കീവ്: യുക്രൈൻ - റഷ്യ യുദ്ധത്തിന് ഉടൻ വിരാമമാകുമെന്ന സുചനയുമായി യുക്രൈൻ പ്രസിഡന്റ് വ്ലാഡ്മിർ സെലൻസ്കി. റഷ്യയുമായുള്ള യുദ്ധം അവസാനിപ്പിക്കാൻ സാധ്യമായതെല്ലാം ചെയ്യുമെന്നാണ് സെലൻസ്കി വ്യക്തമാക്കുന്നത്. യുക്രൈൻ-യുകെ നയതന്ത്രജ്ഞർ തമ്മിൽ നടന്ന ചർച്ചയിലും മേഖലയിൽ എത്രയും പെട്ടെന്ന് സമാധാനം പുനസ്ഥാപിക്കണമെന്ന തീരുമാനമാണെടുത്തത്. അതിനുള്ള നടപടികൾ ഉടൻതന്നെ ഒരുമിച്ച് കൈക്കൊള്ളണമെന്നും ധാരണയായി.
'കീവിൽവെച്ച് വളരെ ഫലപ്രദമായ ഒരു കൂടിക്കാഴ്ചയാണ് നടന്നത്. സമാധാനത്തിലേക്ക് നമ്മെ അടുപ്പിക്കാനും നയതന്ത്ര ശ്രമങ്ങൾ വേഗത്തിലാക്കാനുമുള്ള നടപടികളെ കുറിച്ച് ചർച്ച ചെയ്തു. ഈ പിന്തുണയ്ക്ക് നന്ദിയുണ്ട്. സമാധാനത്തോടെ ഈ യുദ്ധം അവസാനിപ്പിക്കാൻ വേണ്ടതെല്ലാം ചെയ്യാൻ യുക്രൈൻ നിശ്ചയദാർഢ്യം ചെയ്തിരിക്കുന്നു' - സെലൻസ്കി പറഞ്ഞു. യുദ്ധം അവസാനിപ്പിക്കുന്നതിനായി സൗദി അറേബ്യയിൽ അമേരിക്കൻ ഉദ്യോഗസ്ഥരുമായി യുക്രൈൻ പ്രതിനിധികൾ ചർച്ച നടത്താനിരിക്കെയാണ് സെലൻസ്കിയുടെ പ്രസ്താവന വന്നിരിക്കുന്നത് എന്നതും ശ്രദ്ധേയമാണ്.
