ന്യൂഡൽഹി: ഡൽഹി നിയമസഭാ തെരഞ്ഞെടുപ്പിൽ ബിജെപി പ്രകടനപത്രിക പുറത്തിറക്കി. സ്ത്രീകൾക്ക് പ്രതിമാസം 2500 രൂപ വീതം നൽകുമെന്നതുൾപ്പെടെ ജനപ്രിയ പദ്ധതികൾ നടപ്പാക്കുമെന്നാണ് ബിജെപി തങ്ങളുടെ പ്രകടന പത്രികയിൽ വാഗ്ദാനം ചെയ്യുന്നത്. സ്ത്രീകളെയും യുവവോട്ടർമാരെയും തങ്ങൾക്കൊപ്പം നിർത്താൻ ലക്ഷ്യമിട്ടുള്ളതാണ് ബിജെപി ദേശീയ അധ്യക്ഷൻ ജെ.പി.നഡ്ഡ പുറത്തുവിട്ട പ്രകടനപത്രികയിലുള്ളത്.
സ്ത്രീകൾക്ക് പ്രതിമാസം 2500 രൂപ വീതം നൽകുന്നതിന് പുറമേ ഗർഭിണികൾക്ക് 2,10,000 രൂപ ധനസഹായം നൽകുമെന്നും ബിജെപി വാഗ്ദാനം ചെയ്യുന്നു. തങ്ങൾ ഡൽഹിയിൽ അധികാരത്തിലെത്തിയാൽ പാചകവാതക സിലിണ്ടറിന് 500 രൂപ സബ്സിഡി നൽകുമെന്നും ബിജെപി വാഗ്ദാനം ചെയ്യുന്നു. ഒരു കുടുംബത്തിന് പ്രതിവർഷം 5 ലക്ഷം രൂപയുടെ ആരോഗ്യ പരിരക്ഷ നൽകുന്ന കേന്ദ്രത്തിന്റെ ഇൻഷുറൻസ് പദ്ധതിയായ ആയുഷ്മാൻ ഭാരതിന് കീഴിൽ 5 ലക്ഷം രൂപയുടെ അധിക പരിരക്ഷ ഉറപ്പാക്കുമെന്നും ബിജെപി പ്രകടന പത്രികയിൽ പറയുന്നു.
പ്രധാന വാഗ്ദാനങ്ങൾ
- മഹിളാ സമൃദ്ധി യോജന എന്ന പേരിലുള്ള പദ്ധതിയിലൂടെ ഡൽഹിയിലെ എല്ലാ സ്ത്രീകൾക്കും 2500 രൂപ നൽകും. ആദ്യ മന്ത്രിസഭാ യോഗത്തിൽ തന്നെ ഇതിന് അംഗീകാരം നൽകും.
- ഡൽഹിയിൽ നിലവിലുള്ള എല്ലാ ക്ഷേമ പദ്ധതികളും തുടരും
- പാചകവാതകം ഉപയോഗിക്കുന്ന കുടുംബങ്ങൾക്ക് സിലിണ്ടറിന് 500 രൂപ സബ്സിഡി ലഭിക്കും, കൂടാതെ ഹോളിയിലും ദീപാവലിയിലും അവർക്ക് ഓരോ സിലിണ്ടറും സൗജന്യമായി ലഭിക്കും.
- ഗർഭിണികളായ സ്ത്രീകൾക്ക് 21000 രൂപ നൽകും
- ജെജെ ക്ലസ്റ്ററുകളിൽ 5 രൂപയ്ക്ക് പോഷകസമൃദ്ധമായ ഭക്ഷണം നൽകുന്നതിനായി അടൽ കാന്റീനുകൾ സ്ഥാപിക്കും
- 60 നും 70 നും ഇടയിൽ പ്രായമുള്ള മുതിർന്ന പൗരന്മാർക്ക് 2,500 രൂപയും 70 വയസ്സിനു മുകളിലുള്ളവർക്ക് 3,000 രൂപയും പെൻഷനായി നൽകും
