കൊച്ചി: യഥാർഥ മനുഷ്യ മസ്തിഷ്കവും നാഡീവ്യൂഹവുമായി ബന്ധപ്പെട്ട വിവിധ ശാസ്ത്രീയ പ്രദർശനങ്ങളും നേരിൽ കാണാനുള്ള അവസരം ഒരുക്കുന്ന കൊച്ചി ശാസ്ത്ര സാങ്കേതിക സർവകലാശാലയിലെ (കുസാറ്റ്) ബ്രെയിൻ എക്സിബിഷൻ വിദ്യാർഥികൾക്കും പൊതുജനങ്ങൾക്കും കൗതുകക്കാഴ്ചയാകുന്നു. ICTN 2026-ന്റെ ഭാഗമായി കുസാറ്റിലെ സെന്റർ ഫോർ ന്യൂറോസയൻസിന്റെ നേതൃത്വത്തിലാണ് പ്രദർശനം സംഘടിപ്പിച്ചിരിക്കുന്നത്.

പൂർണ മനുഷ്യ മസ്തിഷ്കം, മസ്തിഷ്കത്തിന്റെ പകുതി ഭാഗങ്ങൾ, വിവിധ ഭാഗങ്ങളുടെയും പാളികളുടെയും മാതൃകകൾ, സുഷുമ്നാ നാഡി, വിവിധ ജന്തുക്കളുടെ മസ്തിഷ്കങ്ങൾ എന്നിവ പ്രദർശനത്തിലുണ്ട്. മസ്തിഷ്കത്തിന്റെ ഘടന താരതമ്യം ചെയ്യാനും നാഡീവ്യൂഹത്തിന്റെ പരിണാമം മനസ്സിലാക്കാനും ഇത് സഹായിക്കുന്നു. രോഗബാധിതവും പരിക്കേറ്റതുമായ മസ്തിഷ്കങ്ങളുടെ പ്രദർശനത്തിലൂടെ നാഡീസംബന്ധമായ രോഗങ്ങൾ മസ്തിഷ്കഘടനയിൽ വരുത്തുന്ന മാറ്റങ്ങളെക്കുറിച്ചും മനസ്സിലാക്കാം.

NIMHANS, ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് (IISc), ബെംഗളൂരു എന്നിവയുൾപ്പെടെയുള്ള പ്രമുഖ ന്യൂറോസയൻസ് സ്ഥാപനങ്ങളുടെ സഹകരണത്തോടെയാണ് പ്രദർശനം സംഘടിപ്പിച്ചിരിക്കുന്നത്. വിദഗ്ധരുടെ നേതൃത്വത്തിലുള്ള വിശദീകരണ സെഷനുകളും സംവേദനാത്മക പഠനാനുഭവങ്ങളും പ്രദർശനത്തിന്റെ ഭാഗമായി ഒരുക്കിയിട്ടുണ്ട്. മസ്തിഷ്കഘടനകളും നാഡീശൃംഖലകളും അടുത്തറിയാൻ അവസരമൊരുക്കുന്ന പ്രത്യേക 3D ബ്രെയിൻ പ്രൊജക്ഷനും പ്രദർശനത്തിലുണ്ട്.

സ്കൂൾ, കോളേജ് വിദ്യാർഥികൾക്കും പൊതുജനങ്ങൾക്കും മസ്തിഷ്കശാസ്ത്രത്തെക്കുറിച്ച് ലബോറട്ടറിക്കും ക്ലാസ് മുറിക്കും പുറത്തുനിന്ന് പഠിക്കാനുള്ള അവസരമാണ് പ്രദർശനം ഒരുക്കുന്നത്.

Photo Courtesy - Google