ന്യൂഡൽഹി: കേരളത്തിൽ നേരിട്ടത് വൻ തിരിച്ചടിയാണെങ്കിലും അതിന്റെ പേരിൽ നേതാക്കളെ മാറ്റില്ലെന്ന് സി.പി.എം ജനറൽ സെക്രട്ടറി എം.എ. ബേബി വ്യക്തമാക്കി. പാർട്ടിയിൽ ഇപ്പോൾ ആവശ്യമുള്ളത് തെറ്റുതിരുത്തൽ നടപടികളാണെന്നും അത് നേതാക്കളെ മാറ്റാനല്ലെന്നും അദ്ദേഹം ഡൽഹിയിൽ മാധ്യമങ്ങളോട് പറഞ്ഞു.
​തിരഞ്ഞെടുപ്പ് തിരിച്ചടിയുടെ പശ്ചാത്തലത്തിൽ, തെറ്റുതിരുത്തൽ നടപടികൾ വിപുലമായി ചർച്ച ചെയ്യുന്നതിനായി ജൂൺ 5 മുതൽ 8 വരെ തിരുവനന്തപുരത്ത് സംസ്ഥാന സെക്രട്ടേറിയറ്റും സംസ്ഥാന കമ്മിറ്റിയും ചേരും. പൊളിറ്റ് ബ്യൂറോ (പി.ബി) അംഗങ്ങളുടെ പ്രത്യേക സംഘവും ഈ യോഗങ്ങളിൽ പങ്കെടുക്കും.
​മുഖ്യമന്ത്രി പിണറായി വിജയൻ, പാർട്ടി സംസ്ഥാന സെക്രട്ടറി എം.വി. ഗോവിന്ദൻ എന്നിവർക്കെതിരെ കീഴ്ഘടകങ്ങളിൽ നിന്ന് വിമർശനം ഉയരുന്നതിനെക്കുറിച്ചുള്ള മാധ്യമപ്രവർത്തകരുടെ ചോദ്യങ്ങളോട് പ്രതികരിക്കവേയാണ് നേതൃമാറ്റത്തിനുള്ള സാധ്യത എം.എ. ബേബി പൂർണ്ണമായും തള്ളിയത്. എന്നാൽ, പിണറായി വിജയനെ പ്രതിപക്ഷ നേതാവാക്കാനുള്ള സംസ്ഥാന സെക്രട്ടേറിയറ്റിന്റെ നിർദ്ദേശം പി.ബി യോജിച്ചാണ് എടുത്തതെന്ന് വ്യക്തമാക്കിയ അദ്ദേഹം, പാർട്ടിയിൽ വിയോജിപ്പുകൾ ഉയർന്നിരുന്നുവെന്ന റിപ്പോർട്ടുകൾ നിഷേധിക്കാൻ തയ്യാറായില്ല.
​മൂന്നുദിവസത്തെ സി.പി.എം കേന്ദ്ര കമ്മിറ്റി യോഗത്തിന്റെ തീരുമാനങ്ങൾ വിശദീകരിക്കാനാണ് അദ്ദേഹം മാധ്യമങ്ങളെ കണ്ടത്. തിരഞ്ഞെടുപ്പ് നടന്ന ബംഗാൾ, തമിഴ്നാട്, അസാം, പുതുച്ചേരി എന്നിവിടങ്ങളിലെ അവലോകന റിപ്പോർട്ടുകൾ വിലയിരുത്താൻ ജൂലൈ പകുതിയോടെ പ്രത്യേക കേന്ദ്ര കമ്മിറ്റി ഡൽഹിയിൽ ചേരുമെന്നും അദ്ദേഹം അറിയിച്ചു.
​മറ്റ് പ്രധാന പ്രതികരണങ്ങൾ:
​ബി.ജെ.പി വളർച്ചയിൽ ആശങ്ക: കേരളത്തിൽ മൂന്ന് സീറ്റുകളിൽ മാത്രമാണ് ബി.ജെ.പിക്ക് വിജയിക്കാൻ കഴിഞ്ഞതെങ്കിലും അവരുടെ വോട്ട് വിഹിതത്തിലുണ്ടായ വളർച്ച പാർട്ടിക്ക് പ്രധാന ആശങ്കയാണ്. സി.പി.എം-ബി.ജെ.പി ഡീലാണ് കേരളത്തിലുണ്ടായതെന്ന കോൺഗ്രസിന്റെ ആരോപണത്തെ കേന്ദ്ര കമ്മിറ്റി ശക്തമായി അപലപിക്കുന്നു.
​നീറ്റ് വിവാദം: നീറ്റ് യു.ജി ചോദ്യപേപ്പർ ചോർച്ചയിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന് പദത്തിലിരിക്കാൻ യാതൊരു ധാർമ്മിക ഉത്തരവാദിത്തവുമില്ല.
​തൊഴിലില്ലായ്മ: രാജ്യത്തെ തൊഴിലില്ലായ്മയിൽ യുവജനങ്ങൾ എത്രമാത്രം രോഷാകുലരാണ് എന്നതിന് തെളിവാണ് ബി.ജെ.പിക്കെതിരെ ഓൺലൈനിൽ ഉയർന്നുവരുന്ന പ്രതികരണങ്ങളെന്നും ബേബി കൂട്ടിച്ചേർത്തു.