ദോഹ: ആഗോള കുതിരപ്പന്തയ വേദിയിലെ വിസ്മയമായ ലോഞ്ചിൻസ് ഗ്ലോബൽ ചാമ്പ്യൻസ് ടൂറും (LGCT) ഖത്തറിന്റെ 'ഇയേഴ്സ് ഓഫ് കൾച്ചർ' (Years of Culture) പദ്ധതിയും തമ്മിലുള്ള പങ്കാളിത്തം വിപുലീകരിക്കുന്നു. കായികരംഗത്തെയും സംസ്കാരത്തെയും തമ്മിൽ ബന്ധിപ്പിക്കുന്ന ഈ സംരംഭം 2026-ലെ സീസണിൽ മെക്സിക്കോ സിറ്റി, കെയ്‌റോ, റബാത്ത് എന്നിവിടങ്ങളിലേക്ക് പടർന്നുപന്തലിക്കും.
​2024-ൽ ഖത്തർ-മൊറോക്കോ സാംസ്കാരിക വർഷത്തിന്റെ ഭാഗമായി റബാത്തിൽ ആരംഭിച്ച ഈ കൂട്ടുകെട്ടിന്റെ വിജയമാണ് ഇപ്പോൾ കൂടുതൽ ആഗോള ലക്ഷ്യസ്ഥാനങ്ങളിലേക്ക് വ്യാപിപ്പിക്കാൻ തീരുമാനിച്ചിരിക്കുന്നത്.
ഏപ്രിൽ 16 മുതൽ 19 വരെ മെക്സിക്കോ സിറ്റിയിലെ കാമ്പോ മാർട്ടെയിലാണ് ഈ സീസണിലെ പ്രധാന മത്സരം അരങ്ങേറുന്നത്. മെക്സിക്കോയുടെ ആവേശകരമായ സാംസ്കാരിക പശ്ചാത്തലത്തിൽ നടക്കുന്ന ഈ കായികമേള ഖത്തർ-കാനഡ-മെക്സിക്കോ 2026 സാംസ്കാരിക വർഷത്തിലെ സുപ്രധാന ചടങ്ങാകും.ദോഹ ഫാൽക്കൺസ്' ടീമിനെ പ്രതിനിധീകരിച്ച് ജെസീക്ക മെൻഡോസ, സാൻ തിജ്‌സെൻ, നഥാൻ ബഡ് എന്നിവരടങ്ങുന്ന പ്രതിഭാധനരായ സംഘം മെക്സിക്കോയിലെ അരീനയിൽ മാറ്റുരയ്ക്കും.കായികരംഗത്തെ ഒരു പാലമാക്കി മാറ്റിക്കൊണ്ട് രാജ്യങ്ങൾ തമ്മിലുള്ള ആഴത്തിലുള്ള ബന്ധം കെട്ടിപ്പടുക്കുകയാണ് ഈ പങ്കാളിത്തത്തിലൂടെ ലക്ഷ്യമിടുന്നതെന്ന് 'ഇയേഴ്സ് ഓഫ് കൾച്ചർ' ഉപദേഷ്ടാവ് മുഹമ്മദ് അൽ കുവാരി പറഞ്ഞു.
റബാത്തിലെ വിജയത്തിന് ശേഷം കൂടുതൽ നഗരങ്ങളിലേക്ക് ഈ സാംസ്കാരിക വിനിമയം എത്തിക്കുന്നതിൽ അഭിമാനമുണ്ടെന്ന് ലോഞ്ചിൻസ് ഗ്ലോബൽ ചാമ്പ്യൻസ് ടൂർ പ്രസിഡന്റ് ജാൻ ടോപ്‌സ് വ്യക്തമാക്കി.
​കുതിരസവാരി എന്ന കലയിലൂടെ ലോകത്തിന്റെ വിവിധ കോണുകളിലുള്ള ജനങ്ങളെയും സംസ്കാരങ്ങളെയും ഒന്നിപ്പിക്കാനുള്ള ഖത്തറിന്റെ ശ്രമങ്ങൾക്ക് ഈ പങ്കാളിത്തം പുതിയ കരുത്ത് പകരും.