ഖാർത്തൂം: 2023 മുതൽ തുടരുന്ന സുഡാനിലെ ആഭ്യന്തരയുദ്ധം മനുഷ്യാവകാശ ചരിത്രത്തിലെ മറ്റൊരു കറുത്ത അധ്യായമായി മാറുകയാണ്. വടക്കൻ ഡാർഫർ പ്രവിശ്യയിലെ തലസ്ഥാനമായ എൽ ഫാഷർ നഗരവും ഇപ്പോൾ റാപ്പിഡ് സപ്പോർട്ട് ഫോഴ്‌സ് (RSF) എന്ന അർധസൈനിക വിഭാഗത്തിന്റെ പൂർണ്ണനിയന്ത്രണത്തിലായതോടെ സുഡാൻ സൈന്യത്തിന് രാജ്യത്തിനുള്ളിൽ സാന്നിധ്യം നഷ്ടമായിരിക്കുന്നു.

2023 ഏപ്രിൽ 15-നാണ് സുഡാനിൽ ആഭ്യന്തര യുദ്ധം ആരംഭിച്ചത്. സുഡാൻ സൈനിക മേധാവി ജനറൽ അബ്ദേൽ ഫത്താ അൽ ബുർഹാനും ആർഎസ്എഫ് തലവൻ മുഹമ്മദ് ഹംദാൻ ഡഗാളോ (ഹെമേദ്തി) യും തമ്മിലുള്ള അധികാരവടംവലിയെ തുടർന്നാണ് സൈനിക നടപടികൾ തുടങ്ങിയത്. അന്നുമുതൽ ആഭ്യന്തരയുദ്ധം സുഡാനെ തകർത്തു, നഗരങ്ങൾ നശിച്ചു, ജനങ്ങൾ അഭയാർഥികളായി.

യുദ്ധത്തിന്റെ മൂന്നാം വർഷത്തിലേക്ക് കടക്കുമ്പോൾ 1.5 ലക്ഷം ആളുകളെങ്കിലും കൊല്ലപ്പെട്ടിട്ടുണ്ട് എന്നാണ് റിപ്പോർട്ട്. അതിനുപുറമേ പട്ടിണിയാലും പോഷകാഹാരക്കുറവിനാലും 5.22 ലക്ഷം പേർ മരിച്ചു. അതിൽ ഭൂരിഭാഗവും കുട്ടികളാണെന്നും റിപ്പോർട്ടുകൾ സൂചിപ്പിക്കുന്നു.

എൽ ഫാഷറിൽ കൂട്ടക്കൊല

ഒക്ടോബർ 29-ന് എൽ ഫാഷർ ആശുപത്രിയിൽ നടന്ന കൂട്ടക്കൊല ലോകമനസ്സാക്ഷിയെ നടുക്കി. യുഎൻഎഫ്പിഎയുടെ റിപ്പോർട്ട് പ്രകാരം കുറഞ്ഞത് 460 പേരെങ്കിലും കൊല്ലപ്പെട്ടു, എന്നാൽ യഥാർത്ഥ മരണസംഖ്യ ഇതിലും കൂടുതലായിരിക്കാമെന്ന് സംശയിക്കുന്നു. കൊല്ലപ്പെട്ടവരിൽ രോഗികൾ, സന്ദർശകർ, അഭയാർഥികൾ, ആരോഗ്യപ്രവർത്തകർ എന്നിവരും ഉൾപ്പെടുന്നു. അന്താരാഷ്ട്ര മാധ്യമങ്ങളായ അൽ ജസീറയും ബിബിസിയും പുറത്തുവിട്ട ദൃശ്യങ്ങളിൽ തെരുവുകളിൽ മൃതശരീരങ്ങളുടെ കൂമ്പാരം, പൊളിഞ്ഞ കെട്ടിടങ്ങൾ, ആശുപത്രികളിൽ നിന്നും ഒഴിഞ്ഞുപോകുന്ന മെഡിക്കൽ സ്റ്റാഫ് എന്നിവയെല്ലാം വ്യക്തമായി കാണാം.

ഒരു 19 കാരിയായ യുവതി “കന്യകയാണോ എന്ന് ചോദിച്ച് പട്ടാളക്കാർ തന്നെ ബലാത്സംഗം ചെയ്തു” എന്ന് വെളിപ്പെടുത്തി. യുദ്ധത്തിന്റെ നരകമുഖം ആ വാക്കുകളിൽ പ്രതിഫലിക്കുന്നു.

ആർഎസ്എഫിന്റെ നിയന്ത്രണത്തിലെ ഡാർഫർ

ഡാർഫറിലെ പ്രധാന പട്ടണമായ എൽ ഫാഷറിനെ പൂർണ്ണമായി കീഴടക്കിയതോടെ ആർഎസ്എഫ് ഇപ്പോൾ ഡാർഫർ മുഴുവനും നിയന്ത്രിക്കുന്നു. സുഡാൻ സൈന്യത്തിന്റെ ആറാം ഡിവിഷൻ ആസ്ഥാനം, 157-ാം ആർട്ടിലറി ബ്രിഗേഡ് ഉൾപ്പെടെ പ്രധാന സൈനിക കേന്ദ്രങ്ങൾ എല്ലാം പിടിച്ചെടുത്തിട്ടുണ്ട്. റദാജ ഒലൈ എന്ന അഭയകേന്ദ്രത്തിൽ അഭയം തേടിയവരിൽ പലരെയും വെടിവെച്ച് കൊന്നതായി റിപ്പോർട്ടുകൾ പറയുന്നു. സെപ്റ്റംബറിൽ നടന്ന മറ്റൊരു ആക്രമണത്തിൽ 78 പേർ കൊല്ലപ്പെട്ടിരുന്നു.

വാർത്തകൾ നിഷേധിച്ച് ആർഎസ്എഫ് 

എൽ ഫാഷർ ആശുപത്രിയിലെ കൂട്ടക്കൊലയെ ആർഎസ്എഫ് നിഷേധിച്ചു. അവരുടെ പ്രസ്താവനപ്രകാരം, “നേതൃത്വത്തിന്റെ നിർദേശപ്രകാരമല്ലാതെ അതിക്രമം നടത്തിയ ചിലരെ അറസ്റ്റു ചെയ്തിട്ടുണ്ട്.” എന്നാൽ യു.എൻ നിരീക്ഷകരും എൻജിഒകളും പറയുന്നത് അതിനോട് വിരുദ്ധമാണ് — ആർഎസ്എഫ് ക്രമാതീതമായ ആക്രമണങ്ങൾ, വംശീയ കൊലപാതകങ്ങൾ, ലൈംഗികാതിക്രമങ്ങൾ നടത്തുന്നതായി വ്യക്തമായ തെളിവുകളുണ്ടെന്ന് അവർ ചൂണ്ടിക്കാട്ടുന്നു.

അന്താരാഷ്ട്ര പ്രതിഷേധവും വെടിനിർത്തൽ ആവശ്യം

സുഡാനിലെ മനുഷ്യാവകാശനിലവാരം തകർന്ന് പോകുന്നതിനെതിരെ ജർമനി, ജോർദാൻ, ബ്രിട്ടൻ അടക്കമുള്ള രാജ്യങ്ങൾ അടിയന്തര വെടിനിർത്തൽ ആവശ്യപ്പെട്ടു. ബഹ്‌റൈനിലെ മനാമ സുരക്ഷാ ഉച്ചകോടിയിൽ, ഗാസയിലെ മാനുഷികപ്രതിസന്ധിയിലേക്കുള്ള ഇടപെടലുകൾ പോലെ സുഡാനിലും അന്താരാഷ്ട്ര ഇടപെടൽ ആവശ്യമാണ് എന്ന് പ്രതിനിധികൾ അഭിപ്രായപ്പെട്ടു. എന്നാൽ യു.എൻ ആവശ്യപ്പെടുന്ന മാനുഷിക പാതകൾ ഇപ്പോഴും തുറന്നിട്ടില്ല. ആയുധധാരികൾ അഭയാർഥി ക്യാമ്പുകൾക്കും ആശുപത്രികൾക്കും നേരെ ആക്രമണം തുടരുന്നു.

സ്വർണത്തിന്റെ രക്തവില

സുഡാൻ ആഫ്രിക്കയിലെ മൂന്നാമത്തെ വലിയ സ്വർണ ഉത്പാദക രാജ്യമാണ്. യുദ്ധത്തിന്റെ പിന്നാമ്പുറത്തിൽ സ്വർണമാണ് പ്രധാന സാമ്പത്തിക ആയുധം. സ്വർണഖനികളിലേറെയും ആർഎസ്എഫിന്റെ നിയന്ത്രണത്തിലാണുള്ളത്, അവിടെനിന്ന് വിദേശരാജ്യങ്ങളിലേക്ക് നടത്തുന്ന സ്വർണക്കടത്ത് വഴിയാണ് ആർഎസ്എഫ് ആയുധങ്ങൾ സമ്പാദിക്കുന്നത്. ഈ സാമ്പത്തിക ഉറവിടം യുദ്ധത്തെ തുടരാനുള്ള ധനസ്രോതസായി പ്രവർത്തിക്കുന്നു — ഇതുമൂലം സംഘർഷം അവസാനിക്കാനുള്ള സാധ്യതകൾ അതിവിദൂരമാണെന്ന് അന്താരാഷ്ട്ര നിരീക്ഷകർ ചൂണ്ടിക്കാട്ടുന്നു.

സുഡാൻ: നിരന്തര കലാപത്തിന്റെ നാട്

1956-ൽ ബ്രിട്ടീഷ് ഭരണത്തിൽനിന്ന് സ്വാതന്ത്ര്യം നേടിയതുമുതൽ 20 പട്ടാള അട്ടിമറികൾക്കാണ് സുഡാൻ സാക്ഷിയായത്. പട്ടിണി, ദാരിദ്ര്യം, ആഭ്യന്തരകലാപം എന്നിവ ഈ രാജ്യത്തിന്റെ നിത്യസംഭവങ്ങളാണ്. യുദ്ധം അവസാനിച്ചാലും ജനജീവിതം പുനർസ്ഥാപിക്കാനുള്ള പ്രതീക്ഷ വളരെ അകലെയാണ്. ആശുപത്രികൾ തകർന്നുകിടക്കുന്നു, വിദ്യാഭ്യാസം താളം തെറ്റി, ഒരു തലമുറ മുഴുവൻ പട്ടിണിയിലേക്കാണ് നീങ്ങുന്നത്.