കൊച്ചി: ബംഗാൾ ഉൾക്കടലിലെ ആഴക്കടൽ അടിത്തട്ടിലെ അവശിഷ്ടങ്ങളിൽ ഇതുവരെ വേണ്ടത്ര പഠനവിധേയമാകാത്ത വൈറസ് വൈവിധ്യം കണ്ടെത്തി കൊച്ചി ശാസ്ത്ര സാങ്കേതിക സർവകലാശാലയിലെ (കുസാറ്റ്) ഗവേഷകർ. ഇന്ത്യയുടെ ആഴക്കടൽ ജൈവവൈവിധ്യത്തെക്കുറിച്ചുള്ള ശാസ്ത്രീയ അറിവ് വിപുലീകരിക്കുന്ന സുപ്രധാന ചുവടുവയ്പ്പാണിത്. അന്താരാഷ്ട്ര ശാസ്ത്ര ജേണലായ iScience-ൽ പ്രസിദ്ധീകരിച്ച ഈ പഠനം, ബംഗാൾ ഉൾക്കടലിലെ ആഴക്കടൽ അവശിഷ്ടങ്ങളിലുള്ള വൈറസുകളെ മെറ്റാജീനോം അടിസ്ഥാനത്തിൽ വിശകലനം ചെയ്യുന്ന ആദ്യ പഠനമാണ്.

കുസാറ്റിലെ മറൈൻ ബയോളജി, മൈക്രോബയോളജി ആൻഡ് ബയോകെമിസ്ട്രി വകുപ്പിലെ ഗവേഷക വിദ്യാർഥിനിയായ അതിര ടി. മേനോൻ, അതേ വകുപ്പിലെ അസിസ്റ്റന്റ് പ്രൊഫസറും ഇന്ത്യയുടെ ഡീപ് ഓഷ്യൻ മിഷന്റെ ഭാഗമായി നടപ്പാക്കുന്ന ഗവേഷണ പദ്ധതിയുടെ പ്രിൻസിപ്പൽ ഇൻവെസ്റ്റിഗേറ്ററുമായ ഡോ. സ്വപ്ന പി. ആന്റണിയുടെ മാർഗനിർദേശത്തിലും നേതൃത്വത്തിലുമാണ് ഈ ഗവേഷണം നടത്തിയത്. കേന്ദ്ര ഭൗമശാസ്ത്ര മന്ത്രാലയത്തിന്റെ (Ministry of Earth Sciences – MoES) പിന്തുണയോടെ നടപ്പാക്കുന്ന ഇന്ത്യയുടെ ഡീപ് ഓഷ്യൻ മിഷന്റെ ഭാഗമായാണ് ഈ ഗവേഷണം നടത്തിയത്. ഗോവയിലെ നാഷണൽ സെന്റർ ഫോർ പോളാർ ആൻഡ് ഓഷ്യൻ റിസർച്ചിന്റെ (NCPOR) സഹകരണത്തോടെ, 2024 ഏപ്രിലിൽ ORV Sagar Nidhi എന്ന ഗവേഷണ കപ്പലിൽ നടത്തിയ പര്യവേക്ഷണത്തിനിടെയാണ് സമുദ്രനിരപ്പിൽനിന്ന് 3,747 മീറ്റർ ആഴത്തിലുള്ള കടൽത്തട്ടിൽനിന്ന് സാമ്പിളുകൾ ശേഖരിച്ചത്. നിലവിലുള്ള ശാസ്ത്രീയ ഡാറ്റാബേസുകളുമായി താരതമ്യം ചെയ്തപ്പോൾ ഏകദേശം 70 ശതമാനം ജനിതക ശ്രേണികളെയും തിരിച്ചറിയാനോ വർഗീകരിക്കാനോ കഴിഞ്ഞില്ല എന്നതാണ് പഠനത്തിലെ ശ്രദ്ധേയമായ കണ്ടെത്തലുകളിലൊന്ന്. ഇവയിൽ ശാസ്ത്രലോകത്തിന് ഇതുവരെ പരിചിതമല്ലാത്ത വൈറസുകളോ വിശദമായി പഠിക്കപ്പെടാത്ത വൈറസ് വംശപരമ്പരകളോ

ഉൾപ്പെട്ടിരിക്കാമെന്നാണ് ഇത് സൂചിപ്പിക്കുന്നത്. ഉയർന്ന വിശ്വാസ്യതയോടെ തിരിച്ചറിഞ്ഞ വൈറൽ ജനിതക ശ്രേണികളിൽ ഭൂരിഭാഗത്തിനും നേരത്തേ പഠനവിധേയമായ വൈറസുകളുമായി പരിമിതമായ സാമ്യം മാത്രമേ ഉണ്ടായിരുന്നുള്ളൂ. വൈറസുകളുടെ ജനിതക പ്രവർത്തനങ്ങൾ, സൂക്ഷ്മജീവികളുമായുള്ള അവയുടെ ഇടപെടലുകൾ, ആഴക്കടലിലെ പോഷകചംക്രമണത്തിൽ അവ വഹിക്കാനിടയുള്ള പങ്ക് എന്നിവയെക്കുറിച്ചുള്ള സൂചനകളും പഠനത്തിലൂടെ ലഭിച്ചു. ബംഗാൾ ഉൾക്കടലിന്റെ ആഴങ്ങളിൽ ഒളിഞ്ഞുകിടക്കുന്ന, ഇതുവരെ വേണ്ടത്ര അറിയപ്പെടാത്ത വൈറസ് വൈവിധ്യത്തിലേക്ക് ഈ പഠനം പുതിയൊരു വാതിൽ തുറക്കുന്നു. ആഴക്കടൽ ആവാസവ്യവസ്ഥകളിലെ ജൈവവൈവിധ്യത്തെക്കുറിച്ചും വൈറസുകളുടെ പാരിസ്ഥിതിക പ്രാധാന്യത്തെക്കുറിച്ചും കൂടുതൽ പഠനങ്ങൾ നടത്തുന്നതിന് ഈ കണ്ടെത്തലുകൾ അടിത്തറയൊരുക്കും. രാജ്യത്തിന്റെ ആഴക്കടൽ പരിസ്ഥിതിയെക്കുറിച്ചുള്ള ശാസ്ത്രീയ അറിവ് വികസിപ്പിക്കുന്നതിൽ ഇന്ത്യയുടെ ഡീപ് ഓഷ്യൻ മിഷൻ വഹിക്കുന്ന പങ്കും ഈ ഗവേഷണം എടുത്തുകാട്ടുന്നു. സമുദ്രത്തിന്റെ അടിത്തട്ടിൽ ഇനിയും കണ്ടെത്തപ്പെടാത്ത വലിയൊരു ജൈവലോകം നിലനിൽക്കുന്നുവെന്നതിന്റെ സൂചനയാണ് ഈ പഠനം. ഇന്ത്യയുടെ ആഴക്കടലിലെ അജ്ഞാത ജൈവവൈവിധ്യത്തെക്കുറിച്ചുള്ള ഭാവി ഗവേഷണങ്ങൾക്ക് ഇത് പുതിയ വഴികൾ തുറക്കുന്നു.

Photo Courtesy - Google