ന്യൂഡൽഹി: അന്വേഷണ നടപടികൾ തുടരുന്ന കാലയളവിൽ സമാധാനം പാലിക്കുന്നതിനായി ഒരു ജാമ്യക്കാരനോടൊപ്പം 10,000 രൂപയുടെ വ്യക്തിഗത ബോണ്ട് നൽകണമെന്ന നോട്ടീസ് ചോദ്യംചെയ്ത് ഓൾ ഇന്ത്യ സ്റ്റുഡന്റ്സ് അസോസിയേഷൻ (ഐസ) ദേശീയ പ്രസിഡന്റ് നേഹ ബോറ നൽകിയ ഹർജി ഡൽഹി ഹൈക്കോടതി തള്ളി.
നടപടിക്രമങ്ങളിൽ മതിയായ സംരക്ഷണങ്ങൾ നിലവിലുണ്ടെന്ന് ജസ്റ്റിസ് സുബ്രഹ്മണ്യം പ്രസാദ് നിരീക്ഷിച്ചു. അന്വേഷണത്തിൽ ഉത്തരവ് പുറപ്പെടുവിക്കുന്നതിനുമുമ്പ് ബന്ധപ്പെട്ട രേഖകളും വിവരങ്ങളും നേഹ ബോറയ്ക്ക് നൽകണമെന്ന് സ്പെഷ്യൽ എക്സിക്യൂട്ടീവ് മജിസ്ട്രേറ്റിനോട് കോടതി നിർദേശിച്ചു.
മുഖ്യ തിരഞ്ഞെടുപ്പ് കമ്മീഷണർക്കെതിരെ ഒക്ടോബർ 16-ന് നടന്ന പ്രതിഷേധത്തിനിടെ മാണ്ഡി ഹൗസിൽനിന്ന് നേഹയെ കസ്റ്റഡിയിലെടുത്തതിനെത്തുടർന്നാണ് നടപടികൾ ആരംഭിച്ചത്. ഭാരതീയ നാഗരിക് സുരക്ഷാ സംഹിതയിലെ കരുതൽ നടപടികൾ സംബന്ധിച്ച വ്യവസ്ഥകൾ പ്രകാരമായിരുന്നു നോട്ടീസ്.
പ്രതിഷേധം സമാധാനപരമായിരുന്നുവെന്നും നേഹ ഒരിക്കലും അക്രമത്തിന് ആഹ്വാനം ചെയ്തിട്ടില്ലെന്നും അവരുടെ അഭിഭാഷകനായ മുതിർന്ന അഭിഭാഷകൻ ഗോപാൽ ശങ്കരനാരായണൻ വാദിച്ചു. സമാധാനലംഘനത്തിന് സാധ്യതയുണ്ടെന്ന് വ്യക്തമാക്കുന്ന വിവരങ്ങളോ രേഖകളോ നോട്ടീസിൽ ഇല്ലെന്നും അദ്ദേഹം ചൂണ്ടിക്കാട്ടി.
അതേസമയം, നിരോധനാജ്ഞ നിലനിൽക്കെ മുദ്രാവാക്യം വിളിക്കുകയും പ്രതിഷേധങ്ങളിൽ പങ്കെടുക്കുകയും ചെയ്തെന്ന ആരോപണങ്ങളാണ് അധികൃതർ ഉന്നയിച്ചത്.
നോട്ടീസും തുടർനടപടികളും റദ്ദാക്കണമെന്നും തനിക്കെതിരെ നിർബന്ധിത നടപടികൾ സ്വീകരിക്കുന്നത് തടയണമെന്നും നേഹ ഹർജിയിൽ ആവശ്യപ്പെട്ടിരുന്നു. ഹർജി തള്ളിയതോടെ കരുതൽ നടപടികളുടെ ഭാഗമായ അന്വേഷണം തുടരും.