കാഠ്മണ്ഡു: ഇടക്കാല സർക്കാർ പാർലമെന്റ് തെരഞ്ഞെടുപ്പ് പ്രഖ്യാപിച്ചതിന് പിന്നാലെ നേപ്പാളിൽ രാജഭരണം പുനസ്ഥാപിക്കണമെന്ന ആവശ്യം ശക്തമാകുന്നു. തെരഞ്ഞെടുപ്പിനുമുമ്പ് രാജഭരണ വാദം വീണ്ടും ഉയർത്തി നേപ്പാളിൽ ഷാ രാജവംശത്തിന്റെ അനുയായികൾ രം​ഗത്തെത്തി. അധികാരത്തിൽ നിന്നും പുറത്താക്കപ്പെട്ട ഷാ രാജവംശത്തിന്റെ അനുയായികൾ കാഠ്മണ്ഡുവിൽ പ്രതിഷേധറാലി നടത്തി. കഴിഞ്ഞ സെപ്റ്റംബറിൽ നടന്ന ‘ജെൻ സി’ പ്രക്ഷോഭത്തിന് പിന്നാലെ രൂപീകരിച്ച ഇടക്കാല സർക്കാർ മാർച്ചിൽ തെരഞ്ഞെടുപ്പ് നടത്തുമെന്ന് പ്രഖ്യാപിച്ചതിന് ശേഷമുള്ള രാജവംശ അനുകൂലികളുടെ ആദ്യ വലിയ പൊതുപ്രകടനമാണിത്.

18-ാം നൂറ്റാണ്ടിൽ ആധുനിക നേപ്പാൾ സ്ഥാപകനായി കണക്കാക്കപ്പെടുന്ന പൃഥ്വി നാരായൺ ഷായുടെ പ്രതിമയ്ക്കു സമീപമാണ് പ്രതിഷേധക്കാർ ഒത്തുകൂടിയത്. “രാജാവിനെ തിരിച്ചുകൊണ്ടുവരിക”, “രാജഭരണം മാത്രമാണ് രാജ്യത്തിന് രക്ഷ” എന്നീ മുദ്രാവാക്യങ്ങളാണ് റാലിയിൽ മുഴങ്ങിയത്. 2008ൽ ഭരണഘടനാസഭ രാജഭരണം റദ്ദാക്കി റിപ്പബ്ലിക് പ്രഖ്യാപിച്ചതോടെയാണ് അവസാന ഷാ രാജാവായ ജ്ഞാനേന്ദ്ര അധികാരം വിട്ടത്.

രണ്ട് നൂറ്റാണ്ടുകളുടെ രാജതന്ത്ര പാരമ്പര്യം

1768ൽ വിവിധ ചെറുരാജ്യങ്ങളെ ഏകീകരിച്ച് പൃഥ്വി നാരായൺ ഷാ രൂപപ്പെടുത്തിയതാണ് ഇന്നത്തെ നേപ്പാൾ. പിന്നീട് ഏകദേശം 240 വർഷത്തോളം ഷാ രാജവംശമാണ് രാജ്യത്ത് ഭരണം നടത്തിയത്. 1951ൽ നേപ്പാൾ ഭരണഘടനാപരമായ രാജഭരണത്തിലേക്ക് മാറി.

എന്നാൽ 1996ൽ ആരംഭിച്ച മാവോയിസ്റ്റ് സായുധ കലാപം രാജ്യത്തിന്റെ രാഷ്ട്രീയ ഘടന തന്നെ ചോദ്യം ചെയ്തു. 2006ലെ ജനകീയ പ്രക്ഷോഭത്തിന് പിന്നാലെ രാജാവിന്റെ അധികാരങ്ങൾ വെട്ടിക്കുറയ്ക്കുകയും, 2008ൽ നേപ്പാൾ ഔദ്യോഗികമായി റിപ്പബ്ലിക്കാവുകയും ചെയ്തു.

റിപ്പബ്ലിക്കിനോട് ഉയരുന്ന പ്രതിഷേധം

നിലവിലെ രാഷ്ട്രീയ അസ്ഥിരത, സർക്കാരുകളുടെ ആവർത്തിച്ച മാറ്റങ്ങൾ, അഴിമതി ആരോപണങ്ങൾ, സാമ്പത്തിക ബുദ്ധിമുട്ടുകൾ എന്നിവയാണ് രാജഭരണ വാദം വീണ്ടും ശക്തമാകാൻ കാരണം എന്ന് നിരീക്ഷകർ പറയുന്നു. ജെൻ സി പ്രക്ഷോഭത്തിന്റെ പശ്ചാത്തലത്തിൽ രാജ്യത്തെ പ്രശ്‌നങ്ങളെ കൈകാര്യം ചെയ്യാൻ ശക്തവും സ്ഥിരവുമായ ഭരണകൂടം ആവശ്യമാണ് എന്നും, അതിന് രാജതന്ത്രം പുനഃസ്ഥാപിക്കേണ്ടതുണ്ടെന്നും പ്രതിഷേധക്കാർ അവകാശപ്പെടുന്നു. രാജകുടുംബത്തിന് ഇപ്പോഴും ഗ്രാമപ്രദേശങ്ങളിൽ അടക്കം ഗണ്യമായ പിന്തുണ നിലനിൽക്കുന്നുണ്ടെന്നാണ് അവരുടെ വാദം.

ജെൻ സി പ്രക്ഷോഭത്തിൽ നിന്ന് ഇടക്കാല സർക്കാരിലേക്ക്

സോഷ്യൽ മീഡിയ നിരോധനത്തിനെതിരായ പ്രതികരണമായാണ് ‘ജെൻ സി’ പ്രക്ഷോഭം ആരംഭിച്ചത്. പിന്നീട് അത് ഭരണകൂടത്തിന്റെ കഴിവില്ലായ്മയ്ക്കും അഴിമതിക്കുമെതിരായ ശക്തമായ ജനകീയ മുന്നേറ്റമായി മാറി. ഇതിന്റെ തുടർച്ചയായി മുൻ സുപ്രീം കോടതി ജഡ്ജി സുശീല കാർക്കിയുടെ നേതൃത്വത്തിലുള്ള ഇടക്കാല സർക്കാർ അധികാരമേറ്റു. മാർച്ചിൽ നടക്കുന്ന തെരഞ്ഞെടുപ്പ് അടുത്തിരിക്കെ, രാജഭരണം പുനഃസ്ഥാപിക്കണമെന്ന ആവശ്യം നേപ്പാളിന്റെ രാഷ്ട്രീയ ചർച്ചകളിൽ വീണ്ടും കേന്ദ്രസ്ഥാനത്തേക്ക് എത്തുകയാണ്.