തിരുവനന്തപുരം: സംസ്ഥാനത്തെ വിവിധ ദേവസ്വം ബോർഡുകളുടെ അധീനതയിലുള്ള ഭൂമി വ്യാപകമായി കൈയേറ്റത്തിനും അന്യാധീനപ്പെടുത്തലിനും ഇരയായതായി ഓഡിറ്റ് വകുപ്പിന്റെ കണ്ടെത്തൽ. കൃത്യമായ രേഖകളുടെ അഭാവവും കർശന നടപടികളുടെ കുറവും മൂലം ഇതുവരെ ഏകദേശം 31,000 ഏക്കറിലധികം ഭൂമിയാണ് ക്ഷേത്രങ്ങൾക്ക് നഷ്ടമായിട്ടുള്ളത്.
സംസ്ഥാന ഓഡിറ്റ് വകുപ്പിലെ ദേവസ്വം ഓഡിറ്റ് വിഭാഗം നടത്തിയ പരിശോധനയിലാണ് ഞെട്ടിക്കുന്ന ഈ കണക്കുകൾ പുറത്തുവന്നത്.
പ്രധാന ബോർഡുകളിലെ നഷ്ടത്തിന്റെ കണക്കുകൾ:
മലബാർ ദേവസ്വം ബോർഡ്: 24,693.22 ഏക്കർ ഭൂമി നഷ്ടപ്പെട്ടു. (കോഴിക്കോട് ഡിവിഷനിൽ മാത്രം 22,393.12 ഏക്കറും, മലപ്പുറത്ത് 9,560 ഏക്കറും, തലശേരിയിൽ 2,122.69 ഏക്കറും നഷ്ടമായി). ബോർഡിന്റെ കീഴിലുള്ള 1,341 ക്ഷേത്രങ്ങളുടെ ഭൂമിയാണ് ഇത്തരത്തിൽ നഷ്ടപ്പെട്ടത്. നിലവിൽ ആകെ 3,112.20 ഏക്കർ മാത്രമാണ് കൈവശമുള്ളത്. ഇതിൽ തിരിച്ചുപിടിക്കാൻ കഴിഞ്ഞത് വെറും 3.31 ഏക്കർ മാത്രമാണ്. കർശന നടപടികളുടെ അഭാവം കാരണം തളിപ്പറമ്പ് രാജരാജേശ്വര ക്ഷേത്ര ഭൂമിയിൽ ചെങ്കൽ ഖനനം പോലും നടക്കുന്നുണ്ട്.
കൂടൽമാണിക്യം ദേവസ്വം: 5,568.99 ഏക്കറോളം ഭൂമി നഷ്ടപ്പെടുകയോ കൈമാറ്റം ചെയ്യപ്പെടുകയോ ചെയ്തിട്ടുണ്ട്.
തിരുവിതാംകൂർ ദേവസ്വം ബോർഡ്: 494 ഏക്കറോളം ഭൂമി നഷ്ടപ്പെട്ടു.
കൊച്ചിൻ ദേവസ്വം ബോർഡ്: തൃശൂർ, എറണാകുളം, പാലക്കാട് ജില്ലകളിലായി 30.195 ഏക്കർ ഭൂമി കൈയേറ്റത്തിലാണ്. ഇതിൽ 8.25 ഏക്കർ മാത്രമാണ് ഇതുവരെ തിരിച്ചുപിടിക്കാൻ കഴിഞ്ഞത് (ബോർഡിന് കീഴിൽ ആകെ 48 കേസുകളുണ്ട്. എറണാകുളത്തപ്പൻ ഗ്രൗണ്ടിന്റെ ഉടമസ്ഥാവകാശം കൊച്ചിൻ ദേവസ്വം ബോർഡിനാണെന്ന് സുപ്രീംകോടതി അടുത്തിടെ ഉത്തരവിട്ടിരുന്നു).
ഗുരുവായൂർ ദേവസ്വം: തൃശൂർ ജില്ലയിൽ ഒരു ഏക്കറിലധികം ഭൂമി അന്യാധീനപ്പെട്ട് കിടക്കുന്നു.
പ്രതിസന്ധികളും പോംവഴികളും
ഭൂപരിഷ്കരണ നിയമങ്ങൾ നിലവിൽ വന്ന കാലയളവിലും പല ക്ഷേത്രങ്ങളുടെയും ഭൂമി കൈവിട്ടുപോയിട്ടുണ്ട്. ഭൂമി കൈവശം വച്ചിരുന്നവരിൽ പലരും പിന്നീട് പട്ടയം നേടിയതും പ്രതിസന്ധിയായി. പലതിലും കൃത്യമായ രേഖകൾ നഷ്ടപ്പെട്ടതും ഒന്നിലധികം വകുപ്പുകളുമായി ബന്ധപ്പെട്ട വിഷയമായതും വലിയ ആശയക്കുഴപ്പമാണ് സൃഷ്ടിക്കുന്നത്.
എന്നാൽ, ഈ പ്രശ്നങ്ങൾക്ക് പരിഹാരമായി ഡിജിറ്റൽ സർവേ നടപ്പാക്കാനാണ് സർക്കാർ ഒരുങ്ങുന്നത്. ഡിജിറ്റൽ സർവേ പൂർത്തിയാകുന്നതോടെ ക്ഷേത്രഭൂമിയിലെ കൈയേറ്റങ്ങൾ ഒഴിപ്പിക്കാനാകുമെന്നും, നിലവിലുള്ള ആസ്തികൾ പൂർണ്ണമായി ഡിജിറ്റലൈസ് ചെയ്ത് സംരക്ഷിക്കുമെന്നും ദേവസ്വം (റവന്യൂ) സെക്രട്ടറി എം.ജി. രാജമാണിക്യം വ്യക്തമാക്കി.
