ദോഹ: പുതിയ അധ്യയന വർഷത്തിന് മുന്നോടിയായി മുഷൈരിബ് പ്രോപ്പർട്ടീസ് സംഘടിപ്പിക്കുന്ന "സ്കൂൾ ചെക്ക് ലിസ്റ്റ്: ബാക്ക് ടു സ്കൂൾ 2026" നാലാം പതിപ്പിന് മുഷൈരിബ് ഗലേറിയയിൽ തുടക്കമായി. കുട്ടികൾക്കും കുടുംബങ്ങൾക്കുമായി പത്ത് ദിവസം നീളുന്ന വിദ്യാഭ്യാസ-വിനോദ പരിപാടികളാണ് ഇവിടെ ഒരുക്കിയിരിക്കുന്നത്.
കുടുംബങ്ങളെയും കുട്ടികളെയും ഒന്നിപ്പിക്കുന്ന മികച്ച അനുഭവങ്ങൾ സമ്മാനിക്കുകയാണ് ഈ കൂട്ടായ്മയിലൂടെ ലക്ഷ്യമിടുന്നതെന്ന് മുഷൈരിബ് പ്രോപ്പർട്ടീസ് കമ്മ്യൂണിക്കേഷൻ ആൻഡ് പബ്ലിക് റിലേഷൻസ് മാനേജർ നൂറ അൽ ഖുബൈസി പറഞ്ഞു.മുഷൈരിബ് ഗലേറിയയുടെ ഒന്നാം നിലയിൽ ദിവസവും വൈകുന്നേരം 4 മുതൽ രാത്രി 10 വരെയാണ് പരിപാടി.ബോർഡ് ഗെയിമുകളിൽ അധിഷ്ഠിതമായ പ്രത്യേക തീമിലാണ് ഇത്തവണത്തെ ബാക്ക്-ടു-സ്കൂൾ അനുഭവം ഒരുക്കിയിരിക്കുന്നത്.
കുടുംബങ്ങൾക്കായുള്ള ഗെയിമിംഗ് ഏരിയ, സ്കൂൾ ബാഗുകൾ, സ്റ്റേഷനറി സാധനങ്ങൾ എന്നിവ ലഭ്യമാകുന്ന പ്രത്യേക ഷോപ്പിംഗ് സെക്ഷനുകൾ എന്നിവ ഇവിടെ സജ്ജീകരിച്ചിട്ടുണ്ട്.അർഹരായ കുട്ടികൾക്ക് നൽകാനായി പ്രത്യേക 'ഡൊണേഷൻ ബാഗുകൾ' വാങ്ങി സംഭാവന ചെയ്യാനുള്ള സൗകര്യവും കുട്ടികൾക്കായി ഇവിടെ ഒരുക്കിയിട്ടുണ്ട്.
നഗരമധ്യത്തിൽ സ്ഥിതി ചെയ്യുന്ന മുഷൈരിബ് ഡൗൺടൗണിനെ ഒരു ആധുനിക സംയോജിത കേന്ദ്രമാക്കി മാറ്റുന്നതോടൊപ്പം, പഠനത്തെയും പങ്കാളിത്തത്തെയും പ്രോത്സാഹിപ്പിക്കുന്ന കമ്മ്യൂണിറ്റി അനുഭവങ്ങൾ നൽകുകയാണ് ഇതിലൂടെ ലക്ഷ്യമിടുന്നത്.
