എസ്. ജാനകി എന്ന പേര് കേൾക്കുമ്പോൾ ആദ്യം മനസ്സിലെത്തുന്നത് മധുരമുള്ള ആ ശബ്ദമാണ്. എന്നാൽ ആ ശബ്ദം നിലച്ചുവെന്ന വാർത്ത എത്തും മുമ്പ് തന്നെ, അവർ മരിച്ചെന്ന വ്യാജവാർത്തകൾ പലതവണ പ്രചരിച്ചിരുന്നു. ഓരോ തവണയും ആ വാർത്തകളെ പുഞ്ചിരിയോടെ തള്ളിക്കളഞ്ഞ ജാനകിയമ്മ, ഒടുവിൽ യഥാർഥത്തിൽ വിടപറയുമ്പോൾ ബാക്കിയാകുന്നത് അനശ്വരമായ ഗാനസമ്പത്താണ്.

2010-ലാണ് ആദ്യമായി എസ്. ജാനകിയുടെ മരണവാർത്ത പുറംലോകത്തെത്തിയത്. ആന്ധ്രാപ്രദേശിലെ ഒരു പ്രാദേശിക പത്രം തെറ്റായി നൽകിയ വാർത്ത നിമിഷങ്ങൾക്കകം വലിയ ചർച്ചയായി. എന്നാൽ അതൊന്നും ജാനകിയമ്മയെ അസ്വസ്ഥയാക്കിയില്ല. "ഞാൻ ജീവനോടെയുണ്ട്" എന്ന ലളിതമായ മറുപടിയിലൂടെ അവർ അഭ്യൂഹങ്ങൾക്ക് വിരാമമിട്ടു. പിന്നീട് പത്രം തെറ്റ് സമ്മതിച്ച് വാർത്ത പിൻവലിക്കുകയും ചെയ്തു.

ആറ് വർഷങ്ങൾക്ക് ശേഷം, സംഗീതവേദികളിൽ നിന്ന് പിന്മാറുകയാണെന്ന് അവർ പ്രഖ്യാപിച്ചതും വീണ്ടും തെറ്റായ പ്രചാരണങ്ങൾക്ക് വഴിവെച്ചു. പ്രായത്തിന്റെ പരിമിതികൾ കണക്കിലെടുത്ത് വിശ്രമജീവിതം തിരഞ്ഞെടുത്ത ജാനകിയമ്മയുടെ തീരുമാനം ചിലർ മരണവാർത്തയായി വളച്ചൊടിച്ച് സമൂഹമാധ്യമങ്ങളിൽ പ്രചരിപ്പിച്ചു. എന്നാൽ അന്നും അവർ സമാധാനത്തോടെയായിരുന്നു പ്രതികരിച്ചത്.

2026 ജനുവരിയിൽ ഏകമകനായ മുരളികൃഷ്ണയുടെ വിയോഗം കുടുംബത്തെ വലിയ ദുഃഖത്തിലാഴ്ത്തിയപ്പോഴും, സമൂഹമാധ്യമങ്ങളിൽ വീണ്ടും ജാനകിയമ്മയെക്കുറിച്ചുള്ള വ്യാജവാർത്തകൾ നിറഞ്ഞു. അതോടെ കൊച്ചുമകൾ അപ്‌സര ഔദ്യോഗികമായി രംഗത്തെത്തി, ജാനകിയമ്മ ആരോഗ്യവതിയാണെന്നും കുടുംബത്തിന്റെ സ്വകാര്യത മാനിക്കണമെന്നും അഭ്യർഥിച്ചു.

ജീവിതത്തിൽ വ്യാജമരണ വാർത്തകൾ മാത്രമല്ല, മരണത്തിന്റെ വക്കിലെത്തിച്ച ഒരു യഥാർഥ സംഭവവും ജാനകിയമ്മയെ തേടിയെത്തിയിരുന്നു. 1990-കളുടെ അവസാനത്തിൽ ചെന്നൈയിൽ ചികിത്സയ്ക്കിടെ നൽകിയ പെനിസിലിൻ കുത്തിവെപ്പിനെത്തുടർന്ന് ഉണ്ടായ ഗുരുതര അലർജിയിൽ അവർ ബോധരഹിതയായി. ഓരോ നിമിഷവും നിർണായകമായ ആ സമയത്ത്, ഒരു മലയാളി ടാക്സി ഡ്രൈവർ നടത്തിയ സമയോചിത ഇടപെടലാണ് അവരുടെ ജീവൻ രക്ഷിച്ചത്. ട്രാഫിക് കുരുക്കുകൾ വകവയ്ക്കാതെ ആശുപത്രിയിലെത്തിച്ച ആ യാത്രയെക്കുറിച്ച് പിന്നീട് ജാനകിയമ്മ ഏറെ നന്ദിയോടെ ഓർത്തിരുന്നു.

"ആ മനുഷ്യൻ അന്ന് ഉണ്ടായിരുന്നില്ലെങ്കിൽ ഞാൻ ഇന്ന് ജീവനോടെ ഉണ്ടാകുമായിരുന്നില്ല" എന്ന് അവർ പിന്നീട് പലവട്ടം പറഞ്ഞിട്ടുണ്ട്. മലയാളമാണ് തന്റെ സ്വപ്നങ്ങളുടെ ഭാഷയെന്ന് പറഞ്ഞിരുന്ന ജാനകിയമ്മ, 48,000-ത്തിലധികം ഗാനങ്ങളിലൂടെ സംഗീതത്തിന്റെ അതിരുകൾ കടന്ന് കോടിക്കണക്കിന് ഹൃദയങ്ങളിൽ ഇടം നേടി. ഇന്ന് ആ ശബ്ദം നിശ്ശബ്ദമായെങ്കിലും, ഓരോ ഗാനവും ജാനകിയമ്മയെ എന്നും ജീവിപ്പിച്ചുകൊണ്ടിരിക്കും.