17കാരിയെ കൂട്ടബലാത്സംഗം ചെയ്ത ശേഷം കുത്തിക്കൊന്നു; മൃതദേഹം തെരുവുനായകൾ ഭക്ഷിച്ചു
ന്യൂഡൽഹി: രാജ്യതലസ്ഥാനത്ത് ഞെട്ടിക്കുന്ന കൊലപാതകം. 17 വയസ്സുകാരിയെ കൂട്ടബലാത്സംഗത്തിനിരയാക്കിയ ശേഷം കുത്തിക്കൊലപ്പെടുത്തി മൃതദേഹം വിജനമായ സ്ഥലത്ത് ഉപേക്ഷിച്ച സംഭവത്തിൽ പ്രായപൂർത്തിയാകാത്ത മൂന്ന് പേർ ഉൾപ്പെടെ നാല് പേരെ ഡൽഹി പോലീസ് അറസ്റ്റ് ചെയ്തു.
സെപ്റ്റംബർ 13നാണ് സെൻട്രൽ ഡൽഹിയിലെ കുഷാക് റോഡിന് സമീപമുള്ള വിജനമായ പറമ്പിൽ നിന്ന് പെൺകുട്ടിയുടെ അഴുകിയ മൃതദേഹം കണ്ടെത്തിയത്. മൃതദേഹത്തിന്റെ ചില ഭാഗങ്ങൾ തെരുവുനായകൾ ഭക്ഷിച്ച നിലയിലായിരുന്നു. ഒരു കൈ ശരീരത്തിൽനിന്ന് വേർപെട്ട നിലയിലും കണ്ടെത്തി. മൃതദേഹം ഏറെ അഴുകിയിരുന്നതിനാൽ ആദ്യഘട്ടത്തിൽ മരിച്ചത് പെൺകുട്ടിയാണെന്ന് പോലും തിരിച്ചറിയാൻ പോലീസിന് കഴിഞ്ഞിരുന്നില്ല.
സംഭവത്തിൽ കൃത്യത്തിന് ഉപയോഗിച്ചതായി കരുതുന്ന രണ്ട് കത്തികളും പ്രതികൾ ധരിച്ചിരുന്ന വസ്ത്രങ്ങളും കൊലപാതകവുമായി ബന്ധപ്പെട്ട ടെമ്പോയും പോലീസ് പിടിച്ചെടുത്തിട്ടുണ്ട്.
പെൺകുട്ടിക്കും പ്രതികൾക്കും നേരത്തെ പരിചയമുണ്ടായിരുന്നുവെന്നാണ് അന്വേഷണത്തിൽ കണ്ടെത്തിയത്. സംഭവദിവസം പെൺകുട്ടി പ്രതികൾക്കൊപ്പം ടെമ്പോയിൽ യാത്ര ചെയ്തിരുന്നു. വാഹനത്തിനുള്ളിൽവെച്ച് മദ്യം കഴിച്ചതിന് പിന്നാലെയാണ് പെൺകുട്ടിയെ പ്രതികൾ പീഡിപ്പിച്ചതെന്നാണ് പോലീസിന്റെ പ്രാഥമിക നിഗമനം. തുടർന്ന് കുത്തിക്കൊലപ്പെടുത്തിയ ശേഷം മൃതദേഹം വിജനമായ സ്ഥലത്ത് ഉപേക്ഷിച്ചെന്നാണ് അന്വേഷണ സംഘത്തിന്റെ വിലയിരുത്തൽ.
പെൺകുട്ടിയെ കാണാതായതായി കുടുംബം പോലീസിൽ പരാതി നൽകിയിരുന്നില്ല. പെൺകുട്ടി ഇടയ്ക്കിടെ വീട്ടിൽനിന്ന് പോകുകയും ഏതാനും ദിവസങ്ങൾക്ക് ശേഷം തിരിച്ചെത്തുകയും ചെയ്യുന്ന പതിവുണ്ടായിരുന്നതിനാലാണ് കുടുംബം ആദ്യം ഇത് ഗൗരവമായി കാണാതിരുന്നതെന്നാണ് വിവരം.
സിസിടിവി ദൃശ്യങ്ങളിൽ നിന്ന് വഴിത്തിരിവ്
സംഭവത്തിന് ദൃക്സാക്ഷികളില്ലാതിരുന്നതും പ്രതികളെക്കുറിച്ച് വ്യക്തമായ വിവരങ്ങൾ ലഭിക്കാതിരുന്നതും അന്വേഷണത്തിന് വെല്ലുവിളിയായി. ഇതോടെ പോലീസ് പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ച് അന്വേഷണം ശക്തമാക്കി.
സംഭവം നടന്നതായി സംശയിക്കുന്ന സമയത്ത് കുഷാക് റോഡിന് സമീപത്തുകൂടി ഒരു ടെമ്പോ കടന്നുപോകുന്നതായി സിസിടിവി പരിശോധനയിൽ കണ്ടെത്തി. എന്നാൽ ദൃശ്യങ്ങളിൽ ഇരുട്ടായിരുന്നതിനാൽ വാഹനത്തിന്റെ രജിസ്ട്രേഷൻ നമ്പർ വ്യക്തമായി ലഭിച്ചില്ല.
തുടർന്ന് വിവിധ സ്ഥലങ്ങളിലെ സിസിടിവി ക്യാമറകളിലെ ദൃശ്യങ്ങൾ പിന്തുടർന്ന് പോലീസ് ടെമ്പോയുടെ സഞ്ചാരപാത പരിശോധിച്ചു. ഒടുവിൽ സംശയാസ്പദമായ ടെമ്പോ കണ്ടെത്തി ഡ്രൈവറെ ചോദ്യംചെയ്തതോടെയാണ് അന്വേഷണത്തിൽ നിർണായക വഴിത്തിരിവുണ്ടായത്.
ഡ്രൈവറിൽനിന്ന് ലഭിച്ച വിവരങ്ങളുടെ അടിസ്ഥാനത്തിൽ നടത്തിയ തുടർ അന്വേഷണത്തിലാണ് പ്രായപൂർത്തിയാകാത്ത മൂന്ന് പേർ ഉൾപ്പെടെ നാല് പേരെ പോലീസ് കസ്റ്റഡിയിലെടുത്തത്. സംഭവത്തിൽ കൂടുതൽ അന്വേഷണം തുടരുകയാണ്.
