കണ്ണൂർ: മുൻ കണ്ണൂർ ADM നവീൻ ബാബുവിന്റെ മരണത്തിൽ തുടരന്വേഷണം ആവശ്യപ്പെട്ട് ഭാര്യ മഞ്ജുഷ നൽകിയ ഹർജി തള്ളണമെന്ന് ആവശ്യപ്പെട്ട് പോലീസും കേസിലെ പ്രതിയായ പി.പി. ദിവ്യയും കോടതിയിൽ നിലപാടെടുത്തു. നിയമപരമായി ഈ ഹർജി നിലനിൽക്കില്ലെന്ന് ഇരു കക്ഷികളും വാദിച്ചു.
കേസിലെ ഏക പ്രതിയായ പി.പി. ദിവ്യ കുറ്റക്കാരിയെന്ന് കണ്ടെത്തിയതായി കണ്ണൂർ ടൗൺ ഇൻസ്‌പെക്ടർ ശ്രീജിത്ത് കോടേരി ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതിയിൽ റിപ്പോർട്ട് സമർപ്പിച്ചു. നവീൻ ബാബുവിനെതിരെയുള്ള ആരോപണങ്ങൾ ശരിയാണെന്നും റിപ്പോർട്ടിൽ പറയുന്നു.
പെട്രോൾ പമ്പിന് അനുമതി നൽകിയതുമായി ബന്ധപ്പെട്ട് നവീൻ ബാബു കൈക്കൂലി വാങ്ങിയെന്ന ആരോപണത്തിലാണ് അന്വേഷണം നടന്നത്. എന്നാൽ, ബിനാമി ഇടപാടുകൾ, ദിവ്യയും പ്രശാന്തനുമായുള്ള ഫോൺ രേഖകൾ, ഡിലീറ്റ് ചെയ്ത ചാറ്റുകൾ, കളക്ടറുടെ മൊഴിയിലെ വൈരുദ്ധ്യങ്ങൾ എന്നിവ അന്വേഷിച്ചില്ലെന്ന് മഞ്ജുഷയുടെ ഹർജിയിൽ ആരോപിച്ചിരുന്നു.
അതേസമയം, കേസ് നീട്ടിക്കൊണ്ടുപോകാനുള്ള ശ്രമമാണ് ഈ ഹർജിയെന്നും, ദിവ്യയുടെ നിരപരാധിത്വം തെളിയുമെന്ന ഭയം കൊണ്ടാണ് ഇങ്ങനെയൊരു ഹർജി നൽകിയതെന്നും ദിവ്യയുടെ അഭിഭാഷകൻ വാദിച്ചു. കേസ് ഈ മാസം 23-ലേക്ക് മാറ്റി.
പോലീസിന്റെ റിപ്പോർട്ടിലെ കൂടുതൽ വിവരങ്ങൾ
- നവീൻ ബാബു തനിക്ക് തെറ്റുപറ്റിയെന്ന് യാത്രയയപ്പിന് ശേഷം കളക്ടറോട് പറഞ്ഞിരുന്നു.
- നവീൻ ബാബു വിവാദ പെട്രോൾ പമ്പ് ഉടമയായ ടി.വി. പ്രശാന്തുമായി പലതവണ സംസാരിച്ചിട്ടുണ്ട്.
- കളക്ടർ അരുൺ കെ. വിജയൻ മന്ത്രി കെ. രാജനെ പലതവണ ഫോണിൽ വിളിച്ചതായും റിപ്പോർട്ടിൽ പറയുന്നു. മന്ത്രി നേരത്തെ ഇത് നിഷേധിച്ചിരുന്നു.
