തിരുവനന്തപുരം: സ്ത്രീകളോട് അതിക്രമം നടത്തിയെന്ന പരാതിയിൽ എം.എൽ.എ രാഹുൽ മാങ്കൂട്ടത്തിനെതിരെ ക്രൈംബ്രാഞ്ച് കേസെടുത്തു. തിരുവനന്തപുരം റേഞ്ച് ഡിവൈ.എസ്.പി സി. ബിനുകുമാറിനാണ് അന്വേഷണ ചുമതല. മൂന്ന് വർഷം വരെ തടവും പിഴയും ലഭിക്കാവുന്ന വകുപ്പുകളാണ് എം.എൽ.എക്കെതിരെ ചുമത്തിയിരിക്കുന്നത്.

​സമൂഹമാധ്യമങ്ങളിലൂടെ സ്ത്രീകളെ പിന്തുടർന്ന് ശല്യം ചെയ്യുക, മാനസികമായി വേദനിപ്പിക്കുക, ഗർഭഛിദ്രത്തിന് നിർബന്ധിക്കുന്ന സന്ദേശങ്ങൾ അയക്കുകയും ഫോൺ വിളിച്ച് ഭീഷണിപ്പെടുത്തുകയും ചെയ്യുക തുടങ്ങിയ കുറ്റങ്ങളാണ് രാഹുൽ മാങ്കൂട്ടത്തിനെതിരെ ചുമത്തിയിരിക്കുന്നത്. പോലീസ് മേധാവിക്ക് ലഭിച്ച പരാതികളുടെ അടിസ്ഥാനത്തിലാണ് കേസെടുത്തത്. പരാതിക്കാരുടെ മൊഴി ഉടൻ രേഖപ്പെടുത്തും.
​കേസിന്റെ ഭാഗമായി രാഹുൽ മാങ്കൂട്ടത്തിൻ്റെയും സഹായികളുടെയും ഫോണുകളും കമ്പ്യൂട്ടറുകളും പിടിച്ചെടുത്ത് പരിശോധിക്കും. വാട്സ്ആപ്പ്, ടെലിഗ്രാം പോലുള്ള ആപ്പുകളിലെ ചാറ്റുകൾ വീണ്ടെടുത്ത് തെളിവെടുപ്പിനായി ഉപയോഗിക്കാനാണ് ക്രൈംബ്രാഞ്ചിന്റെ തീരുമാനം.
​
ചുമത്തിയ വകുപ്പുകളും ശിക്ഷകളും

​ബി.എൻ.എസ് 78(2): ഇന്റർനെറ്റ് ഉൾപ്പെടെയുള്ള ഇലക്ട്രോണിക് മാധ്യമങ്ങളിലൂടെ സ്ത്രീകളെ നിരീക്ഷിച്ചാൽ മൂന്ന് വർഷം വരെ തടവും പിഴയും ലഭിക്കും. കുറ്റം ആവർത്തിച്ചാൽ ശിക്ഷ അഞ്ച് വർഷം വരെയാകാം.

​ബി.എൻ.എസ് 351: വാക്കുകളിലൂടെയോ പ്രവൃത്തികളിലൂടെയോ ഭീഷണിപ്പെടുത്തി ഒരാളെക്കൊണ്ട് ഒരു കാര്യം ചെയ്യിക്കുകയോ ചെയ്യാതിരിക്കാൻ പ്രേരിപ്പിക്കുകയോ ചെയ്താൽ രണ്ട് വർഷം വരെ തടവോ പിഴയോ രണ്ടും കൂടിയോ ലഭിക്കാം.

​പോലീസ് ആക്ട് 120(ഒ): കത്ത്, സന്ദേശം, ഇ-മെയിൽ, അല്ലെങ്കിൽ ദൂതൻ വഴി ശല്യമുണ്ടാക്കിയാൽ ഒരു വർഷം വരെ തടവോ 5,000 രൂപ പിഴയോ രണ്ടും കൂടിയോ ശിക്ഷ ലഭിക്കാം.