കൊച്ചി: "എ റേഡിയോപേക്ക് ബ്രൂഷൈറ്റ് ബോൺ സിമന്റ്‌ ഫോർമുലേഷൻ ആൻഡ് മെതേർഡ് ഓഫ് പ്രിപറേഷൻ" (A Radiopaque Brushite Bone Cement Formulation and Method of Preparation) എന്ന തലക്കെട്ടിലുള്ള വിപ്ലവകരമായ കണ്ടുപിടുത്തത്തിന് കൊച്ചി ശാസ്ത്ര സാങ്കേതിക സർവകലാശാലയ്ക്ക്(കുസാറ്റ്) പേറ്റന്റ് ലഭിച്ചു.

പോളിമർ സയൻസ് ആൻഡ് റബ്ബർ ടെക്നോളജി വകുപ്പിലെ പ്രൊഫസറും മേധാവിയുമായ ഡോ. ശൈലജ ജി.എസ്., പോസ്റ്റ് ഡോക്ടറൽ ഫെലോ ഡോ. സ്നേഹ കെ.ആർ. എന്നിവർ വികസിപ്പിച്ചെടുത്ത ഈ സാങ്കേതികവിദ്യ ചെറിയ മുറിവുകളിലൂടെയുള്ള അസ്ഥി ശസ്ത്രക്രിയകളിൽ വലിയ മാറ്റമുണ്ടാക്കാനുതകുന്ന ഒരു നൂതന ബയോമെറ്റീരിയൽ അവതരിപ്പിക്കുന്നു. ചിലപ്പോൾ പ്രതികൂല പ്രതികരണങ്ങൾക്ക് കാരണമാകുന്നതോ എക്സ്-റേകൾക്ക് കീഴിൽ ദൃശ്യപരത നഷ്ടപ്പെടുന്നതോ ആയ പരമ്പരാഗത അസ്ഥി സിമന്റുകളിൽ നിന്ന് വ്യത്യസ്തമായി, ഈ പുതിയ ബ്രൂഷൈറ്റ് അധിഷ്ഠിത ഫോർമുലേഷൻ മികച്ച ബയോകോംപാറ്റിബിലിറ്റിയും മെച്ചപ്പെട്ട റേഡിയോഒപാസിറ്റിയും വാഗ്ദാനം ചെയ്യുന്നു.

ഈ ബിയോമെറ്റീരിയൽ ഫോർമുലേഷനിൽ ചണക്കൈത (hemp plant) സസ്യ നാരുകളിൽ നിന്ന് വേർതിരിച്ചെടുത്ത് പ്രവർത്തനക്ഷമമാക്കിയ നാനോസെല്ലുലോസ്, ബോൺ സിമന്റിന്റെ സജ്ജീകരണ സമയത്തിന് പ്രകൃതിദത്ത റെഗുലേറ്ററായി പ്രവർത്തിക്കുന്നു. സിമന്റിൽ ബയോകോംപാറ്റിബിൾ എക്സ്-റേ ദൃശ്യ ഘടകം ഉൾപ്പെടുത്തുന്നതിലൂടെ, മെഡിക്കൽ ഇമേജിംഗ് സമയത്ത് ഇംപ്ലാന്റ്  നന്നായി ദൃശ്യമാകും. അതുമൂലം ശസ്ത്രക്രിയാ വിദഗ്ധർക്ക് കുറഞ്ഞ പവർ എക്സ്-റേകൾ സുരക്ഷിതമായ എക്സ്-റേ വികിരണത്തോടുകൂടി ഉപയോഗിക്കാൻ കഴിയുന്നു. ഈ മെറ്റീരിയൽ ഓസ്റ്റിയോഇൻഡക്റ്റീവ് ആയി രൂപകൽപ്പന ചെയ്‌തിരിക്കുന്നു, അതായത് ഇത് പുതിയ അസ്ഥികളുടെ വളർച്ചയെ പിന്തുണയ്ക്കുകയും ശരീരം സുഖപ്പെടുമ്പോൾ ക്രമേണ ആഗിരണം ചെയ്യപ്പെടുകയും ചെയ്യുന്നത് കൊണ്ട് ഇത് സ്ഥിരമായ സിന്തറ്റിക് ഫില്ലറുകളേക്കാൾ മെച്ചപ്പെട്ടതാണ്.

ഓസ്റ്റിയോപൊറോസിസ്, വെർട്ടെബ്രൽ ഒടിവുകൾ തുടങ്ങിയ പ്രായവുമായി ബന്ധപ്പെട്ട അവസ്ഥകളെ ചികിത്സിക്കുന്നതിനും ഡെന്റൽ ഗ്രാഫ്റ്റിംഗിലും ഓർത്തോപീഡിക് പുനർനിർമ്മാണത്തിലും ഉപയോഗിക്കുന്നതിനും ഈ സാങ്കേതികവിദ്യയ്ക്ക് വലിയ സാധ്യതകളുണ്ട്.

Photo Courtesy - Google