പാനൽ ചർച്ച നടന്നത്.
സുസ്ഥിര വികസന ലക്ഷ്യങ്ങൾ (SDGs) കൈവരിക്കുന്നതിനുള്ള സാമ്പത്തിക വിടവ് പ്രതിവർഷം 4 ട്രില്യൺ ഡോളറായി ഉയർന്ന സാഹചര്യത്തിൽ, പരമ്പരാഗത സർക്കാർ സഹായങ്ങളിൽ മാത്രം ഒതുങ്ങിനിൽക്കാതെ സ്വകാര്യ മൂലധനം കാര്യക്ഷമമായി സമാഹരിക്കേണ്ടത് അത്യാവശ്യമാണെന്ന് ഡോ. മറിയം അൽ മിസ്നദ് വ്യക്തമാക്കി.
വികസന സഹകരണം, നിക്ഷേപം, നയതന്ത്രം എന്നിവ സമന്വയിപ്പിച്ചുള്ള ഖത്തറിന്റെ ആഗോള മാതൃകയും അവർ ചൂണ്ടിക്കാട്ടി. നിക്ഷേപങ്ങൾക്ക് വഴിയൊരുക്കുന്ന വ്യക്തമായ ലക്ഷ്യങ്ങൾ നിർണ്ണയിക്കുക, നിക്ഷേപസജ്ജമായ പദ്ധതികൾ വികസിപ്പിക്കുക, സംഘർഷബാധിത പ്രദേശങ്ങൾക്കായി പ്രത്യേക സാമ്പത്തിക സഹായ മാതൃകകൾ തയാറാക്കുക എന്നീ മൂന്ന് പ്രായോഗിക നിർദ്ദേശങ്ങളും മന്ത്രി മുന്നോട്ടുവെച്ചു.
സമാധാനവും സുസ്ഥിരതയുമാണ് നിക്ഷേപങ്ങളെ ആകർഷിക്കുന്ന പ്രധാന ഘടകങ്ങളെന്നും, സമാധാനശ്രമങ്ങളെയും സുസ്ഥിര വികസനത്തെയും കൂട്ടിയോജിപ്പിക്കുന്നതിൽ സാമ്പത്തിക നയതന്ത്രത്തിന് വലിയ പങ്കുണ്ടെന്നും ഖത്തറിന്റെ മധ്യസ്ഥത അനുഭവങ്ങൾ മുൻനിർത്തി മന്ത്രി വ്യക്തമാക്കി. അന്താരാഷ്ട്ര വികസനത്തിൽ ഉത്തരവാദിത്തമുള്ള പങ്കാളിയായി ഖത്തർ തുടരുമെന്നും അവർ കൂട്ടിച്ചേർത്തു.
