ഫൈനൽ മത്സരത്തിൽ ചാമ്പ്യൻ മാരായ തിരുവനന്തപുരം എച്ച് & ആര്‍ ബ്ലോക്ക് ടീം അംഗങ്ങൾ
കൊച്ചി : മയക്കുമരുന്ന് വിരുദ്ധ സന്ദേശം പ്രചരിപ്പിക്കുന്നതിനായി വിപിഎസ് ലേക്‌ഷോർ ആശുപത്രിയുടെ നേതൃത്വത്തിൽ എറണാകുളം കുഫോസ് ഗ്രൗണ്ടിൽ സംഘടിപ്പിച്ച ഫ്‌ളഡ്‌ലൈറ്റ് കോർപ്പറേറ്റ് ക്രിക്കറ്റ് ലീഗ് സമാപിച്ചു.
ഫൈനൽ മത്സരത്തിൽ തിരുവനന്തപുരം എച്ച് ആര്‍ ബ്ലോക്ക് ടീം വിപിഎസ് ലേക്‌ഷോർ ടീമിനെതിരെ 59 റൺസിന്റെ മുന്നേറ്റത്തിലാണ് ചാമ്പ്യന്മാരായത്. ടോസ് നേടി ബാറ്റിംഗ് തിരഞ്ഞെടുത്ത എച്ച് & ആര്‍ ബ്ലോക്ക് 6 ഓവറിൽ 101 റൺസ് നേടി. അനൂപ് എംസി (31 റൺസ്, 11 പന്ത്, 4 സിക്സ്) മികച്ച പ്രകടനം കാഴ്ചവച്ചു. മറുപടി ബാറ്റിംഗിന് ഇറങ്ങിയ വിപിഎസ് ലേക്‌ഷോർ 6 ഓവറിൽ 42 റൺസ് നേടി. മത്സരത്തിലെ താരമായി ലേക്‌ഷോറിന്റെ അമീറിനെ തിരഞ്ഞെടുത്തു.
മെയ് 10 മുതൽ 12 വരെ നടന്ന ക്രിക്കറ്റ് ടൂർണമെന്റിൽ സംസ്ഥാനത്തെ വിവിധ കോർപ്പറേറ്റ് സ്ഥാപനങ്ങൾ ആയ ടി സി എസ് , വിപ്രോ, ജിയോജിത്, ആശുപത്രീകൾ ആയ ആസ്റ്റർ മെഡ്‌സിറ്റി, രാജഗിരി ഹോസ്പിറ്റൽ, കാലിക്കറ്റ് മെഡിക്കൽ കോളേജ്, എറണാകുളം മെഡിക്കൽ ട്രസ്റ്റ് ഹോസ്പിറ്റൽ, പോലീസ് വിഭാഗം, തപാൽ വകുപ്പ്, എക്സൈസ് വകുപ്പ് തുടങ്ങിയ 20 ഓളം ടീമുകളാണ് പങ്കെടുത്തത്.
കായികത്തിലൂടെ യുവാക്കളെ മയക്കുമരുന്നിൽ നിന്നും പിന്തിരിപ്പിക്കാനുള്ള ശ്രമമായാണ് ഇത്തരത്തിൽ ഒരു സംസ്ഥാനതല ക്രിക്കറ്റ് ടൂർണമെന്റ് സംഘടിപ്പിച്ചതെന്ന് ലേക്‌ഷോർ എം ഡി എസ് കെ അബ്ദുള്ള പറഞ്ഞു.
സംസ്ഥാനത്തെ വിവിധ പ്രൊഫഷണൽ മേഖലകളിൽ നിന്നുള്ള ടീമുകളും ലീഗിൽ സജീവ സാന്നിദ്ധ്യമായി. മത്സരത്തിനൊപ്പം ബോധവത്കരണ സന്ദേശം പങ്കുവെക്കാൻ ലീഗ് വേദിയായി.
