തിരുവനന്തപുരത്തെ ഐബി ഉദ്യോഗസ്ഥയായ യുവതി ജീവനൊടുക്കിയ സംഭവത്തിൽ പ്രതി സുകാന്തിന് കുരുക്ക് മുറുകുന്നു. വിവാഹ വാഗ്ദാനം നൽകിയ ശേഷമാണ് സുകാന്ത് യുവതിയെ ബവാത്സംഗത്തിനിരയാക്കിയത്. ഇതിന് പിന്നാലെ ഗർഭിണിയായ യുവതിയെ ഗർഭഛിദ്രത്തിന് വിധേയയാക്കാൻ സുകാന്ത് വ്യാജരേഖകളുണ്ടാക്കുകയും ചെയ്തു. ഗർഭഛിദ്രത്തിന് ശേഷമാണ് ഇയാൾ വിവാഹത്തിൽ നിന്നും പിന്മാറിയതെന്നും പൊലീസ് കണ്ടെത്തിയിട്ടുണ്ട്.
ഐബി ഉദ്യോഗസ്ഥനായ സുകാന്ത് യുവതിയെ ഗർഭഛിദ്രത്തിന് വിധേയയാക്കാൻ വ്യാജരേഖകളുണ്ടാക്കി എന്നാണ് പൊലീസിന്റെ കണ്ടെത്തിയിരിക്കുന്നത്. തങ്ങൾ വിവാഹിതരെന്ന് തെളിയിക്കുന്ന രേഖകളാണ് ഇയാൾ വ്യാജമായി തയാറാക്കിയത്. വ്യാജ ക്ഷണക്കത്ത് ഉൾപ്പെടെ ഉദ്യോഗസ്ഥയുടെ ബാഗിൽ നിന്ന് ലഭിച്ചതായി പൊലീസ് വെളിപ്പെടുത്തി.
ജൂലൈ മാസത്തിൽ തിരുവനന്തപുരത്തെ സ്വകാര്യ ആശുപത്രിയിൽ വെച്ചാണ് യുവതിയെ ഗർഭഛിദ്രം നടത്തിയത്. ഇതിന് ശേഷം സുകാന്ത് വിവാഹത്തിൽ നിന്ന് പിൻമാറി. മരണത്തിന് ഏതാനും ദിവസം മുൻപ് വിവാഹത്തിന് സമ്മതമല്ലന്ന് സുകാന്ത് യുവതിയുടെ അമ്മക്ക് സന്ദേശം അയച്ചതായും പൊലീസ് വ്യക്തമാക്കി. ഇതിനെ തുടർന്നുണ്ടായ മാനസിക പ്രയാസമാണ് യുവതിയെ ആത്മഹത്യയിലേക്ക് നയിച്ചതെന്ന നിഗമനത്തിലാണ് പൊലീസ്.
